Ko e Nima ‘o e ‘Otua′ ‘i ha Mo’ui ke taki ia ke ne A’usia hono Destiny – #1


Fa’u ‘e Linda Tu’ulakitau

Fakafeta’i mu’a he taulama hao ‘a e ‘Otua′ ‘oku Ne fai ma’a’etau mo’ui′ ‘o tau to e ‘inasi ai he ‘aho fakakoloa ko ‘eni′. Pea ‘oku ou ma’u ha loto fiefia mo’oni ke talitali ‘a koe ‘oku ke fa’a me’a mai ki he Peesi ‘a e GBG-Online Ministry′. ‘Oku ou talitali loto fiefia koe he ‘aho ni, pea ‘oku ou fakatauange pē ‘e hoko ‘a e ki’i vahevahe ko ‘eni mei he Folofola ‘a e ‘Otua′ ko ha tapuaki mo ha fakalotolahi kiate koe.

Folofola – Senesi 37 – Senesi 50.

Ko e talanoa ko ‘eni ‘o Siosifa′ ‘oku mahino ai ‘a e mã’olunga ‘o e levolo mo e poto’i taukei ‘a e tokotaha ‘oku ne fakamatala’i ‘a e talanoa ko ‘eni ‘o Siosifa′. (The story of Joseph reveals a high degree of craftsmanship by the narrator). ‘Oku ‘asi ‘a e talanoa ‘o Siosifa′ he ngaahi vahe fakamuimui (patriarchal section) ‘i he tohi Senesi′ (Senesi 37-Senesi 50).

Ko e talanoa koee ‘o ‘Epahalame, ‘Aisake mo Sekope′ ‘oku hoko ia ko ha puipuitu’a (background) ia ‘o e talanoa faka-hisitõlia faka-fãmili (family history) ‘o e talanoa ko ‘eni′. ‘Oku tupu ‘o fakautuutuange ‘a e complications he fo’i to’utangata ‘e tolu. Ko e tangata’eiki koee ‘a Siosifa′ – ‘a Sekope – na’a ne hanga ‘e ia ‘o kãkaã’i ‘a ‘ene tamai′ ‘a ‘Aisake ‘o tu’unga ai ‘ene ma’u ‘e ia ‘a e inheritance na’e tonu koee ke ma’u ‘e ‘Isoa ko e foha lahi′. Na’e hangē ‘eni ha fo’i hia ia ‘o e senituli′ (crime of the century). Ka ko e fo’i kākā (deception) koee na’e fai ‘e Sekope mo ‘ene fa’ee′ ki he’ene tamai′ ‘o makatu’unga ai ‘a e uesia ‘a e nofo melino mo ma’uma’uluta ‘a e famili′, ko ‘eni ia kuo to e hoko pē ‘a e fo’i palopalema tatau ia kia Sekope. Kuo ‘alu hake ‘ene fānau′ ‘o nau lohiaki’i pea nau kākāā’i ‘o fekau’aki mo hono foha na’e ‘ofa taha ai′ (his favourite son) – ‘a Siosifa. Ko e ‘ofa filifilimānako koee na’e fai ‘e Lepeka ki hono foha ko Sekope′, na’e to e totolo mai pē ‘a e fo’i ‘ofa filifilimānako (favouritism) ia ko ia′ meia Lepeka ‘o afuhia atu ai ‘a hono foha ko Sekope′.

 Ko e experience ‘a Siosifa he’ene nofo ‘i ‘api′ – na’e lelei (positive) pea to e kovi (negative). Na’a ne experience ‘a e ‘ofa mo’oni ‘ene tamai′ (the unconditional love of his father Jacob or Israel). Pehee ‘e he folofola′ na’e favour ‘e Sekope hono foha ko ‘eni′ ‘a Siosifa. Na’e ‘ofa taha pē ia ‘ia Siosifa ‘i hono fanga foha koee. Koe’uhi′ he ko hono foha ia ne fānau’i he’ene motu’a′. Pea ‘oku ou tui na’e ‘ofa taha pē ‘ia Siosifa′ koe’uhi′ he ko hono foha lahi ia mo Lesieli′, ‘a e uaifi koee na’e ‘ofa taha ai′ (his true love).

Ko ia ko e mo’ui ‘a Siosifa ‘i ‘api′ na’a ne ma’u ‘a e unconditional love mo e favour ‘ene tamai′. Pea ‘oku fakahāa’i ‘a e ‘ofa taha pe ‘ene tamai′ ‘iate ia′ mo ‘ene favour ia′ he hanga koee ‘e ‘Isileli ‘o ‘oange kia Siosifa ha’ane ki’i me’a’ofa ko e ki’i kofu pulepule. Na’e ‘ikai ke ne ‘oange ha coat pehee kotoa ki hono fanga foha′ kotoa, ngata pē ‘ia Siosifa. Pea ‘i he sio ki ai ‘ae fanga tokoua ‘o Siosifa′, na’a ne hanga ‘e ia ‘o to e fakakakaha (fuel) ange ‘enau ‘ita pea mo ‘enau loto meheka kia Siosifa′ koe’uhi′ ko ‘enau ‘ilo’i na’e ‘ofa taha pē ‘a ‘enau tamai′ ‘ia Siosifa ‘i ha toe taha he’ene fānau lalahi′.

Ka ko e fo’i ‘uhinga tefito ia ‘o e issue na’e hoko he famili ‘o Siosifa′ na’e fakatupunga pē ia he’enau tamai′ ‘e ‘Isileli pe ko Sekope. Ko e fo’i tenga koee ‘o e favouritism pe koe filifilimānako pe ko e ‘ofa fakatonutonu na’e fai ‘e Lepeka ki hono foha ko Sekope′ ‘ona kākaa’i ai ‘a ‘Aisake pea mo ‘Isoa′ ke mole ai ‘a e birthright ‘o ‘Esau′ kia Sekope′. Na’e hoko ‘eni koe’uhi′ he na’e ‘ofa taha pē ‘a Lepeka ia ‘ia Sekope. Pea ko e fo’i tenga ko ia ‘o e favouritism na’e mo’ui ia ‘i he loto ‘o Sekope′ pea ne carry mai ‘a e fo’i tenga ko ‘eni′ ki hono own family. ‘I he’ene nofo mali′, na’e ‘ofa taha pē ‘a Sekope ia ‘ia Lesieli he ko hono ‘ofa’anga mo’oni′ ia, kae faka’ofa ‘a Lia. Pea ‘i he’ene relationship pea mo ‘ene fanau′, na’e ‘ofa taha pē ‘a Sekope ia ‘ia Siosifa. Pea ko ‘ene fa’ahinga ‘ofa ko ia′ na’e ‘ikai ke ne toe fakapulipuliki ‘o makatu’unga ai ‘a e loto meheka mo e taaufehi’a ‘a hono fanga foha lalahi′ kia Siosifa′. ‘A ia ko hono fanga foha eni mo Lia pea mo e ongo kaunanga′.

Ko e taha ‘eni ha fa’ahinga palopalema ‘oku hoko ‘i he ngaahi famili ‘e ni’ihi koe’uhi′ ko e fakatupunga ‘e he matu’a′. ‘Oku hoko ‘etau favour ha tokotaha he’etau fanau′ ke ne fakatupunga ‘e ia ‘a e me’a ‘oku ui he kau palangi′ ko e sibling rivalry. ‘Oku ‘ikai leva ke melino ‘a e nofo ‘a e fanau′ koe’uhi′ ko ‘enau sio ‘oku ‘ofa’i ange pē ‘e he mātu’a′ ia ha fo’i tokotaha he fanau′ ‘o lakaange ia he toenga′.

Na’e toe hoko pē ‘a e anga ta’efakapotopoto pe ko e immaturity ‘a Siosifa′ ke ne fakatupunga ‘a e loto meheka moe taaufehi’a ‘i hono fanga tokoua′. ‘Oku tau tui na’e ‘ikai puli ‘ia Siosifa ia ‘a e taaufehi’a ki ai hono fanga brothers he ‘oku talamai ‘e he Folofola′ na’e ‘ikai pē kenau lea melino pe lea ‘ofa ki ai ha taimi. Pea ‘i he anga ‘eku fakakaukau atu′, kapau na’a ko au eni he’ikai keu fie ‘alu au ‘o vahevahe kianautolu ha’aku ngaahi misi faka’Otua koe’uhi′ he ‘oku ou ongo’i ‘oku nau fehi’a ‘ia au pea he’ikai ‘aupito kenau fie ongo mai ki he misi ‘oku ou vahevahe atu kanautolu′.

Ka ‘i he lack of wisdom koee ‘a Siosifa he fo’i tafa’aki ko ‘eni′, na’a ne vahevahe ‘ene misi faka-‘Otua′ ki ha kakai ‘oku ‘ikai kenau kau mo ia pea nau hanga ‘o fakafepaki’i. ‘Oku ‘ikai kenau poupou kiate ia neongo ko nautolu ko hono fanga tokoua – ko hono kakano mo toto mo’oni pē kinautolu! (They did not support Joseph eventhough they are his brothers, his own flesh and blood!). Na’e ‘ikai ‘aupito tali ‘e honau telinga′ pea mo honau loto′ kenau fanongo ki ha fa’ahinga me’a ‘oku kau lelei kia Siosifa. Koe’uhi′ he kuo ‘osi kele pē honau loto′ kiate ia koe’uhi′ ko e fa’ahinga me’a ‘oku sio faka’aho ki ai honau mata′ – ko Siosifa ‘oku ne ma’u ‘e ia ‘a e ngaahi lelei (benefits) kotoa pē ‘enau tamai′ he ko hono ‘ofa’anga′ ia. Pea ko e me’a ‘oku sio ki ai ‘a e mata′ ‘oku ne ‘ohifo ‘e ia ki he loto′, pea ko ‘ene maumau pē ‘a e loto′ pea ko ‘ene ‘osi ia ‘a e me’a kotoa. He na’e hoko ‘ene vahevahe kiate kinautolu ene misi′ ke toe fakautuutu ange ai ‘enau loto kovi mo tāufehi’a kia Siosifa′. He ‘oku nau mahino’i mei he’ene ongo misi′ ‘e ‘i ai e ‘aho ‘e hoko ai ‘a Siosifa ko ha pule kiate kinautolu pea tenau punou kiate ia ‘o a’u ki he’enau tamai′. Na’e toe fakautuutu ange ai ‘enau taaufehi’a kia Siosifa′ he ‘oku nau ongo’i ‘oku ‘ikai ke ngata pē ‘a e ma’u ‘e Siosifa ‘a e favour ‘enau tamai fakamāmani′, ka ‘oku ne toe ma’u ‘e ia ‘a e favour ‘a e Tamai Fakahēvani′.

‘A e mahu’inga ketau kole ki he Laumālie ‘o e ‘Otua′ ke Ne ‘omai ‘Ene poto faka’Otua′ kiate koe pea mo au keta ‘ilo ‘a e kakai totonu koee he’eta mo’ui′ keta vahevahe ki ai ‘eta ngaahi misi faka’Otua′ pea mo ‘eta ngaahi visone faka-‘Otua′ koe’uhi′ he ‘oku ‘ikai ko e tokotaha kotoa pē ia ‘oku ne poupou kiate koe (because not everyone supports you). ‘Oku ‘i ai e kakai he’ikai kenau poupou’i ‘enautolu koe ‘i ho’o visone′ pea moe taumu’a ‘a e ‘Eiki′ ki ho’o mo’ui′. ‘O a’u pē ia ki ho famili tonu′. ‘Io, ‘o a’u pē ki he kakai pe ko e lotofale tonu na’a ke tupu hake ai′. Even in our own family. Ka ‘oku mahu’inga keta kole ki he ‘Eiki′ ke ne ‘omai ‘ene poto faka-‘Otua′ keta lava ‘o ‘ilo hota Sionatane′, ‘a e tokotaha totonu ‘oku ‘omai ‘e he ‘Eiki′ ko ia te ne support koe, ‘e tu’u tafa’aki ‘iate koe, ‘e loyal kiate koe kae lava ke ke ‘alu ‘o a’usia ‘a e taumu’a moe kaveinga totonu ‘a e ‘Otua′ ki ho’o mo’ui′.

Toki hoko atu . . .

Be the first to comment on "Ko e Nima ‘o e ‘Otua′ ‘i ha Mo’ui ke taki ia ke ne A’usia hono Destiny – #1"

Leave a comment

This site uses Akismet to reduce spam. Learn how your comment data is processed.