Ko e Anga hono Hiki e Tohi ‘o Senesi’

Senesi#1

Fa’u ‘e Linda Tu’ulakitau

‘Oku ‘ikai ke ‘ilo’i ia pe ko hai na’a ne hiki pe fa’u ‘a e tohi Senesi’ he ‘oku ‘ikai ‘asi ia he tohi ‘a Senesi’ ‘a e tokotaha na’a ne fa’u’, pea ‘oku ‘ikai ‘asi ia ‘i ha toe tohi kehe he Tohitapu’ pe ko hai na’a ne fa’u ‘a e tohi Senesi’. ‘Oku ‘i ai pē ‘a e fakakaukau mahalo nai na’a ko Mosese pē na’a ne hiki ‘a e tohi Senesi’, ko hono ‘uhinga’ he ‘oku hanga ‘e he ngaahi tohi kehe ‘o e Torah’ ‘o fakakau atu ‘a Mosese ki he’enau ngaahi tohi’. Pea ‘oku pehee ‘e he tokolahi ko Mosese pē ia na’a ne fa’u ‘a e tohi kotoa ‘o e Torah’, pea nau pehee he’ikai ke to e ‘i ai ha taha ‘e toe lelei ange ‘ia Mosese ke ne hiki pe fa’u ‘a e tohi ‘o e kamata’anga’ pe ko Senesi. Ka neongo ‘oku ‘i ai ‘a e ngaahi lāulea lahi fekau’aki mo hono fa’u ‘o e tohi Senesi’ ka ‘oku ‘ikai ma’u ha fakamo’oni pau (reliable evidence) ke ne fakamo’oni’i ko Mosese na’a ne fa’u ‘a e tohi Senesi’.

Ka neongo pe ko hai na’a ne hiki ‘a e tohi Senesi’ – pe ko Mosese (‘a ia ‘oku tui ki ai ‘a e tokolahi) pe ko ha to e tokotaha kehe pē ia he taimi ‘o Tevita mo Solomone’ – pe ko e taimi ‘o Siosaia’ pe ko ‘Esela’ – ka ko e me’a ‘oku mahino mei he Tohi ‘a Senesi’ ‘oku ‘i ai ‘a e fa’ahinga me’a ‘oku makehe atu ‘i he anga hono hiki’. ‘Oku organised ‘i ha fo’i sections ‘e tahataha, pea ko e section kotoa pē ‘oku kamata ‘aki ia ‘a e: “ko e tohi ‘eni…” Ko e fa’ahinga device ia ‘oku ui ko e “toledoth formula”. Ko e toledoth ‘oku ‘ikai ngata pē ‘ene hoko ‘ana ke ne faka’ilonga’i ‘a e kamata’anga mo e ngata’anga ‘o ha fo’i section ‘i he tohi ‘a Senesi’ ka ‘oku to e ‘i ai hono ‘uhinga kehe. Ko e Toledoth ko hono tefito (root) faka-Hepelú ko e yld ‘a ia ‘oku felāve’i ia pea mo e fānau’i (birth). Pea ‘oku to e ‘uhinga pē ia foki ki he faka’ilonga ‘o e mo’ui (survival) mo e hokohoko atu ‘o e palani ‘a e ‘Otua’ ki he’ene fakatupu’ (creation) neongo ai ‘a e maumau kuo hoko tu’unga ‘i he faiangahala ‘a e tangata’.

Ko e ‘uluaki toledoth formula ‘oku ‘asi ‘ia Senesi’ ‘oku hā ia ‘ia Senesi 2:4: “Ko e tohi eni ‘o e hako ‘o langi mo mamani’, ‘o kamata mei hono fakatupu…”. Ko e toenga leva ‘o e fo’i sections ‘e hongofulu koee ‘oku nau felāve’i kinautolu mo e tangata takitaha hangee ko ‘Atama, Noa, Semi etc. i.e. “Ko e tohi to’utangata eni ‘o e hako ‘o ‘Atama’…” etc.

Ko e kakano eni ‘o e Tohi ‘a Senesi:

  1. Motua’i Hisitōlia (Primeval History)

Senesi 1:1-2:4a – Fakatupu’ (creation) – Talanoa ki he fakatupu’ – ie. ngaahi langi’ mo mamani.

Senesi 2:4b-4:26 – ‘Iteni pea mo e tō ‘a e tangata’.

Senesi 5:1-32 – Kau Pēteliake’ kimu’a ‘i he Lōmaki’.

Senesi 5:1 – Ko e tohi to’utangata ‘o e hako ‘o ‘Atama’.

Senesi 6:1-11:9 – Ko e Lōvai’ mo hono ngaahi ha’aha’a.

Senesi 10:1 – Ko e hako ‘o Noa’.

Senesi 6:9 – Ko e hako ‘o Noa’ pea mo e Lōvai’.

Senesi 11:10-26 – Ko e kau Pēteliaké hili ‘a e Lōmaki’.

Senesi 11:10 – Ko e hako ‘o Semi’.

  1. Hisitōlia ‘o e kau Pēteliaké (Patriarchal History).

Senesi 11:27-25:18 – ‘Epalahame mo hono famili’.

Senesi 11:27 – Tela mo hono famili’ (‘Epalahame).

Senesi 25:12 – Isime’eli mo hono hako’.

Senesi 29:19-37:1 – Sekope mo hono famili’.

Senesi 25:19 – ‘Aisake mo hono famili’. (Sekope mo ‘Esau).

Senesi 37:2-50:26 – Siosifa mo hono fanga tokoua.

Senesi 36:1,9 – ‘Esau pea mo hono hako’.

Senesi 37:2 – Sekope mo hono famili’ (Siosifa mo hono fanga tokoua’).

Ko e Taumu’a mo e Fekau ‘o e Tohi Senesí

Ko e taumu’a ‘o e tohi Senesi’ ko ‘ene fakamatala ki he founga pea mo e ‘uhinga ‘o hono fili ‘e he ‘Otua’ (Yahweh) ‘a ‘Epalahame mo hono famili’ pea ne fokotu’u ha’ane kovinānite mo kinautolu. Ko e kovinānite ‘a ‘Epalahame mo e ‘Otuá, ko e kau ia he konga mahu’inga taha ‘o e theology ‘a e kakai ‘Isilelí pea ‘oku mahu’inga ‘a e kovinānité ki he’enau identity fekau’aki mo kinautolú.

‘Oku hoko atu ‘a e Tohi Senesí ki he talanoa ‘o e anga hono fokotu’u ‘e he ‘Otuá ‘ene kovinānite mo ‘Epalahamé pea mo e ngaahi fakafaingata’a’ia na’e fehangahangai mo e kovinānite ko ‘ení. Pea ‘oku tau ako mei he talanoa ‘ia Senesí ‘a e iku ‘a e kakai ‘Isilelí ki ‘Isipité pea mo hono fakatau’atāina kinautolu ‘e he ‘Otuá he’enau nofo pōpula ‘i ‘Isipité.

‘Oku ‘i ai ‘a e ngaahi tafa’aki kehekehe ‘o e fekau ‘o Senesí. ‘Uluakí, ‘oku tau ako meia Senesi fekau’aki mo e ‘Otua ‘o ‘Isilelí (Yahweh), ko IA ‘a e ‘Otua Mafimafi mo Aoniu ‘a ia na’a ne ngaohi ‘a e mamani ko ‘ení ‘o Ne fakataumu’a ia ke nofo mo mo’ui ai ‘a e tangatá.

Ko e fa’ahinga fa’unga tatau eni mo e theology ‘a Mesopotemiá. ‘I he ancient world, na’a nau tui ko e existence ‘o ha fa’ahinga me’a ko e ‘uhingá he ‘oku ‘osi ‘i ai hono taumu’a ‘i he ‘univeesi (cosmos) ko ‘ení. Na’a nau tui ko e me’a fakatupu kotoa pē ‘oku ‘osi ‘i ai ‘ene ngāue pe ko hono ngafa ke fakahoko ‘i he univeesi ko ‘ení. Hangee ko ‘ení na’e tui ‘a Mesopotemia, na’e fa’u ‘a e mahiná (moon) koe’uhí he ‘oku ‘i ai ‘ene ngāue/fatongia pau ke ne fakahoko ‘i he fokotu’utu’u ‘o e ‘univeesí (cosmos). Pea ‘oku ‘i ai leva ‘a e felāve’i ‘a e ngāue ‘a e māhiná mo e ‘otua ‘o e māhiná (moon god), pea ko ia ai ‘oku ‘i ai leva ‘a e felāve’i vāofi hona tupu’angá (origin).

Pea ko e fa’ahinga fakakaukau tatau ia fekau’aki mo e fakatupú (creation) ‘i ‘Isilelí. Na’e tui ‘a ‘Isileli ko e me’a fakatupú ‘oku ‘osi ‘i ai honau fatongia pau kenau fakahoko ‘i he ‘univeesí. Kapau te tau sio kia Senesi vahe 1 veesi 14 ‘o lele hifo ai…’oku ‘asi ai ‘a e ngaahi fatongia ‘o e me’a fakatupu ‘a e ‘Otuá hangee ko e la’aa, māhiná mo e fetu’ú etc).

Ko e kehekehe ‘o e tui ‘a ‘Isilelí mo Mesopotemiá, he ‘oku tui ‘a Mesopotemia ki ha ngaahi ‘otua ‘oku nau tokanga’i ‘a e ngaahi fatongia kehekehe ‘o e me’a fakatupú ‘i he ‘univeesí. Ka ‘oku tui ‘a ‘Isileli ia ki he ‘Otua mo’ui pē ‘e taha (Yahweh) ‘a ia na’a ne ngaohi ‘a e ‘univeesí mo e me’a kotoa pē ‘oku ‘i he ‘univeesí. Pea ko e ‘Otua pē ko ia ‘e Tahá ‘oku ne pule aoniu ki he ngaahi ngafa kehekehe ‘o ‘ene me’a fakatupú ‘i he ‘univeesí. Pea ‘oku Ne ngaue’aki honau ngaahi fatongia kehekehe ‘i he ‘univeesí ke ne ‘omai ‘a e maaú (order) ki he ‘univeesí.

Toki hoko atu . . .



















































Be the first to comment on "Ko e Anga hono Hiki e Tohi ‘o Senesi’"

Leave a comment

Your email address will not be published.


*