Ako Fuakava Motu’a – Tohi Senesi #4


Ko e kau Pēteliake ‘i Palesitainé: Talanoa ‘o e kau Pēteliaké (Senesi 11:27-37:1)


Fa’u ‘e Linda Tu’ulakitau

‘Oku ‘ikai ke fakamatala’i ‘a ‘Epalahame ia ke pehee ko e tangata mā’oni’oni pe ‘e fakatatau ia ‘e he Folofolá ki he mamani na’a ne nofo aí. Ka ‘oku fakahā mahino mai ‘e Siosiua 24:2 ko e tangata’eiki ‘a ‘Epalahamé ‘a Tela mo hono familí na’a nau tauhi kinautolu ki ha ‘otua kehe. ‘Oku fakamatala ‘a e tohitapu faka-pālangí, na’a nau “serve other gods” – “tauhi ki ha ngaahi ‘otua kehe”.

Ko e fuofua taimi na’e ‘asi ai ‘i he Folofolá ‘a e fetu’utaki ‘a e ‘Otuá mo ‘Epalamé ‘oku ‘asi ia ‘ia Senesi 12:1-3 ‘i hono fekau ‘e he ‘Otuá ‘a ‘Epalame ke ne hiki mei hono fonuá pea mei hono tupu’angá pea mei he fale ‘o ‘ene tamaí ki he fonua te ne fakahā kiate ia. Pea ‘i he’ene talangofua ‘o mavahe mei hono tupu’angá, pea na’e palōmesi ‘e he ‘Otuá kiate ia te ne ngaohi ia ko e pule’anga lahi, pea te ne fakamonū’ia ia, pea te ne fakatau’olunga hono hingoá, pea te ne hoko ko e monū’ia’anga. Ko e me’a ‘oku tau ako mei he ngaahi veesi Folofola ko ‘ení, na’e fiema’u ‘e he ‘Otuá kia ‘Epalame ke ne mavahe mei hono fonua tupu’angá pea mei he fale ‘o ‘ene tamaí koe’uhí kae ‘i ai ha kamata’anga fo’ou (new beginning) ki he’ene mo’uí. Na’e ‘ikai ke fai leva ‘e he ‘Otuá ha’ane kovinānite mo ‘Epalame he taimi ko ‘ení ka ko e ngaahi palōmesi ‘a e ‘Otuá kuo ne ‘osi fakahā ange ia kia ‘Epalame, ka ‘e toki fakahoko ia ‘e he ‘Otuá ‘o kapau ‘e talangofua ‘a ‘Epalame ki he ngaahi conditions ‘a e ‘Otuá. Kuopau ke ne hiki mei he potu motu’á ki ha potu fo’ou te ne fakahā kiate ia.

Kimu’a ke fai ‘e he ‘Otuá ha kamata fo’ou ‘i he’etau mo’uí kuopau ke tau hiki mei he potu pe me’a motu’á mo e me’a kuo tau anga maheni ki aí ki ha potu fo’ou ‘oku ‘ave kitautolu ki ai ‘e he ‘Otuá. He ko e potu fo’ou ia koee ‘oku ‘i ai ‘a e tāpuaki mo e fakamonū’ia ‘a e ‘Otuá. Ka kuopau ke tau tukulolo ‘o talangofua ki he ‘Otuá ‘i he’ene tataki ‘oku fai ki he’etau mo’ui.́

‘Oku talanoa leva ‘a Senesi 12-22 ki he hisitōlia ‘o e fokotu’u ‘o e kovinānite ‘a e ‘Otuá pea mo ‘Epalahamé. Hili koee ‘a e mavahe ‘a ‘Epalahamé mei hono tupu’angá mo e fale ‘o ‘ene tamaí, ko e ta’u ‘e fāngofulu pe nimangofulu hokó, ko e talanoa ia ki he anga hono fakahoko ‘e he ‘Otuá mo ‘ene fakakakato ‘ene palōmesi kia ‘Epalahamé. Ko e founga hono fakahoko ‘o e talanoá ‘oku ne ngaohi ‘a e kakai ‘oku nau lau ‘a e tohi ‘o Senesí (readers) ke nau fifili (keep guessing) pe koehā e me’a ‘e hoko he fo’i event takitaha. ‘Oku ‘asi ‘a e poto’i ‘a e anga hono fa’u ‘o e talanoa ‘o ‘Epalahamé he ‘oku ne ‘ai ke tau fifili pe ‘e anga fēfē hono fakakakato ‘e he ‘Otuá ‘ene palōmesí. (suspense). He ‘oku hanga ‘e he talanoa ‘o ‘Epalahamé ‘o tuku mai ha ngaahi challenges pe ko ha ngaahi me’a ‘oku ne fakafaingata’a’ia’i ke lava ‘o fakakakato ‘a e palōmesi ‘a e ‘Otuá kia ‘Epalahamé. Ko ‘ene lava’i koee ‘o overcome ‘a e fo’i fakafaingata’a’ia (obstacle) taki taha, pea ‘oku toki fakamatala’i mai leva ‘a e ngaahi sitepu ki hono fakakakato ‘a e ngaahi palōmesi ‘o e kovinānité. Ko e ngaahi fakafaingata’a’ia (obstacles) ko ‘eni ki he palōmesi ‘o e kovinānité ‘oku hoko mai ia ‘i he founga ‘o hono ‘omai ha kakai ‘oku hangehangē ko nautolu ia te nau hoko ko e ‘ea (heir) ‘o ‘Epalahamé (alternate heirs). ‘Oku to e hoko mai foki ‘i he founga ‘o ha ngaahi events ‘oku ngali fakatu’utāmaki ki he mo’ui ‘a e major characters ‘i he talanoá hangee ko ‘Epalahame, Sela mo ‘Aisaké.

Ko e fo’i ‘uluaki obstaclé na’e hoko ia he taimi koee na’e ‘alu hifo ai ‘a ‘Epalahame mo Sela ke na ‘aunofo ki ‘Isipité koe’uhí ko e honge ‘i he fonua.́ Pea hanga ai ‘e Felo ‘o ‘ave ‘a Sela ki hono fale.́ Pea ko e fakatu’utāmaki ‘o e fo’i event ko ‘ení koe’uhí na’a faifaiange kuo ‘ave ‘e Felo ‘a Sela ki hono harem ‘o hoko ia ko e taha ‘o ‘ene kau sinifú pea faifai pea fa’ele’i ai ‘e Sela ia ha tama ‘oku ‘ikai ko ha foha ia ‘o ‘Epalahame. Ka ko e fo’i faingata’a ko ‘ení na’e ‘ikai hoko ia koe’uhí he na’e taa’i ‘e he ‘Otuá ‘a Felo ‘aki ha ngaahi tautea lahi pehee foki ki hono ‘apí ko e me’a ‘i he’ene ‘ave ‘a Sela ki hono falé, pea lea ai ‘a Felo kia ‘Epalahame pe koehā na’e loi ange ai kiate ia ko Selá ia ko hono tuofefine ‘o ‘ikai ko hono uaifi. Pea fekau ai ‘e Felo ‘a ‘Epalahame ke ne to’o hono uaifí́ ‘a Sela pea na ‘alu. Pea na’a na hū leva ki tu’a mei ‘Isipite. (Senesi 12).

Ko e ‘uluaki obstacle ki ha ‘ea ‘o ‘Epalahame na’e hoko mai ia ‘ia Lote. Talamai ‘e Senesi 13, na’e ‘alu ‘a ‘Epalahame mo Sela mei ‘Isipite ki he feitu’u ko Tonga, pea na’a na o foki mo Lote ‘a ia ko e foha ia ‘o e tokoua ‘o ‘Epalahame ko Helani (Senesi 11:27). Na’e ‘ikai ke ‘i ai ha fānau ‘a ‘Epalahame mo Sela, pea ‘oku tau tui na’e hangehangē ko Lote ‘e hoko ia ko e ‘ea ‘o ‘Epalahamé. Ka ko e fo’i obstacle ko ‘ení na’e veteki ia ‘ia Senesi 13 he taimi koee na’e fili ai ‘e Lote ‘a e fonua ‘i he Seakale ‘o Siotaní ‘o fakapehee atu ki Soa (taimi ia ‘oku te’eki maumau’i ‘e he ‘Otuá ‘a Sotoma mo Komolá). Pea na’e pau ke mavahe ‘a Lote meia ‘Epalahame ‘o nofo he fonua na’a ne filí. Ka ‘i he taimi tatau na’e palōmesi ‘a e ‘Otuá kia ‘Epalahame te ne ‘oange ma’ana mo hono hakó ‘a e fonua kotoa ‘oku ne sio ki aí (ki he tokelau, mo e tonga, hahake mo hihifo) ‘o ta’engata. (Senesi 13:14-17).

Na’e hoko atu ‘a e talanoa ‘o ‘Epalahamé ki he vahe 15 ‘o Senesi.́ Pea pehee ai ‘e ‘Epalahame ki he ‘Otuá kuo ‘ikai ke ne ‘omai hano hako pea ko e tokotaha ‘i hono falé na’e hingoa ko ‘Eliesa te ne hoko ko hono ‘eá (alternate heir). Ka na’e to’o ‘e he ‘Otuá ‘a e fo’i obstacle ko ‘ení ‘o fakafou mai ‘i ha alternate heir ‘o ‘Epalahame, ‘aki ‘a e talaange ‘e he ‘Otuá kia ‘Epalahame ‘oku ‘ikai ko ‘Eliesa ia ‘e hoko ko hono ‘ea.́ Ka na’e folofola ‘a e ‘Otuá kia ‘Epalahame ko hono ‘eá ‘e ha’u pē ia mei he manava ‘o ‘Epalahame.́ Pea taki ia kitu’a ‘e he ‘Otuá ‘o talaange ke ne hanga ki he langí pea ne lau ‘a e ngaahi fetu’ú pe te ne lava ‘o lau he ‘e pehee ‘a e tokolahi hono hakó ‘e hangee ko e fetu’u ‘o e langí;  he’ikai lava hano lau!

‘I he ngata’anga ‘o e vahe 15 ‘o Senesí, na’e mahino ai ‘a e ngaahi va’ava’a mo e fihifihi ‘o e kovinānite ko ‘eni ‘a e ‘Otuá mo ‘Epalahame.́ Neongo kuo ‘osi fakapapau’i ange ‘e he ‘Otuá ia kia ‘Epalahame te ne ma’u mo hono hakó ‘a e fonuá, ka na’e to e ‘oange ‘e he ‘Otuá ‘a e fakamatala kia ‘Epalahame ‘i he vahe 15, he’ikai leva ke ma’u ‘e hono familí ‘a e fonua ‘o e palōmesí ‘i ha to e ta’u ‘e fāngeau.

Toki hoko atu . . .











































Be the first to comment on "Ako Fuakava Motu’a – Tohi Senesi #4"

Leave a comment

Your email address will not be published.


*


This site uses Akismet to reduce spam. Learn how your comment data is processed.