Kaveinga′ – How shall man be just with God? ‘E tonuhia fēfē ha tangata ‘i he ‘ao ‘o e ‘Otua′?


Fa’u ‘e Linda Tu’ulakitau

‘Etita ki he Lea Faka-Tonga – Mosiana Fisi’ipeau

Folofola– Siope 9:2 – “Seuke, ‘oku ou ‘ilo ‘oku pehē, kae tonuhia fēfē ha tangata me’a vaivai ‘i he fai mo ‘Ela′?

V.2 – I know it is so of a truth, But HOW SHOULD MAN BE JUST WITH GOD?”

‘Oku ou fakafeta’i ki he ‘Eiki′ ‘i He’ene to e faka’atā mai ‘a e faingamālie ko ‘eni′, ke tau to e fetaulakitu’u mai ai ki he ki’i Peesi ko ‘eni′ ‘oku ‘iloa ko e GBG-Online Ministry. Pea ‘oku ou fakafe’iloaki fiefia atu ai pē ‘aki ‘a e fakafe’iloaki ‘a e ‘Aposetolo′ – “Ha tahā ke fakamalō’ia ‘a e ‘Otua mo Tamai hotau ‘Eiki ko Sisu Kalaisi′ – ko e Tamai fai manava’ofa ‘a ia kuo Ne fai hotau tāpuēkina′ ‘ia Sisu Kalaisi ‘o tau anuanu ai ‘i he ngaahi tāpuaki kehekehe mei he Laumālie′”. Mālō mu’a ‘etau toe ma’u ‘a e ‘aho ni!

‘Oku ou kei ha’u pē mo ha fehu’i mei he Folofola ‘a e ‘Otua′ ke ta vahevahe ai he ‘aho ni.

Si’i kaungā fononga, ko e fehu’i ‘o e ‘aho ko ‘eni′, ko e fai ia ‘e he tangata angatonu ko eni ko Siope′, ‘o makatu’unga ‘i hono valoki’i mo hono tukuaki’i mātu’aki fefeka ia ‘e hono kaungāme’a ko Pilitati′, ‘a ia ‘oku hā ‘i he vahe 8:3… ‘o hokohoko atu ai. ‘Oku ou tui na’e ‘osi faingofua fe’unga kia Siope ke ne fakafepaki’i fefeka ‘a e tukuaki’i mamafa, mo e ongo vevela ‘o e valoki ko ‘eni′ – ka na’a ne tali lelei ‘a e valoki′. Ko ‘ene tui′ ko e mo’oni′ – ‘Oku ‘ikai piko’i ‘e he ‘Otua′ (‘Ela) ‘Ene fakamaau′. Pe piko’i ‘e Satai ‘a e totonu′. Ko e ‘uhinga ia ‘o e tali ‘a Siope ‘i he veesi 9:2′ – Seuke, ‘oku ou ‘ilo ko e mo’oni′ ‘oku pehē . I know it is so of a truth. Veesi 8:3 – He’ikai piko’i ‘e he ‘Ene fakamaau′. Pe piko’i ‘e Satai ‘a e totonu′…veesi 9:2 – Kae tonuhia fēfē ha tangata ‘i he fai mo ‘Ela′?…but HOW SHOULD MAN BE JUST WITH GOD?

Kaungā fononga, kuo ta mateuteu ki ha ngaahi valoki mo ha ngaahi tukuaki fefeka mo ha ngaahi fakaanga ta’efaka’esia na’e fai, pea ‘oku fai, pea ‘e fai kiate kitaua ‘e ha kakai ‘oku ‘ao’oafia honau loto′ ‘i he ngāue ‘a e tevolo′? Ko ‘enau siofi mai ha ngaahi palopalema ‘oku hoko ‘i hota lotofale′, ‘i he’eta fānau′, ‘i he’eta ngāue′…’i he’eta nofo mali′, ‘i ho’o mahamahaki′…’i ho’o ako′, ‘i he saisi′, mo e hā fua hā fua…’a e ngaahi tukuaki mo e fakaanga′? Taimi lahi, tō ‘etau kaāti′. Ha’u e ‘ita′ mo e fakapo’uli′, homo atu ē ngaahi lea ta’efe’unga ko hono tali. Ka kia Siope, na’e ‘ikai ha’ane tali, pe fakamanamana, ka na’a ne tui kia Sihova ‘oku ‘ikai piko’i ‘Ene fakamaau′, pea ‘oku ‘ikai piko’i ‘a ‘Ene faitotonu′. He ko Sihova pē na’a Ne foaki mai ‘a e me’a kotoa pē ‘oku ne ‘inasi ai′, ‘a e fānau′, fale′ mo e me’a kotoa pē, pea ka kuo Ne to e to’o atu – KE KEI MĀLŌ’IA AI PÉ ‘A E HUAFA ‘O SIHOVA′ (Siope 1:21 – emphasize mine).

Pea toki hanga ‘e Siope (he vahe 9) ‘o toki hiki ‘a hono praise mo hono fakahikihiki’i mo fakafeta’ia ‘a e ‘Otua′, ‘o Ne ‘a’au ‘a e lahi faufaua, fakaofo mo e ta’emahakulea ‘a hono ‘Otua′. Ko ‘ene tali ia ki he ngaahi valoki mo e fakaanga mo e tukuaki ‘oku fai kiate ia′.

‘Oku tau ako heni ‘e kaungā fononga ‘i he tangata angatonu ko eni′ – taimi ‘oku ha’u ai ‘a e tukuaki′, valoki′, mo e fakatanga′ – ko e taimi ia ‘etau hanga ‘o praise ‘a e ‘Otua′ – hiki Ia ke mā’olunga taha , fakahikihiki’i Ia ki he lahi taha te tau ala lava′ – kae punakaki atu ‘a e ‘ita′ mo e fakapo’uli′ ‘a ia ‘e humaki mai ‘e he tevolo′ ke faka’auha’aki (ruin) kitautolu′.

Kapau te tau vakai ki he fehu’i ‘a e tokotaha mā’oni’oni ko eni′. ‘E tonuhia fēfē ha tangata ‘i he ‘ao ‘o e ‘Otua′? ‘E lava fēfē ‘e ha tangata ke ne ngaohi ke lelei pe fakalelei ‘ene tafa’aki mo e ‘Otua′? ‘I he vakai ‘a Siope′ – He’ikai ha kakano mo’ui ia ‘e tonuhia ‘i he ‘ao ‘o e ‘Otua.′ Talamai ‘e he lotu ‘a Tevita′ he’ene Saame 143:2 – ‘Oua na’a ke fakamāu’i ho’o tamaio’eiki ko kita′ – he ‘i Ho ‘Ao′, ‘oku ‘ikai ha taha mo’ui te ne tonuhia.

‘I he lau ‘a e tohi ‘a Tangata Malanga′ pe ko Kohēleti′ 7:20 – ‘oku ne talamai – Ko e me’a ki he tangata′, ‘oku ‘ikai ha mā’oni’oni ‘i māmani, ‘a ia ‘oku ne fai lelei, ‘o ‘ikai angahala. ‘Io, fakamo’oni ki ai ‘a Loma 3:10 – Pea ‘oku hoa mo ia ‘a e me’a kuo tohi′, ‘oku ‘ikai ‘aupito ha faitotonu, ‘oku ‘ikai ‘aupito ha taha. As it is written, there is none righteous, NO, NOT ONE.

‘Oku ‘ikai ko e kau fanongo ki he Lao′ ‘oku fakatonuhia’i ‘i he ‘ao ‘o e ‘Otua′ – ka ko e kau fai ki he Lao′ (Folofola ‘a e ‘Otua′). Talamai ‘ia Loma 2:13 – He tala’ehai′ ko e kau fanongo lao′ ia oku tonuhia ‘i he ‘Ao ‘o e ‘Otua′, ka ko e kau fai ki he Lao′, ko kinautolu pē ‘e fakatonuhia′. Not the hearers of the Law are just before God but doers of the Law shall be justified. ‘Io, he’ikai lava he’eta ngaahi ngāue′ ke ne fakatonuhia kitaua ‘i he ‘Ao ‘o e ‘Otua.′ Talamai ‘e Loma 3:20 – Koe’uhiā ko e me’a ki he ngaahi ngāue faka-Lao′, ‘e TU’U MOLA ai ‘a e kakai kotoa pē ‘i Hono ‘Ao′, ‘o ‘ikai ha nau FAKATONUHIA MEI AI, he ko e me’a ‘oku fou mei he Lao′, ko e FAKA’ILO ANGAHALA PÉ.

Si’i kaungā fononga Pilikimi, ‘oku ta hiki tuē mo pā mavava, pea ‘oku ta haleluiā mo hosana, he ko e me’a na’e fehu’ia ‘e he Pēteliake′ ‘i hono kuonga′, kuo solova pea veteki, pea ‘omai hangatonu ‘a e tali totonu ‘e he ‘Otua′ mei He’ene Folofola′ – ke ‘oua na’a ta to e veiveiua mo tāla’a – he KUO ‘OSI FAI HOTA FAKATONUHIA′. OUR JUSTIFICATION HAD BEEN DONE.

1. Christ died, the JUST for the UNJUST. Na’e pekia ‘a Kalaisi, ko e ANGATONU′ (mā’oni’oni) ma’ae TA’EANGATONU′ (angahala). Talamai ‘ia 1 Pita 3:18 – He ko Kalaisi foki na’a Ne mo’ua mamahi tu’otaha koe’uhí ko e ngaahi angahala′ – ko e ANGATONU ma’ae TA’EANGATONU′, koe’uhí KE NE FAKAOFIOFI kitautolu ki he ‘Otua′ – pea na’e tamate’i ‘i Hono anga kakano′, kae fakamo’ui hake ‘i Hono anga laumālie′.

‘Io, ‘i he kuonga ‘o e ‘oatu feilaulau ‘i he Temipale′, na’e hū tu’o taha ‘a e Taula’eiki′ ki he Potu Toputapu ‘aupito (Holy of Holies) ‘o e Temipale′ tu’o taha ‘i he ta’u kotoa pē ‘aki ‘a e toto ‘o e pulu′ pe ko e kosi,′ ko e feilaulau angahala – koe’uhí ko ‘ene angahala ‘a’ana′ (Taula’eiki′) mo e angahala ‘a e kakai.′

Ka ‘i he hoko mai ‘a Kalaisi′, talamai ‘e he Folofola′ – na’a Ne hū ai ke tā tu’otaha ki he Potu Toputapu na, ‘O NE LAVA’I AI HA HUHU’I TA’ENGATA. Kuo ‘osi fai ‘a hota fakatonuhia′ ‘aki ‘a e feilaulau aofangatuku tā tu’o taha kuo fai ‘e Sisu Kalaisi ma’ataua he kolosi.′ Hoko Hono Ta’ata’a ne lilingi he KOLOSI′, ko e fakahoifu’anga ia ‘o e TAMAI′ kia kitaua′. He ko e fofonga mai ‘a e ‘Otua′ ko e Tamai kia koe mo au, ko ‘Ene sio mai ‘aki pē ‘a e Ta’ata’a ‘o Hono ‘Alo′, pe kuo ‘osi maaka ‘aki kitaua pe ‘ikai? Kapau kuo ‘osi maaka ‘aki kitaua ‘a e Ta’ata’a ‘o Kalaisi′ – ko e mahino ia ‘a ‘eta ‘osi tali ‘a Kalaisi ki he’eta mo’ui′. Pea kuo hoko ‘a e feilaulau na’a Ne fai ma’ataua he Kolosi′ ko ‘eta mata’ikoloa ‘oku ta tauhi ki ai ‘i he tui mo e loto hounga’ia mo’oni – he fu’u ‘ofa hulu fau kuo Ne fai ma’ataua.′ ‘Io, kuo ‘osi lῑ’oa mai ‘a Langi. Pea mo’oni ‘a e Folofola′ ‘ia Loma 8:32 – Seuke, kapau na’e ‘ikai mamae ‘e He’ene ‘Afio′ (Tamai′) ki Hono ‘Alo Mo’oni′, ka ka tukuange Ia ke pekia koe’uhí ko kitautolu fulipē, pea fēfē ai Ha’ane MAMAE KE FOAKI MAI MO IA ‘A E ME’A KOTOA PÉ (emphasize mine). Haleluiā! Mo’oni e mo’oni!

Ko e kakai mamae mo ta’efie homo kitautolu. Hau kitautolu he nima ma’u′. Ka ha’u ha taha ‘o kole ha’ate me’a mahu’inga, ‘oku te lohiaki’i mo angakovi’i ko ‘ete ta’efie homo ‘ete me’a mahu’inga ko ia′. Ka ki he ‘Otua′ na’e ‘ikai Te Ne mamae’i Hono ‘Alo pele ‘OFA’ANGA′ – ka Ne tukuange ke Ne hifo mai ‘i hota tatau′, ko e kakano angahala’ia koe’uhí ke ne huhu’i ‘etau hia′. Pea mo’oni ‘a e Punake′ – “Na’a Ne tō he tau′, ke hao ‘a e tangata′, pea faingofua ho’o mate′ ‘au, ‘i ha’amau tō ki mala”.

2. Believers are justified by His Blood – Kuo ‘osi fakatonuhia’i ‘a e kakai Tui′ ‘aki Hono Ta’ata’a′ (Loma 5:9-10).

v.9 – Pea kapau ko ia, pea ka kuo tau ma’u ‘eni ‘a e fakatonuhia′ ‘i Hono Ta’ata’a′, pea huanoa hotau FAKAMO’UI′ ka fai ‘IATE IA mei he houhau′.

v.10 – He kapau na’e fakalelei ‘a e ‘Otua′ kiate kitautolu ‘i he pekia ‘a Hono ‘Alo′, lolotonga ‘Ene fili’aki kitautolu′, pea huanoa hotau fakamo’ui′ ka fai ‘i he MO’UI ‘A’Ana′, ka kuo Ne hoifua mai.

‘Io, ko ia kotoa pē ‘oku tui ki he ‘Eiki ko Sisu Kalaisi′, kuo ‘osi fakatonuhia’i. Talamai ‘e Ngāue 13:39 – Pea ko e ngaahi angahala na’e ‘ikai lava homou fakatonuhia mei ai′ ‘i he fai’aki ‘a e Lao ‘a Mosese′, ka ‘i he Tokotaha ko eni′ (Sisu) – ‘ilonga ‘a ia ‘oku tui kiate IA′, ‘oku ne ma’u ‘a e fakatonuhia mei he ngaahi me’a ko ia′ kotoa pē.

‘I he Lao ‘a Mosese′, na’e ‘i ai ‘a e ngaahi lao ko hono tautea′ ko e mate, ‘ikai to e ‘i ai ha meesi ki ai ka ko e mate pē. Kae hoko mai ‘a Sisu Kalaisi mo e KELESI′ mo e MO’ONI′. Pea mo’oni ‘a e Folofola′ ‘ia Sione 1:17 – He na’e foua ‘a e Lao′ ‘ia Mosese, ko e me’a tuku mai, ka ka FOU ‘A E KELESI′ MO E MO’ONI′ ‘IA SISU KALAISI, ‘O MĀTU’AKI HIKI MAI. (emphasize mine).

‘Io, na’e tuku mai pē ‘e he ‘Otua′ ‘a ‘Ene Lao′ kia Mosese′, ke ne tauhi mo ako’i ‘aki (discipline) ‘Ene kakai′ he ko e ‘ata pē (shadow). Kae toki hoko mai ‘a Sisu Kalaisi ‘o mātu’aki hiki fu’u mai. Ko IA ‘a e fo’i MO’ONI′ mo e fo’i KOLOA′, pe ko e FO’I ‘ELITO Ia ‘o e me’a kotoa pē. HE IS THE SUBSTANCE! ‘O ne ha’u ‘o nofo mo e kakai′, ka na’e ‘ikai tali ia ‘e Hono kakai′. Ko e koloa′ na’e fonu mahuohua ‘i he Tokotaha Ko Ia′ – ko e KELESI′ pea mo e MO’ONI′. Pea ‘i he’etau ma’u ‘a Sisu Kalaisi mo ‘Ene fonu he kelesi′ mo e mo’oni′, pea ‘oku feta’ota’omi ‘a ‘etau tautaufetongi he kelesi mo e kelesi, ‘io, he’etau toli taufetongi mei He’ene fonu mahuohua′. Ko e kelesi′ mo e mo’oni′ ko Sisu Kalaisi IA.

Kaungā fononga, ko e kelesi ‘o Kalevale′ ko hota MO’UI’ANGA′ Ia. Kuo ‘osi fai ‘i Kalevale hota fakatonuhia′. Pea ko e kelesi ‘o Kalevale′ ko Sisu Kalaisi. Pea ko e Kelesi′ (Sisu) the good will of God toward us – ko e hoifua’anga Ia ‘o e ‘Otua′ kiate kitautolu′. Talamai ‘ia Loma 3:25 -…’a e Tokotaha Ko Ia′, na’e faka’ali’ali ‘e he ‘Otua′ ko e me’a fakatupu hoifua – ko e HOIFUA tu’unga ‘i Hono TA’ATA’A′, pea founga ‘i he TUI′. ..

3. Fakatonuhia ‘e he ‘Otua′ – Ko hai te ne to e Talatalaaki’i? Talamai ‘ia Loma 8:33 – Ko hai te ne talatalaaki’i (fakahalaia’i) ‘a e kakai kuo fili (fakatonuhia’i) ‘e he ‘Otua′? ‘A e ‘Otua′ koā ‘oku Ne fakatonuhia’i kitautolu′?

Kaungā fononga, kuo ‘osi fai hotau fakatonuhia’i ‘e he ‘Otua′ ‘ia Sisu Kalaisi mo e hifo mahu’inga na’a Ne fai ma’au mo au he kolosi.′ Koe hā ‘a e tu’unga ‘oku ke ‘i ai he taimi ni′? ‘Oku ou fakaafe’i koe, ke ke tali ‘a e Kelesi ‘o Kalevale′ ko Sisu Kalaisi ki ho’o mo’ui′ he kuo Ne ‘osi fai hota fakatonuhia’i ‘i he KOLOSI′. Tali ā ‘a ‘Ene ‘ofa′, fakatomala mei ho’o ngaahi angahala′ – pea ke foaki ā ho’o mo’ui′ Ma’ana.

‘Oku ou to e fakamanatu atu – Kuo tāi’i ‘a e taimi′. Kuo vave ke foki mai ‘a Sisu Kalaisi ke ‘ave ‘Ene kakai′. Ko e fo’i kῑ (key) ki he’eta kau he ‘alu (rapture) Hono Siasi′, ko e fakamā’oni’oni’i ‘eta mo’ui′ ‘i loto mo tu’a, pea ta melino mo e kakai kotoa pē – pea lau ma’u pē ‘eta Folofola′, pea ‘ikai ngata hono lau′ kae apply ‘a e Folofola′ ki he’eta mo’ui faka’aho′ (daily life). Ka ko e me’a tēpū′, ko ‘eta feohi faka’aho mo e ‘Eiki′ (feohi faka-ē-loto) mo mo’ui fa’a lotu. Lotu ta’etuku. Pea ko hono mo’oni′, te ke ongo’i ‘oku ke vāofi ma’u pē mo e ‘Eiki′ he ‘aho kotoa pē kae ‘oua ke Ne foki mai ‘o ‘ave Hono Siasi′.

Manatu’i – You have been Justified!

Kuo ‘osi fakatonuhia’i koe!

‘Ofa lahi atu ki he Tonga kotoa.











































Be the first to comment on "Kaveinga′ – How shall man be just with God? ‘E tonuhia fēfē ha tangata ‘i he ‘ao ‘o e ‘Otua′?"

Leave a comment

Your email address will not be published.


*


This site uses Akismet to reduce spam. Learn how your comment data is processed.