‘I HE TAIMI NI′ KO E KAKAI ‘A E ‘OTUA′


NOW THE PEOPLE OF GOD

Fa’u ‘e Mosiana Fisi’ipeau

Folofola: 1 Pita 2:9-10 – “Ka ko kimoutolu ko e ha’a fili, ko e tu’unga Taula’eiki Fakatu’i, ko e kakai tapu, ko e fa’ahinga ‘oku ma’ane me’a tonu koe’uhiā ke mou ongoongoa atu ‘a e ngaahi lelei ‘o ‘Ene ‘Afio′, ‘a ia na’a Ne ui mai kimoutolu mei he po’uli′ ki he maama fakaofo ‘A’ana′. (10) ‘A kimoutolu ‘a ia ko e ‘ata’i kakai ‘i mu’a, ka ko eni ko e kakai ‘a e ‘Otua′, ko e kakai na’e ‘ikai fai ha meesi ki ai – ka ko eni kuo ma’u meesi.”

Fakafe’iloaki fiefia ‘aki kiate koe kotoa pē ‘i he pongipongί ni mei he GBG-Online Ministry ke ta ma’u breakfast fakataha mei he Folofola ‘a e ‘Otua′, ‘o hangē ko hono fanguna ‘e he ‘angelo′ ‘a e Palōfita ko ‘Ilaisiā, “Tu’u hake ‘o kai, he ‘oku lōloa fau ‘a e hala′ kiate koe”. ‘Oku taha pē ‘a e me’atokoni ke fafanga ‘aki ‘a ‘eta hālofia fakalaumālie′ ka ko e FOLOFOLA ‘A E ‘OTUA′.

‘I he Tohi ‘a Teutalōnome′ 7:6 – “He ko e kakai koe ‘oku tapu kia Sihova ko ho ‘Otua′, kuo FILI KOE ‘e Sihova ko ho ‘Otua′ ke mou hoko ko ‘Ene koloa kanokato ‘i he kakai kotoa ‘oku ‘i he funga ‘o māmani′. Ko e Tohi ‘a Teutalōnome′ ko e to e lau ia ‘e Mosese ‘a e ngaahi lao mo e tu’utu’uni ‘a Sihova′ ke fakamanatu ki he kakai′ ‘i he fangafanga hū ‘a ‘enau fononga′ ki he fonua ‘o e tala’ofa′ pea kimu’a ke ne ‘alu hake ki he mo’unga ko Nipo′ ‘o ne pekia ai pē ‘o fakatatau ki he tu’utu’uni ‘a Sihova kiate ia′.

‘I he kotoa ‘o e vahe 7 ‘o Teutalōnome′ ‘a e fakamahino ‘e Sihova ‘a e tu’unga ‘o ‘Isileli′ kiate IA′ – “Kuo Ne fili ko ‘Ene kakai tapu, ko ‘Ene koloa kanokato ‘i he ngaahi kakai kotoa pē ‘o māmani′”. Koe’uhί ke ne fakaai ma’u ai pē, ma’u ai pē ‘a ‘Ene palōmesi′ ki he’enau ngaahi kui′ – kia ‘Epalahame, ‘Aisake mo Sekope. (Senesi 12:2&3).

Ka ‘i he Folofola tefito ‘o e ‘ahό ni′, ko e taimi kuo fai ai hota fakatupu fo’ou′ (new birth) ‘e he Laumālie Mā’oni’oni′, fakafo’ou ‘i he’eta tui′ ‘i he fanongo ki he Folofola ‘a e ‘Otua′ – (1 Pita 1:23) – “He kuo fakatupu fo’ou kimoutolu ‘o ‘ikai ‘aki ‘a e tenga ‘auha, kae ‘aki ‘a e tenga ta’e’auha, fou ‘i he Folofola ‘a e ‘Otua′ ‘oku MO’UI mo TOLONGA”. Kuo fānau’ifo’ou kitaua, kuo ta ma’u hota fakamo’ui′ (salvation). Kuo ‘otomētiki , funga ‘i he fai meesi mo e kelesi ‘ufihia ‘a e ‘Otua′, ‘a ‘eta hoko ko ‘Ene kakai fili kitaua (His chosen people) ‘oku Ne fakatāpui kitaua ko ‘Ene kau Taula’eiki Fakatu’i (His Royal Priesthood), ko ‘Ene Kakai Tapu (His Holy Nation), ko ‘Ene me’a tonu (His own people) ‘a koe mo au. Ka ‘ai ke to e mahino ange ‘aupito′ – ko ‘Ene fo’i Koloa Kanokato ‘i He’ene lau faka-fo’i-me’a′, pe fakafo’ituitui′ (one by one) – ko koe pē, ko au pē!

Hoko atu ‘eta Folofola tefito′, ‘a ia kuo Ne ui mai kitaua mei he po’uli′ ke ta hiki fu’u mai ki he maama fakaofo ‘a e ‘Otua′. Mo’oni ‘a Kolose 1:13&14 – “’A ‘Ene ‘Afio′ ‘a ia na’a Ne hamusi kitautolu mei he pule ‘a Po’uli′ (‘a Setane′) mo Ne hiki kitautolu ki he Puleanga ‘o Hono ‘Alo ‘ofa’anga′. Pea ‘i he’etau tu’u ‘iate IA′, ‘oku tau ma’u ‘a e huhu’i′ ko e fakamolemole ‘o ‘etau ngaahi angahala′.” Fakafeta’i kuo fai hono veteange kitaua ‘e Kalaisi mei he’eta pōpula ki hono pule’i kitaua ‘e Setane mo e pule’anga ‘o e fakapo’uli′ – ka Ne ‘omi kitaua ke ta ‘ā’eva tau’atāina, fiefia ‘i he ‘alunga ‘o e Pule’anga ‘o e Maama′ – Ko e Pule’anga ‘o Hono ‘Alo ‘Ofa’anga′ ko Sisu Kalaisi – Ko e La’ā ‘o e Angatonu′, Ko e Maama Mo’onia′, ‘io, Ko e Fetu’ungingila IA ‘o e Pongipongi′. Pea toki mo’oni ‘a e faka’ānaua ‘a e Punake ko Toketā Moulitoni′:

La’ā he Angatonu′

Hā, ‘o huluhulu homau hala′

Hopo ‘i homau laumālie′

Mole ai ‘a e kovi fulipē!

V:10 – “’A kimoutolu ‘a ia ko e ‘ata’i kakai ‘i mu’a, ka ko eni ko e kakai ‘a e ‘Otua′ – ko e kakai na’e ‘ikai fai ha meesi ki ai – ka ko eni kuo MA’U MEESI”.

Haleluiā! ‘Oku hanga ‘e he ‘Aposetolo′ ‘o ue’i hotau loto′ mo hotau mata fakalaumālie′ ketau to e ki’i sio loto ki hotau kuohili′ mo e taimi na’e kei pule’i ai kitaua ‘e he fu’u pule ‘o pule’anga ‘o e po’uli′ (Setane). Talamai he fakatonu ‘a Molitoni′ – “Na’a ta hoko ko e ‘ata’i kakai”. Ko e kakai na’e ‘ikai ha ta mahu’inga (no value), na’e ‘ikai ha ta pāuni, ‘ikai ha’ata taau ke fai ki ai ha tokangaekina, me’anoa pē, hangē pē ha ‘ata′ (like a shadow), hā pē mo mole ngaahi to’utangata′, hangē pē ha lou’akau′ (leaves) ‘etau ngangana′. ‘Io, ko e ‘ata’i kakai ‘i mu’a, ka ko eni kuo tau hoko ko e kakai ‘a e ‘Otua′ – kuo fakafoki kitautolu ‘e he ‘Otua′ ketau hoko ko ‘Ene kakai ‘aki ‘Ene fekau mai Hono ‘Alo-tofu-pē-Taha′ ‘a Kalaisi ke Ne ha’u ‘o PEKIA he kolosi′ ke Ne to’o ‘etau mala’ia′ ‘o fua ‘iate IA – ka ta hoko ā ko ‘Ene fānau, ko e kakai ‘a e ‘Otua′.

“Ko e kakai na’e ‘ikai fai ha meesi ki ai – ka ko eni kuo tau ma’u meesi”. Fakafeta’i! Kuo tau ma’u ‘a e meesi ‘a e ‘Otua′ ‘ia Kalaisi ma’atautolu ‘i he kolosi′. Pea kuo ‘atā pea kuo apaapangofua ki he kakai kotoa pē ‘ia Kalaisi – ke tau foki kotoa pē ki he ‘Otua′ ‘o fakalelei mo IA – he kuo ‘osi fai ‘e Kalaisi ma’atautolu hotau fakalelei mo e ‘Otua′. Pea mo’oni ‘a ‘Efeso 2:13 – “Ka ‘i onopooni ko kimoutolu na’e mama’o mu’a′ (na’e lau ko e ‘ata’i kakai ‘i mu’a, ko e kau ta’e-ha-‘amanaki lelei, ko e kau taka he ‘unveesi ta’ema’u ‘Otua) ka kuo fai homou fakaofi′ ‘aki ‘a e Ta’ata’a ‘o Kalaisi′”. (emphasis mine).

Ko e ui ‘a e Vahevahe he Folofola′ ‘o e pongipongί ni′ – koe hā ‘a e tu’unga ‘oku ke ‘i ai′? Foki mai ki he ‘Otua′ ‘ia Kalaisi mo e Huhu’i Ta’engata kuo fai ma’a māmani he kolosi′ ‘o tali IA ki ho loto′ ka ke mo’ui. Kuo Ne ‘osi to’o hota identity ko e ‘ata’i kakai ‘i mu’a′, mo ‘eta ta’ema’u ha meesi ‘aē ‘oku kākāa’i ‘aki kitaua ‘e he tevolo′ he ‘aho kotoa pē. We are the people of God, a people of destiny, the people of the Kingdom of His Beloved Son – our Lord Jesus Christ – ko e Tu’i ‘o e ngaahi tu’i′ mo e ‘Eiki ‘o e ngaahi ‘eiki kotoa pē ‘o māmani′.

Fakamanatu atu ‘a e ‘uhinga ‘o ‘Ene fili kitaua ko ‘Ene kakai′, pea Ne fakatapu’i kitaua ko ‘Ene kau Taula’eiki Fakatu’i, ko ‘Ene Kakai Tapu, ko ‘Ene me’a tonu ‘a koe mo au – koe’uhί ke ta ongoongoa atu ‘a e ngaahi lelei ‘a ‘Ene ‘Afio′, talaki pea ta fanongonongo ‘a e fai fakamo’ui kuo Ne fai ma’au mo au he ngaahi ‘aho ni′. Talakai ē Kosipeli′ ki ha taha pē. Fanongonongo ke ‘ilo ‘e he kakai kotoa pē ‘a e fakamo’ui ‘a hotau ‘Otua′ kuo fai′, pea ‘oku fai′, pea ‘e fai ki he hako’i tangata′. Manatu’i – ko e koloa kanokato koe ‘a e ‘Otua.′ ‘Okú Ne fa’o koe ko e kanoloto ‘o ‘Ene Kato′ (Hono Loto′) ko ‘Ene me’a tonu koe!

‘Ofa atu ki he Tonga kotoa~

Sponsor Advertisement

Be the first to comment on "‘I HE TAIMI NI′ KO E KAKAI ‘A E ‘OTUA′"

Leave a comment

This site uses Akismet to reduce spam. Learn how your comment data is processed.