Ako Fuakava Motu’a – Tohi Senesi #3


Fakatupu – Senesi 1:1 – 2:3


Fa’u ‘e Linda Tu’ulakitau


‘Oku fu’u ma’olunga ‘aupito ‘a e anga hono fa’u ‘o e talanoa ‘o e fakatupú. Pea ‘oku ‘i ai ‘a e fa’ahinga founga/sipinga makehe ‘oku ngāue’aki he anga hono hiki ‘o e talanoa ‘o e fakatupú ‘o anga pehē ni: “Pea folofola ‘a e ‘Otuá…pea na’e hoko ia…pea ‘afio ki ai ‘a e ‘Otuá, kuo lelei” etc. Ko e fa’ahinga sipinga ko ‘eni ‘oku ngāue’aki ki hono hiki ‘o e talanoa ‘o e fakatupú ‘oku ne faka’ata mai ko e ‘Otuá ‘oku ne malava ke ne ngāue’aki ‘a e me’a ‘oku ta’e’iai hano taumu’á, mo e me’a ‘oku ‘ikai ke maaú (order) pe ngāué (function) ‘o Ne ngaohi ‘a e ‘univeesi (cosmos) ‘oku maau (ordered).

Ko e ‘uluaki ‘aho ‘e tolu ‘o e fakatupú, na’e ngaohi ai ‘e he ‘Otuá ‘a e ngaahi ngāue pe lakanga faingofua/mahino ngofuá hangē ko e taimí, ‘eá (weather), ‘akaú (plantation), ngaahi me’a mo’uí (animals, birds etc) etc. Pea ‘i he ‘aho tolu hono hokó, na’e ngaohi ai ‘e he ‘Otuá ‘a e ngaahi ngāue mo e lakanga ‘o ‘ene ngaahi me’a fakatupú pea na’a Ne ngaohi foki mo e tangatá mo e fefiné ke ne nofo’i ‘a e mamaní.

Ko e me’a ‘oku fakama’unga ki ai ‘a e fa’utohi ‘o e fakatupú, na’e ngaohi ‘e he ‘Otuá ‘a e me’a kotoa pē ke maau (ordered) koe’uhí ke fe’unga mo haohaoa (perfect) ki he kakai tenau nofo’i ‘a e mamaní. Ko e ki’i fo’i talateu (introduction) totonu pē ia fekau’aki mo e ‘Otuá (ko hai ‘a e ‘Otuá), pea mo ‘Ene taumu’a ki he tangata mo e fefine na’a Ne fakatupú.

Kimu’a he kau Pēteliaké: Motua’i Hisitōliá – Senesi 2:4-11:26

Ko e Motua’i Hisitōliá ‘oku sio fakamāmani lahi ‘a e fakamama’u ‘ene tokangá ki he fa’ahinga ‘o e tangatá (humanity). ‘Oku tau ako mei he Motua’i Hisitōliá ‘a e fakafehoanaki ‘a e tu’unga mā’olunga na’e ‘i ai ‘a e mo’ui ‘a e tangatá ‘i hono fa’u ‘e he ‘Otuá pea mo e tūkunga ma’ulalo ne a’u ki ai ‘a e mo’ui ‘a e tangatá tu’unga he’enau talangata’á. Ko e ‘uluaki talangata’a ‘a ‘Atama mo ‘Iví, na’e hoko ia ke tuli ai kinaua kitu’a mei he ngoue’angá, na’a na mavahe ai mei he ‘Otuá, pea fakaiku ki he’ena mate. Ko e tamate’i koee ‘e Keini hono tokoua ko ‘Epelí, ‘oku ne to e fakahā mahino mai ‘a e tūkunga ma’ulalo kuo a’u ki ai ‘a e mo’ui ‘a e fa’ahinga ‘o e tangatá tu’unga ‘i he’enau talangata’á mo ‘enau mavahe mei he ‘Otuá.

Ko e tuku’au ‘o e taimí ‘a ia ‘oku faka’ata mai ia ‘e he ngaahi to’utangatá (genealogies) na’e mahino ai ‘a e to e fakautuutu ange ke kovi pea to e ma’ulalo ange ‘a e tūkunga ‘o e mo’ui na’e a’u ki ai ‘a e tangatá. Na’e to e ‘amo ange ‘a Lemeki ia he faiangahala ‘a ‘Ivi mo ‘Atama mo Keiní koe’uhí he ko hono lotó na’a ne polepole’aki ‘a e fakamālohi (violent) na’a ne faí. (Sio kia Senesi 4:23-24). ‘I he a’u ki he taimi ‘o Noá, kuo hoko ‘a e fakamālohí (violence) ko e anga pē ia ‘o e mo’ui anga maheni ‘a e kakaí. Na’e hanga ‘e he tokotaha na’a ne fa’u ‘a Senesí ‘o filifili mai ‘a e ngaahi talanoa totonu ‘oku ne fakahaa’i mata’ā’ā mai ai ‘a e tūkunga fulikivanu kuo a’u ki ai ‘a e fa’ahinga ‘o e tangatá mei he vaha’a taimi ‘o e tō ‘a e tangatá ki he lōmakí.

‘Oku faka’ata mai ‘e he lōmakí ‘a e tautea ‘a e ‘Otuá ki he mamaní mo e kelesi ‘a e ‘Otuá. Na’e faka’auha ‘e he ‘Otuá ‘a e mamani na’e fulikivanu ai ‘a e faiangahalá ‘aki ‘a e lōmakí, ka ‘i he taimi tatau, na’a Ne fakahaa’i ‘Ene kelesí ‘aki ‘Ene fakahaofi ‘a Noa mo hono familí koe’uhí kenau fai ha kamata fo’ou (a new beginning). Na’e fakahaofi ‘e he ‘Otuá ‘a e fa’ahinga ‘o e tangatá ‘aki ‘Ene fakahaofi ‘a e mo’ui ‘a Noa mo hono famili.́

‘I he hili ‘a e lōmakí, na’e fakafo’ou ‘e he ‘Otuá ‘ene tāpuakí, ka na’e to e vave pē ‘a e foki ‘a e mamaní ke to e fakautuutu ange ‘enau koví. Na’e hokohoko atu pē ‘a e filifili mai ‘e he tokotaha na’a ne fa’u ‘a Senesí ‘a e ngaahi fakamatala ‘oku ne fakahaa’i ai ‘a e nunu’a ‘o e natula’i angahala ‘o e tangatá, ‘a ia ‘oku ‘asi pē ia he fanga foha ‘o Noá. Na’e feinga ‘a e fa’ahinga ‘o e tangatá kenau tatau mo e ‘Otuá, pea fai atu pea nau mavahe mei he feinga kenau tatau mo e ‘Otuá ‘onau feinga kenau mimio (twisted) ‘a e ‘Otuá ‘i honau ‘atamaí koe’uhí ke tatau pē ‘Otuá mo kinautolu. ‘Oku tau tui ko e me’a ia na’e hoko he’enau langa ‘a e Taua ‘o Pepelí ‘i he toafa ‘i he fonua ko Sainá. Na’e hanga ‘e he ‘Otuá ‘o fakafaingata’a’ia mo fakangatangata (limitation) ‘a ‘enau fakatahataha ‘i he’enau fakakaukau halá pea mo ‘enau talangata’á. Na’e hanga ‘e he ‘Otuá ‘o veuveuki ‘enau leá ‘o nau lea he ngaahi lea kehekehe (different languages) ‘o ‘ikai kenau to e femahino’aki he leá. Pea iku ai ki he veteki kinautolu ‘e Sihova mei he potu ko iá kenau nofo’i ‘a e fonua kotoa.

Na’e fai ‘eni ‘e Sihova koe’uhí ke fakangata’aki ‘a e ngāue uouongataha ‘a e fa’ahinga ‘o e tangatá he’enau talangata’a ki he ‘Otuá, pea ‘ikai ngata ai, ka ‘oku  ngāue’aki ‘eni ‘e he ‘Otuá ke Ne fai ai ha liliu ‘a ia ‘e ‘i ai ‘ene uesia (impact) ki he mo’ui ‘a e fa’ahinga ‘o e tangatá. ‘Oku mahino lelei mei heni ‘a e kelesi ‘a e ‘Otuá ‘i he’ene feinga ta’etoe ‘i ai ha’ane holomui ke Ne fakahāa’i IA ki he fa’ahinga ‘o e tangatá ‘o fakafou mai ‘i ha tangata ‘e taha mo hono familí.

Toki hoko atu . . .

Sponsor Advertisement

Be the first to comment on "Ako Fuakava Motu’a – Tohi Senesi #3"

Leave a comment

This site uses Akismet to reduce spam. Learn how your comment data is processed.