Christ is All Sufficiency – Ko Kalaisi ‘a e Fe’unga’anga Kotoa pē


Fa’u ‘e Linda Tu’ulakitau

Fakafeta’i ki he ‘Eiki′ ‘i He’ene to e ‘omi ‘a e faingamālie ‘o e mo’ui′ ‘otau to e tu’uta ai ki he hiva’i mahina ‘o e ta’u ko eni.′ Pea ‘oku ta’etūkua ai pē ‘a e fakafe’iloaki fiefia atu mei he Peesi ‘a e GBG-Online Ministry pea mo e Folofola ke tau ma’u tokoni mei ai ‘i he ‘aho ni.′

Folofola – 2 Kolinito 3:5 & 6 – “’Oku ‘ikai ko ‘eku pehee ‘oku mau fe’unga ‘e kimautolu ke fakakaukau ha me’a fakaekimautolu pē, ka ko homau FE’UNGA’ANGA′ ‘oku mei he ‘Otuá pē, ‘a ia na’a Ne ngaohi kimautolu ke mau fe’unga mo homau lakanga′, ko e kau Talafekau ‘o e Fuakava Fo’ou′ ”.

Verse 5 – “Not that we are sufficient of ourselves to think anything as ourselves, but our SUFFICIENCY IS OF GOD. V.6 WHO ALSO have made us able Ministers of the New Testament”.

Kaveinga – Christ is All Sufficiency – Ko Kalaisi ‘a e Fe’unga’anga Kotoa pē.

‘I he mamani ‘o e matelie′, ‘oku hakule ‘a e fa’ahinga ‘o e tangata′ ki he me’a ko e fe’unga pe taau mo ha fa’ahinga lakanga pe tu’uga ma’olunga he pule’anga′, fonua′ pe siasi′ – pea ‘oku nau ‘alu ‘o ako ke ma’u ha poto fakaako ma’olunga ke nau ma’u ‘aki ‘a e ngaahi lakanga ko ia′. Fiema’u ‘e he ni’ihi ha pa’anga fe’unga ke tauhi ‘aki honau ngaahi famili′, fiema’u ‘e he to’utupu′ ha taha fe’unga ko hono uaifi pe husepaniti ko hono kaha’u.  Pea hoko ai ‘a e fiema’u ‘o e “FE’UNGA′” ko e me’a ke hālofia ki ai ‘a mamani. Pea a’u ai ki ha taimi kuo hū mai ‘a e fakakaukau ia ‘o e self-sufficiency, pe ko ‘eku lau pē ‘e au ‘a au kuo u ‘osi fe’unga au mo e tu’unga koē, kuo u ‘osi fe’unga ‘ānoa pē au hoku poto′ mo ‘eku taukei′ keu fakalele ‘a e me’a koē moē. Pea toki hū mai ‘a e laumālie ‘o e self-sufficiencey ‘o pule’i mo fakalele ‘a e fonua′, siasi,′ pe ko e famili.′

Pea koe hā ‘a e ola ‘e ma’u mei ai′? ‘Oku tau tui ko e movete! Koe’uhi′ he na’e ‘ikai kau ‘a Kalaisi KO E TAMA ‘OKU ‘A’ANA ‘A E FE’UNGA′ – HONO FAKAFE’UNGA′. Ko e kῑ (key) he lakanga.′ He ko ‘Ene fakafe’unga koe ki he lakanga′, ‘oku ha’u mo IA ‘Ene me’a fakafe’unga′ ‘o fa’oaki ‘iate koe ke fai’aki ho’o to’o fatongia ′– ‘a ia ko Hono Laumālie Mā’oni’oni.′ Ko e me’a fakamalava′ IA. Pea mo’oni ‘a e ‘Aposetolo′ he Folofola ko eni′ – ko homau Fe’unga’anga′, ko e ‘Otua′ pē, ‘a ia kuo Ne fakafe’unga kimautolu ki homau lakanga′. ‘Oku ou fie ‘ave hotau loto′ ke tau to e ‘ā’āvea ange ki he Fe’unga ‘Ānoa ‘a Sisu Kalaisi ma’atautolu ‘i he me’a kotoa pē – ‘i he matelie′, kae ‘amo’amo atu ‘i he me’a ‘a e laumālie′. Kapau te tau vakai – No other name for salvation – ‘Oku ‘ikai mo ha to e hingoa (Huafa) ki he Fakamo’ui′ – ka ko e Huafa pē ‘o Sisu Kalaisi′. (Ngāue 4:12) – “’Io, pea ‘oku ‘ikai ke tu’u ‘i ha taha kehe ‘a e Fakamo’ui′. He tala’ehai′ ‘oku ‘i ai mo ha Hingoa KEHE ‘i he lalo langi′ kuo fokotu’u ‘i he lotolotonga ‘o e kakai′ ‘a ia kuo tu’utu’uni ke nau MO’UI AI′ – v.10…ka ko e HUAFA PĒ ‘o SISU KALAISI ‘O NASALETI′, ‘a ia na’a mou kalusefaí – ka kuo fakotu’u IA ‘e he ‘Otua′ mei he pekia′”.

‘Io, ko e Huafa pē ‘o Sisu′ na’e fe’unga′, pea ‘oku fe’unga′, pea ‘e kei fe’unga ‘ānoa ‘o a’u ki he ta’engata pea ta’engata ‘a e tu’u AI ‘a e Fakamo’ui ‘o mamani′. Ui pea ke tautapa ki he Huafa ko IA′, ‘a e Huafa ‘o Sisu Kalaisi′ ka ke MO’UI! Mo’ui ‘i ho sino′, ‘atamai′ mo ho laumālie.′ Talamai ‘e Loma 10:13 – “He ‘ilonga ‘a ia ‘e tautapa ki he Huafa ‘o e ‘Eiki′ ‘e fakamo’ui”.

No other righteousness for acceptance – ‘Oku ‘ikai mo ha to e mā’oni’oni ke tali – Ka ko ‘eta tu’u pē ‘i he mā’oni’oní mei he’eta tui ki he ‘Eiki ko Sisu Kalaisi.′ Talamai ‘e Filipai 3:9 – “Pea ke ‘ilo au ‘oku ou ‘IATE IA, pea ‘oku ‘ikai te u ‘i ai mo au ‘eku mā’oni’oni ‘a’aku′, ‘a ia ‘oku fou mei he lao′ – ka ko ia ‘oku founga mei he tui kia Sisu Kalaisi ′– ‘io ko e MᾹ’ONI’ONI MEI HE ‘OTUA′ PEA TEFITO KI HE TUI′…”

‘Io, ko ‘eta tali ‘a Sisu Kalaisi ‘o ta tui pikitai ki AI′, pea ‘oku Ne ‘i loto ‘iate kitaua ‘o Ne fai hono fakamā’oni’oni’i kitauá. Pea ‘oku Ne fai hota fakafe’unga′ ki He’ene mā’oni’oni′ pea Ne tali (accept) ai kitaua, kuo ta fe’unga mo e fānau ‘o Hono Pule’anga′.

No other Lord for submission – ‘Oku ‘ikai mo ha to e ‘Otua kehe ke ke fakavaivai pe te ke tukulolo ki ai. Talamai ‘e 1 Kolinito 8:6 – “Ka kiate kitautolu, ‘oku TAHA pē ‘a e ‘Otua ko e TAMAI′, ‘a ia ‘oku mei AI ‘a e me’a kotoa pē, pea ko kitautolu Ma’ana – pea ‘oku TAHA PÉ ‘A E ‘EIKI KO SISU KALAISI′, ‘a ia ‘oku fou mai ‘iate IA ‘a e me’a kotoa – pea ‘oku FOU ‘IATE IA ‘akitautolu. ‘Io, ‘oku TAHA pē ‘a e ‘Otua ko e Tamai′, pea TAHA pē mo Hono ‘ALO′ ko hotau ‘EIKI ko SISU KALAISI′ ‘a ia ‘oku taau pea fe’unga ‘ā’anoa mo IA, ke ta mātu’aki ma’u ha loto fakavaivai ‘o fakaongo kakato kiate IA, ko hota ‘EIKI mo hota TU’I mo FAKAMO’UI. Ko IA ‘oku ‘A’ana ‘a e fakafe’unga′ mo fakataau ‘a e me’a kotoa pē Ma’ana ke Ne hā langilangi’ia ai.

Si’i kaungā fononga, ‘oku ke fakatokanga’i ‘a e Tokotaha ‘oku Ha’ana ‘a e fakafe’unga′? Ko Sisu Kalaisi ho Fe’unga’anga′ mo hoku Fe’unga’angá. Lau ‘e mamani ‘oku ‘ikai te ke fe’unga mo e lakanga′, ‘oku si’i ho ivi′, ‘oku ‘ikai ha’o pa’anga fe’unga, ‘oku ‘ikai te ke poto fe’unga, ‘oku ta’efe’unga ho’o fānau′, ‘oku ta’efe’unga ho ki’i famili′ – ka ‘oku fakaafe’i atu koe ‘e FE’UNGA he ‘aho ni – ko Sisu Kalaisi IA. Ha’u kiate AU kau ‘oatu ho’o fiema’u′. Ko AU ‘oku OU fai ho fakafe’unga′ he me’a kotoa pē. Pea mo’oni ‘a e Punake′ ‘a DR Moulitoni.

‘Ei Mafimafi – tali ‘emau hū

‘Eiki KOE ‘o natula

Ko SATAI ai pē KOE

FE’UNGA mo AONIU

‘Io, ko Kalaisi IA – He is our ALL Sufficiency. Ko IA hotau Fakafe’unga’anga kotoa pē. Tali IA ki ho loto′, ka Ne hū atu ‘o fai ho Fakataau′ mo ho Fakafe’unga′. HE KO HO FE’UNGA’ANGA′ PĒ IA.

‘Ofa atu ki he Tonga kotoa.



















































Be the first to comment on "Christ is All Sufficiency – Ko Kalaisi ‘a e Fe’unga’anga Kotoa pē"

Leave a comment

Your email address will not be published.


*