Kaveinga′ – Ko e Pilinisi ‘o e Melino′ – The Prince of Peace.


Fa’u ‘e Linda Tu’ulakitau

‘Etita ki he Lea Faka-Tonga – Mosiana Fisi’ipeau

‘Oku ta’etukua ‘a ‘eku fakafeta’i mo e fakamālō’ia ‘a e ‘Otua Mafimafi′ ‘i he opeope ‘o ‘Ene kelesi fungani′ – ka Ne to e tapuaki’i ‘aki kitautolu ‘a ‘Ene mānava mo’ui′ ‘o tau to e ‘inasi ai ‘i he ‘aho fo’ou, pongipongi fo’ou ko ‘eni′. Pea ‘oku ou ofo hake mo e loto fonu ‘i he fiefia mo e hounga’ia mo’oni ki hotau ‘Otua′, pea ‘oku mo’oni ‘a e takua ‘o Hono Huafa′ ‘e he Peteliake′ – “Ko Ho’o ngāue ma’aku′, ko e MO’UI mo e ‘OFA, pea ko Ho’o ‘a’ahi tu’u mai′, ‘oku matauhi ai ‘eku mānava′ ” (Siope 10:12). Fakafeta’i! Ko e mo’oni ē mo’oni, na’a ta tō hifo ‘o mohe′, ka Ne hā’ele mai ‘o siofi ‘a e tātā ‘o hota mafu′ (Heart beat), ‘a e puhipuhi ‘a e ki’i falukunga ‘ea ‘i hota ava’i ihu′. Pea pole’i ai kitaua ‘e he Peteliake′ he pongipongi ni, neongo hono lomitoka ia ‘e he faingata’a′ – “kae lolotonga ‘oku ‘iate au ‘eku MĀNAVA′, mo e ‘i hoku ava’i ihu′ ‘a e Hō ‘a ‘Elohā′ – ‘ilo ‘e au kapau ‘e lea kovi ‘e hoku loungutu′, pe lau kākā ‘e hoku ‘elelo ni” (Siope 27:3 & 4).
Ta tu’u hake ā ke ta celebrate hota ‘Otua′, ta fai katoanga mo IA, ‘oange kiate IA Hono mamana′ – ko e fua ‘o hota loungutu′ ko e takua Hono Huafa′, ‘i he hiki ‘a e feilaulau ‘o e fakafeta’i′ mo e fakamālō’ia ‘a Hono Huafa′. Ko ‘eta to e tu’u mo’ui ‘i he pongipongi fo’ou ko ‘eni′ – ko e mana kāfakafa ia ‘a e Tu’I ‘o e ngaahi tu’i′ mo e ‘Eiki ‘o e ngaahi ‘eiki′ ma’au mo au.

Kātaki pē kaungā fononga ‘i he ngali fakalōlōa ‘oku fai′ – ka kuo u faka’amu pē keu vahevahe atu ‘a e ngaahi tukufakaholo ‘a hota ki’i fonua tupu’anga′. ‘Oku te fa’a manatu ki ai pea ko e taimi ko ‘eni′ kuo te ma’u ‘a e mahino′ mo e mo’ui ke fakahoifua ki he ‘Otua′ – pea u liliu kotoa ‘a ‘eku toka’i ‘a ‘etau culture′ keu hanga ‘o fai ia koe’uhí pē ko hoku ‘Otua′ ke Ne langilangi’ia.

‘I hotau fonua′ ‘i Tonga, ‘oku ‘i ai ‘etau tala tukufakaholo, taimi ‘oku longolongo katoanga ai ‘a Tonga′ ‘i ha’atau ngaahi katoanga lalahi faka-fonua, pea ‘oku ‘i ai ‘a e kolo ko honau fatongia faka-fonua′ na’e fakatalutalu ‘aki ia kinautolu. Ko ‘enau uhu hengihengi ki palasi ki he ‘afio’anga ‘o e tu’i′ ‘o fai ‘a ‘enau ‘oto’ota (hiko veve) fakama’a ‘a tu’a.

Pea ‘ikai ngata ai′, ka na’a nau fai hono fakataka pe ko hono faka’aāki ‘a e tōfā pe ko e mohe ‘a e tu’i′. Pea ko hono fakataka ko ia ‘o ‘Ene tōfā′ (mohe) na’e fai ‘aki ia ‘a e tā ha’anau faiva ko e lakalaka pe mā’ulu’ulu pe tau’olunga koe’uhí pē ke ‘ā ‘a e tu’i′ ‘i he pongipongi fo’ou ko ia′. Pea ko e fatongia ia ‘o e kolo ko Holonga′ ‘i Vava’u. Pea ‘i he ‘aho fo’ou ko ia′, ‘oku longolongo katoanga ‘a e me’a kotoa he ‘oku nga’uta fiefia ‘a e me’a kotoa pē. ‘Oku feongo’aki ‘a e fiefia′ mo e mavava′ – ko e katoanga fiefia ‘a e tu’i′ mo hono kakai′.

‘Oku ou tui si’i kaungā fononga, ta apply mai ‘a ‘eta tala tukufakaholo ko ia′ ke fai ‘aki ‘a ‘eta tauhi Tu’i ‘oku fai′. ‘Oku ta tauhi ki he fu’u ‘Otua lahi, ko e ‘Otua ‘o māmani kātoa. Ko e Tu’i ‘o loto hevani′, ko e Tu’i ‘o e ‘univeesi′, ko e Tu’i ‘o taimi mo ‘itāniti′, ko e Tu’i ‘o e mā’oni’oni′, ko e Tu’i fakaleveleva, he ko e Tu’i ‘o e me’a mo’ui kotoa pē. ‘Io, ‘ilonga ha me’a ‘oku mānava ‘oku totonu ke ne ‘ilo’i pea ne acknowledge ko hono TU’I′ ko e ‘Eiki ko Sisu Kalaisi′ – ko e FAKAMO’UI′ IA mo e Tu’i Fakamaau ‘o māmani kātoa.

Kaungā fononga, ka ai ha taimi makehe taha ki he’eta feohi mo hota Tu’i ko Sisu Kalaisi′ ‘i Hono Laumālie Mā’oni’oni′, ka ko e hengihengi′. ‘Ā ‘o fakataka (fakahoha’asi) ‘Ene tōfā′ ‘aki ho’o kailavaki ‘i ho laumālie′ ‘a e fiefia ‘o e fakafeta’i′ mo e fakamālō ki Hono Huafa′. ‘A’au kiate IA ‘a ‘Ene ngaahi lelei′, ‘a ‘Ene tāpuaki′ ‘oku tu’uholoaki mei he to’utangata ki he to’utangata′ ‘o ke ‘inasi ai mo ho fāmili′.

Fai katoanga mo ho ‘Otua′ hengihengi, ‘oange Ma’ana ‘a e ‘uluaki fua (first fruit) ‘o e ‘aho′, ‘o ho taimi′, ko e fakafeta’i mo e fakamālō. He ko e lea ia ‘o ‘Ene Folofola′ ‘ia Palōvepi 8:17 – “’Oku ou ‘ofa kiate kinautolu ‘oku ‘ofa kiate AU′, pea ko kinautolu ‘oku kumi hengihengi kiate AU′, tenau ma’u AU (V.35). He ka ta’imālie ha taha ‘o ma’u AU, ‘oku ne ma’u MO’UI. Pea kuo ne lavengamālie ‘i he ‘ofa meia Sihova′”.

‘Ikai ke ngata ai′, ‘oku ‘aukau atu ‘a e kau fakataka tōfā ki he tu’i ‘o Tonga′, ‘a e tu’i faka-māmani′. Ka ‘oku mou mea’i koā ‘a e Tu’i ‘o e ngaahi tu’i′ mo e ‘Eiki ‘o e ngaahi ‘eiki′, ‘io, ‘a e Hau Ta’eliua ‘o māmani kātoa′. Kuo tohi ia He’ene Folofola′ ‘ia Saame 121:3 & 4 – “…Ko IA ‘oku tauhi koee′, ‘e ‘ikai te Ne mohe. Vakai ko e Tauhi ‘o ‘Isileli′ ‘oku ‘ikai ke tule, pe tokoto ke mohe”. Ka ‘oku hā?…Talamai ‘e 2 Kalonikali 16:9 – “He ko e ongo fo’i fofonga ‘o e ‘Eiki′ ‘oku lele fetoutou mo liliuaki (feleleaki) ‘i māmani kotoa pē, ke fakahā mālohi ‘a ‘Ene ‘Afio′, ke kau mo kinautolu ‘oku tokanga totonu honau loto′ (haohaoa loto) kiate IA′ ”.

Si’i kaungā fononga, ka ‘i ai pē ha Folofola teu ‘omi ko e fakalotolahi kiate kitaua he ‘aho ni, ‘oku tuku ‘e he Laumālie′ ‘a e Folofola ko eni′ ke ta vahevahe ai ‘i hoku loto′.

Folofola′ – ‘Aisea 9:6 – He kuo ‘alo’i mai ha TAMA, kuo tuku mai ha FOHA, pea ‘e ‘i Hono uma′ ‘a e Pule’anga′ – pea ko e HUAFA ‘e ui’aki′ ko FAKAOFO ‘ENE FALE’I, ko e HELO ‘OTUA, ko e TAMAI TA’ENGATA, KO E PILINISI ‘O E MELINO′ ”.

(v.6) – “For unto us a child is born, unto us a Son is given: and the government shall be upon His shoulder: and His name shall be called WONDERFUL COUNSELLOR, THE MIGHTY GOD, THE EVERLASTING FATHER, THE PRINCE OF PEACE”.

Kaveinga′ – Ko e Pilinisi ‘o e Melino′ – The Prince of Peace.

Si’i kaungā fononga Pilikimi, ko e kikite ‘eni ‘a e Palōfita ko ‘Aisea′ ki he ‘Alo’i mai ‘o e Misaia′. Pea ko Hono ngaahi Huafa eni ‘e ui’aki′ mo ‘iloa ‘aki′ ‘oku hiki tohi ‘i he veesi 6′. Ka ‘oku ou faka’amu ke tō ‘a e fakamamafa ‘o e ki’i vahevahe teu fai′ ‘i he konga faka’osi ‘o e veesi 6′ ….Pea ko e Huafa ‘e ui’aki′, ko e PILINISI ‘O E MELINO′.

Ko Sisu Kalaisi ko e Pilinisi, pea ko e Tu’i IA ‘o e Melino′. ‘Oku Ne fakatolonga pe fakaili (preserve) ‘a e melino′. ‘Oku ne fekau’i atu ‘a e melino′ (commands peace), pea ‘ilonga ha potu ‘oku Ne ‘i ai, pe ko ha taha pe ko ha Siasi pe ko ha famili ‘oku Ne ‘I AI, He creates peace there. ‘Oku Ne fakatupu ‘a e melino′. He ko e taha ia ‘o e ‘ulungaanga pe ko e natula ‘o Hono Pule’anga′ ko e melino′. One of the characteristics of His Kingdom is Peace. Talamai ‘ia Loma 14:17 – “He ko e Pule’anga ‘o e ‘Otua′, ‘oku ‘ikai ko ha kai mo ha inu, ka ko e mā’oni’oni mo e MELINO mo e fiefia ‘i he Laumālie Mā’oni’oni′ ”.

Ko Sisu Kalaisi ‘a ‘etau melino′. Jesus Christ is our peace. Pea ko ‘Ene melino′ ‘oku Ne tauhi mo pule’i ‘a e loto ‘o Hono kakai′. Kapau ‘oku masiva hota loto′ mo ha melino, ‘oku ‘ikai ke ‘i ai ‘a e Pilinisi ‘o e melino′ ‘a Sisu Kalaisi. ‘Ikai ngata pē ko e Pilinisi Ia ‘o e melino′, ka ko e Pilinisi manako-melino′ IA, pe ko Hono mamana′ ‘a e melino′. Ka ko IA ‘a e kamata’anga mo e ngata’anga ‘o e foaki lelei kotoa pē mo e melino kotoa pē ‘o e kuohili′, lolotonga′ mo e kaha’u′. Bliss ‘o e fiefia lahi ‘o ‘Ene kakai′ kuo Ne ‘osi, pea ‘oku Ne, pea te Ne sila’i ma’a Hono Pule’anga′.

Kaungā fononga, ko e fehu’i ‘a e Peesi ‘a e GBG-Online Ministry′, kuo ta ma’u mo’oni ‘a e Pilinisi ‘o e Melino′ – ko ‘eta melino′ ia he ‘aho ni ‘o a’u ki he ta’engata′? Koe hā ‘a e me’a ‘oku tu’u ai ‘a ‘eta melino′ he ‘aho ni′? Vakai na’a ‘oku tu’u ‘i ha me’a ‘auha he ‘e holafa. Talamai ‘e Sisu ‘i He’ene Folofola tonu ‘ia Sione 14:27 – “’Oku ou tuku ‘a e melino′ kiate kimoutolu, ‘oku ‘ikai hangē ko e foaki ‘a māmani′ ‘a ‘eku foaki kiate kimoutolu′ ”. “Peace I leave with you, My Peace I give unto you, not as the world giveth, give I unto you”.

‘Io, ko e melino ‘a māmani′ ‘oku fakataimi pē. ‘Oku hā pē mo mole vave; ‘oku valivali’i mai pē ‘i tu’a ‘oku melino, ka ‘oku cold war pe ‘a loto. Ko e melino ia ‘oku valivali’i ‘aki ‘a e ngaahi fāmili lahi he ngaahi ‘aho ni. ‘Oku hā ngali melino pē ‘i tu’a ka kuo cold war pē ‘a loto he vā ‘o e tamai′ mo e fa’ee′. Kuo fesῑtu’a’aki ‘a e loto′, kuo momoko ‘a e ‘uluaki ‘ofa′ he kuo kaiha’asi ia ‘e he tevolo′. Talamai ‘e He’ene Folofola′ ‘ia Kolose 3:15 – “Pea tuku ke pule ‘i homou loto′ ‘a e melino ‘a e ‘Otua′, ‘a ia foki na’e fakaului kimoutolu ki ai kemou lava ‘i ho’omou sino taha′, kae’uma’ā ke mou hoko ko e kau fai fakafeta’i”.

Kaungā fononga, ko e mo’oni ē mo’oni, ko e melino pē ‘a e ‘Otua′ ‘a ia ko Sisu Kalaisi, te Ne lava ‘o ‘omai ‘a e melino mo’oni′ ki ho loto′ mo hoku loto′ he ngaahi ‘aho ni. Ko Sisu pē te Ne ‘omi ‘a e melino mo’oni′ ki he’eta nofo famili′, ki he’eta fānau′. Koe hā ‘oku fefusiaki ai pea ‘alu ai mei he kovi ki he koviange ‘a e molumalu ‘o e nofo mali′? Mahalo pē ‘oku fetuhu’aki pea fetūkuāki ‘a e husepaniti′ mo e uaifi′, ‘o taki taha tu’u he’ene mo’oni. Pea a’u ki he tu’unga kuo hū ha taha kitu’a ‘iate kinaua ‘o ‘alu mei he famili′ ‘o fai hono loto mo ‘ene fakakaukau.

Tuku mu’a keu ‘oatu ‘a e ki’i fakalotolahi ko eni′ ki si’i ngaahi fa’ee, kuo ke toloto ‘i he palopalema ‘o ho’o nofo famili′. Fa’ee, ma’u ha LOTO PAU. Tu’uma’u ho loto′, pea fakamama’u ho mata′ ki he ‘Eiki′, pea lea ho ngutu′ ‘o ke tala fakapatonu kiate IA – “Sisu, ko KOE IA hoku HUSEPANITI TA’ENGATA′. Ko KOE IA ‘a e TAMAI TA’ENGATA ‘eku fanau′. ‘Oku ou humaki atu he ‘aho ni ‘eku fanau na’a ke fakakoloa’aki hoku manava′ kenau TAMAI kiate KOE. Hā’ele mai KOE ‘o tu’u he fatongia faka-Husepaniti′ mo e fatongia ‘o e TAMAI′ ‘i hoku ki’i famili′.” Pea ke kole ‘Ene melino′ ke pule ‘i ho loto′. Ma’u ha loto fa’a fakafeta’i he me’a kotoa pē ‘oku ke fou ai. Hanga ‘o fakamolemole’i ho husepaniti′, ‘oua ‘aupito na’a ke ma’u ha loto kona kiate ia mo ha loto ta’efakamolemole. Ma’u ha loto fakavaivai mo tukulolo kakato ki he TOKOTAHA FO’OU kuo ke TUKUPĀ ki AI ko IA ho Husepaniti Ta’engata′ pea ko e Tamai Ta’engata IA kiate koe mo ho’o ki’i fanau′. Lotu ma’u pē (hoko ko e tokotaha mo’ui lotu, mānava lotu), lotu ma’a ho husepaniti faka-ē-māmani′ pea ke tuku ki he Laumālie′ ke Ne fai ‘a e me’a kotoa pē he ko IA te Ne handle ‘a e me’a kotoa pē. Ko IA ‘e ha’u ‘o tu’u vaha’a ‘iate koe mo ho husepaniti′. Ko Laumālie ‘a e TAUKAPO ma’au′ – Your Mediator between you and your hubby. Ko IA te Ne fai ‘a e LEA Ō’O (Conviction) ki he loto ‘o ho husepaniti′.

Nofo ki he Folofola ‘a e ‘Otua′, lau mo fakalaulauloto ki he Folofola′, he ko e Folofola ‘a e ‘Otua′ te ne fakamaama ho’o fononga faka’aho′. Ko e Folofola ‘a e ‘Otua′ te ne fakama’a faka’aho ‘eta mo’ui′. Talaange ‘e Sisu ki He’ene kau ako′ ‘ia Sione 15:3 – “Kuo mou ma’a ‘eni (tafesino’ivai) kimoutolu, ko e me’a ‘i he lea kuo u fai kiate kimoutolu′ ”.

Talamai ‘e he Saame 119:105 – “Ko Ho’o Folofola′ ko e tūhulu ki he’eku laka′ mo e maama ki hoku hala′ ”. ‘Io, ka ‘i ai ha taha ke ke tauhi vā ki ai he ngaahi ‘aho ni, ‘oku ou pole’i koe – ko e lea ‘eni mei he a’usia tonu – tauhi vā ki ho Husepaniti Ta’engata′, ko e ‘Eiki ko Sisu Kalaisi′ – ko e Pilinisi ‘o e Melino′, ka Ne hanga ‘o reconcile ‘a e me’a kotoa pē ‘i ho’o nofo famili′. Everything will be back to normal in the Lord. Pea toki mo’oni ‘a e Lea ‘a e Palōfita′ ‘ia ‘Aisea 54:4, 5 – (v.4) “’Oua te ke manavahē, he’ikai fakamaā’i koe, pea ‘oua te ke puputu’u, he’ikai ha me’a te ke kula ai. He ‘e ngalo ‘iate koe ho’o nofo taka pē. Pea he’ikai te ke toe manatu ki ho’o nofo uitou′ ”.
(v.5) “He ko ho Husepaniti′ – ‘a ‘Ene ‘Afio′ [‘Otua] na’a Ne ngaohi koe′, ko Sihova Sāpaoti Hono Huafa′. Pea ko ho Koeli′, ‘a e Tapuhā ‘o ‘Isileli′. ‘Oku ui IA ko e ‘Otua ‘o māmani kātoa”.

(Lau mo e v.6-8). Haleluiā! Ko e palōmesi ia ‘a e ‘Otua′ ma’ataua he taimi kuo ta kole ange ai ki AI ke Ne hoko mai ‘o tu’u he tu’unga ‘o e Husepaniti′ mo e tu’unga ‘o e Tamai′ ‘i he famili′. ‘O tatau ai pē he taimi kuo mole (mate) ai′, pe kei mo’ui ai′, pe ‘oku ma’uma’uluta pē ho’o nofo famili′, pe palopalema, pe kuo li’aki koe mo e fanau′ – declare pē ki he Pilinisi ‘o e Melino′ – ko IA ho Husepaniti Ta’engata′ and you take the risk – ka te ke sio mata he holoitounga ‘a e tāpuaki mo e fakakoloa ‘a e ‘Otua′ ‘i he tapa kotoa ‘o ho’o mo’ui′. ‘Ikai ngata He’ene faka-fetaulaki ki ho’o ngaahi fiema’u′ – ka ko e toka ‘a ‘Ene melino′ mo ‘Ene nonga′ ‘i ho loto′ ‘o hangē ha lolo ‘oku lingi ki ha tahi hou′. Hangē ko ia ‘oku lea ki ai ‘a Filipai 4:7…”’a e nongo koee ‘oku mama’o atu ‘i he tatae ‘o e ‘atamai kotoa pē, te ne malu’i homou loto′ mo ho’omou ngaahi fakakaukau′ ‘ia Kalaisi Sisu”.

Ko e me’a kotoa pē ‘i ho’o mo’ui′ ‘e liliu koe’uhí he ‘oku ‘i ai ‘a e deep relationship ‘iate koe pea mo ho Husepaniti Ta’engata′.

Si’i kaungā fononga, ka ‘i ai pē ha me’a keu faka’osi’aki ‘a e ki’i vahevahe ni – ‘oku ou to e fakamanatu atu – ko Sisu Kalaisi ‘a e Pilinisi ‘o e Melino′. Na’a Ne ha’u ‘o:-

1. He made Peace – By His Blood (Kolose 1:20)
2. He speaks Peace – By His Word (Saame 85:8)
3. He gives Peace – In His Person (Sione 14:27).

Ma’u IA ki ho loto′ he taimi ni, ka Ne ‘utufaki ‘Ene melino′, nonga′, fiemālie′ mo ‘Ene fiefia′ ‘i ho’o mo’ui′ mei he ‘aho ni ‘o ta’engata.

‘Ofa atu ki he Tonga kotoa ~











































Be the first to comment on "Kaveinga′ – Ko e Pilinisi ‘o e Melino′ – The Prince of Peace."

Leave a comment

Your email address will not be published.


*


This site uses Akismet to reduce spam. Learn how your comment data is processed.