Kaveinga′ – Ko e Ngaahi Māfihunga ‘o e Loto′ – The Intents of the Hearts.


Fa’u ‘e Linda Tu’ulakitau

‘Etita ki he Lea-Fakatonga – Mosiana Fisi’ipeau

‘Oku tau kei kaungā kau fakataha ai pē si’i kaungā fononga ‘i he fakafeta’ia ‘a hotau ‘Otua′ ‘i He’ene kei faka-koloa’aki kitautolu ‘a ‘Ene ‘ofa′ mo ‘Ene fai faka’atu’i′ – ka tau toe kau He’ene lau′ pea tau lau He’ene kau.′

‘Oku mātu’aki fiefia ai pē ‘a e Peesi ‘a e GBG-Online Ministry′ ke fakafe’iloaki fiefia atu kiate koe kotoa pē ‘oku ta fa’a kaungā ‘inasi fakataha mei he Folofola′. Pea ko e mo’oni ē mo’oni – “For I delight in the Law of God after the inward man”. “’Oku fakafiefia’i ‘e he Lao ‘a e ‘Otua′ ‘a hoku tangata-‘i-loto′ ” (Loma 7:22).

Ko e Folofola ‘oku ‘omi ‘e he Laumālie Mā’oni’oni′ ke ta ma’u me’atokoni mei ai he ‘aho ni.′

Folofola′ – Hepelū 4:12 – “He ko e Folofola ‘a e ‘Otua′, ko e KOTO MO’UI mo e KOTO MĀLOHI, pea MĀSILA ANGE ‘i he heletā fakatoumata fuapē, ‘o ne ‘asi atu ‘o maioio’i ‘a e loto′ mo e laumālie′, ‘io, hono ngaahi hokonga′ mo e uho′ – pea ‘OKU NE VAVANGA’I ‘a e ngaahi HOLI mo e FAKAKAUKAU ‘o e loto′ ”. (emphasis mine)

Kaveinga′ – Ko e Ngaahi Māfihunga ‘o e Loto′ – The Intents of the Hearts.

Kaungā fononga, ko e Folofola ‘o e ‘aho ni′ ‘oku feinga mai ‘a e Laumālie Mā’oni’oni′ ke ta hanga ‘o fakatokanga’i ‘a e ‘ulungaanga mo e natula ‘o e Folofola ‘a e ‘Otua′.

1). ‘Oku mo’ui. 2). ‘Oku mālohi. 3). ‘Oku māsila.

Pea ‘i he’ene Mo’ui, Mālohi mo Māsila mo’oni ‘a e Folofola ‘a e ‘Otua′, ‘oku Ne ‘eke huhū hifo ki he feitu’u loloto taha ‘o hotau tangata-‘i-lotó (the most deepest part of our inner-man). He ‘oku Ne vavanga’i ‘a e ngaahi holi mo e ngaahi māfihunga kotoa pē hotau loto′ – He ‘oku telefua pea tokaima’ananga ‘a e me’a kotoa pē ki he fofonga ‘o IA ‘oku tau FAKAMAAU KI AI.′

‘Oku ou tui ko hotau loto′ ‘oku tokanga lahi mai ki ai ‘a e ‘Otua′ ‘i He’ene Folofolá he ‘aho ni.′ Koe’uhi′ ‘oku lea ki ai ‘a Palōvepi 4:23 – “’I he me’a kotoa ‘oku ke tauhi′, mu’omu’a ‘a e LAMA HO LOTO′ – He ‘oku founga mei ai ‘a e ngaahi me’a ‘oku ‘asi ‘i he mo’ui′ ”. He ko e me’a ‘oku ‘asi faka’aho mei he’eta to’onga mo’ui′, he’eta lea′, fakakaukau′, mo ‘eta ngāue′ – ko e fou kotoa mai ia mei hota loto′. Kapau ‘oku ma’a hota loto′ mo fonu lelei, ‘e mahua mai ‘a e ma’a′ mo e lelei′ mei hota tūkunga koloa′ – ko hota loto′- he ‘aho ko ia′. Pea ka ‘oku ‘uli mo feliha’a, ko e koloa kovi ‘e mahua mai′ – pea ‘oku ‘ikai langilangi’ia ai ‘a e ‘Otua′.

Ko ia, kaungā fononga, tau ki’i sio mu’a ki he ngaahi tūkunga mo e ngaahi māfihunga kotoa pē ‘o e loto′. Pea tau vakai ai, koe fē ‘a e fa’ahinga tūkunga ‘o e LOTO′ (HEART) ‘oku ke ‘i ai, pea u ‘i ai he ‘aho ni.′

The Natural Heart – Ko e Loto Faka-ē-Natula′ – pe ko e ‘ai ke to e mahino ange′ – ko e Loto ‘oku fonu ai ‘a e ngaahi me’a ‘o e kakano′ – pea ‘oku kei pule’i ‘e he ‘uūni me’a fakakakano′. Pea ‘oku lea ki ai ‘a e Palōfita′, Selemaia 17:9 & 10 – “Ko e fungani ‘i he me’a kākā ka ko e loto′, pea ‘oku hiliō ‘a hono kovi′ ko hai te ne lava ke ‘ilo ia?

(v.10) “KO AU SIHOVA ‘oku ou hakule ‘a e loto′, ‘oku ou sivi ‘a e kofuua′, koe’uhi′ ke ‘atu ki he tangata ‘o taau mo hono ‘alunga′ – o fakatatau ki he fua ‘o ‘ene faianga′.” ‘Io, ko Sihova Hakule Loto IA.

Kaungā fononga, na’e fakatupu ‘e he ‘Otua′ ‘a māmani mo hono fonu′- kau ai kitaua ha’a tangata ‘aki ‘a e Lao haohaoa faka-laumālie ‘a e ‘Otua′, His Spiritual Law. Pea na’e ma’a mo haohaoa ‘a e me’a kotoa pē. Kae tālunga ‘a e hinga ‘a ‘etau ‘uluaki ongomātu’a′, pea uesia ai ‘a e me’a fakatupu kotoa pē ‘e he angahala′ ‘o ta kau ai ‘akitaua ha’a tangata. Kuo ‘ile’ila ‘eta me’a kotoa pē ‘e he angahala′. Pea liliu ‘a e me’a kotoa pē na’e hoko mai ‘i he Spiritual Law ‘a e ‘Otua′ ‘o faka-natula. Pea hanga ‘e he ‘Otua′ ‘o tuku mai ‘Ene Folofola′, His WORD ke tau pule’i ‘aki ‘a e me’a kotoa pē ‘i he māmani.′ ‘Ikai ngata ‘Ene tuku mai ‘a Sisu Kalaisi′, the Word of Life ke Ne huhu’i kitaua mei he angahala′ – ka Ne ‘omi ‘e IA ‘Ene Folofola kuo TOHI′ – ke tau tu’u ai, tui ki AI – pea tau pule’i ‘aki ia ‘a e ngāue kovi ‘a e tevolo.′

Ka ‘oku pule ‘a e tevolo′ ho loto′, ke ne fai ha maumau fakafou ‘i he loto′, tu’u he mālohi ‘o e Folofola′, he ‘oku māsila pea mo’ui, ka ta ikuna.

2). An impenitent heart – Ko e Loto Ta’efakatomalá.

Talamai ‘ia Loma 2:5 & 6 – “Ka ke fai’aki ho loto fefeka mo ta’efakatomala na, ‘o ke fokotu’u houhau ma’au ‘o ka hoko mai ‘a e ‘aho fai houhau mo fakae’a ‘a e fakamaau ‘au’autotonu ‘a e ‘Otua′.

(v.6) –“‘A ‘Ene ‘Afio′ te ne ‘atu ki he tangata takitaha ‘o fakatatau ki He’ene ngāue. “

‘Io, tokolahi ‘a e kakai ‘oku nau kei despise the warning, kei fakaongotuli ki he ui mo e tukituki ‘a e Laumālie′ kiate kitautolu′ ‘i ha ngaahi mahaki, ngaahi palopalema he fānau′, ngaahi faingata’a he nofo ‘api′ mo e fāmili′ – ka tau kei fakafefeka pē mo faka-kiakekeva, ta’efietukulolo ‘o ‘ikai ketau ‘ilo ko e ngaahi me’a ‘oku hoko mai ki hota fāmili′, pe hoko kiate kitaua fakafo’ituitui′, ko e ngaahi mamahi mo e palopalema ko ia′ – ko e taki ia kitaua ‘e he ‘Otua′ ki he FAKATOMALA′.  Ko e pole ma’au ‘oku ke kei ‘i he tūkunga loto ko ia′ – Tukulolo, fakatomala pea tui kia Sisu Kalaisi, tali IA ki ho loto′ ka ke mo’ui.

3). A Contrite Heart – Ko e Loto Lavea mo Mafesifesi′ (loto fakatomala′).

Talamai ‘ia Saame 51:17 – “Ko e feilaulau ki he ‘Otua′, ko e laumālie lavea, ko e LOTO LAVEA mo MAFESIFESI′ he’ikai ta’etoka’i ‘e he ‘Afiona′ ”. Ko e Saame ia ‘a Tevita ‘i he’ene fakatomala mo’oni ‘i he a’u kiate ia ‘a e Palōfita′ ‘o fakahoko ki ai ‘a e hia fufū na’a ne fai ‘i he’ene tono mo fakapō ‘ia Patisepa mo hono husepaniti ko ‘Ulaia′. Na’e ‘ikai te ne toe tuli tonuhia pe to e feinga kalofaki – ka na’a ne confessed his sins – na’a ne vete ‘ene angahala′ ‘i he loto lavea mo mafesifesi mo’oni ‘i he ‘ao ‘o e ‘Otua′. Pea ko e fa’ahinga feilaulau mo’ui ia ‘oku manako pea hoifua taha ki ai ‘a e ‘Otua′ – ‘a ‘ete loto mafesi, fakatomala mo’oni he’ete ngaahi angahala′ pea te tafoki ki he ‘Otua′. He’ikai te Ne ta’etoka’i ha angahala (sinner) ‘oku foki kiate IA. “He kapau ‘oku tau vete ‘etau ngaahi angahala′, ko ‘Ene (Sisu) anga fakamo’oni tala’ofa′ mo ‘Ene anga faitotonu′ ‘oku na kau ke Ne fakamolemole ‘etau ngaahi angahala′ – pea ke ne fakama’a kitautolu mei he faihala fulipē (1 Sione 1:9).

4). An Opened Heart – Ko e Loto kuo Faka’ataa.

Talamai ‘ia Ngāue 16:14 – …”Pea ko e tokotaha na’e hingoa ko Litia – ko e fefine na’e fai fakatau tupenu kula mei he kolo ko Taiataila′, pea kuo tafoki ki he Lotu ‘a e ‘Otua′ – lolotonga ‘ene fanongo ‘e ia,′ na’e tangaki hono loto′ ‘e he ‘Eiki′, ke tokanga ki he ngaahi me’a na’e lea’aki ‘e Paula′”. Ko e loto ia kuo faka’ataa, pe kuo tangaki ‘o fakaava ‘e he Laumālie′ he taimi na’a ne fanongo ai ki hono malanga ‘aki ‘e Paula ‘a e Folofola′. Ko e loto na’a ne tali fiefia or received the Word cheerfully. Pea mo’oni ‘a Loma 10:17 – “’Oku tupu ‘a e tui′ mei he fanongo′, pea ‘oku fai ‘a e fanongo′ ko e ‘i ai ‘a e Folofola ‘a Kalaisi′ ” (v.17). “So then faith cometh by hearing, and hearing by the WORD OF GOD”.

Faka’ataa ma’u pē hota loto′ ki he Folofola ‘a e ‘Otua′, kae tupulaki ‘eta tui′ mo ‘eta ‘ofa ki he ‘Otua′. He ko e Folofola′ pē ‘oku fakatupu mo’ui′ mo fakatupu fua ‘i he’eta mo’ui.′ He ka ‘ikai ha Folofola ‘i hota loto′ – ‘oku nge’esi pea ta pakukā fakalaumālie he ‘aho kotoa pē. Lau ho’o Folofola′ pea ke fakalaulauloto ma’u pē ki ai – ka ke iviivi he ‘aho kotoa pē. Kuo mateuteu kakato ho tangata faka-‘Otua′ (your inward man) ke ne talia ‘a e ha’aha’a ‘o e fononga’anga′.

5). A Believing Heart – Ko e Loto Tui′ –

Accepts Christ. ‘Oku ne tali ‘a Kalaisi. Talamai ‘ia Loma 10:9 – “Koe’uhi′ kapau te ke fakahā ‘aki ho ngutu′ ko e ‘Eiki ‘a Sisu, pea ke tui’aki ho loto′ kuo fokotu’u IA (Sisu) mei he pekia′, ‘e fakamo’ui koe”.

‘Io, ko e mo’oni – ko e fakatokia hotau loto′ ‘i he’etau fanongo ki he Folofola′ – pea tau tui kia Sisu′ – pea ‘oku kamata ke tau lea’aki ‘etau tui kia Sisu′, ‘etau fakaafe’i IA ke Ne hū mai ki hotau loto′ ‘o hoko ko hotau ‘Eiki mo Fakamo’ui. Pea ko e ma’u ia hotau salvation. Ko ‘etau tali kakato ‘a Sisu ke ne hū mai ‘i Hono Laumālie Mā’oni’oni′ ‘o ‘afio tu’uma’u ‘i hota loto′. Pea hoko hota loto′, ko e loto ‘oku fonu tui – ko e tui ki he ‘Alo ‘o e ‘Otua′, ko Sisu Kalaisi, ‘a ia na’a Ne foaki ‘e IA IA ke pekia koe’uhi′ ko koe mo au.

6). A Purposed Heart – Ko e Loto Kuo Pau –

Cleaves to the Lord. Talamai ‘ia Ngāue 11:23 – “Pea ‘i he’ene lava mai ia′ (Panepasa) mo vakai ‘a e ‘ofa′, tā ‘oku mei he ‘Otua′ ia, na’a ne fiefia pea ne tokoni kinautolu kotoa pē kenau nofo ki he ‘Eiki′ mo e LOTO PAU.”

Ko Panepasa ‘eni ko e kaungā fononga Pilikimi ‘o Paula ‘i he ‘ave ‘o e Kosipeli′ ki he senitaile′. Ko e ‘uhinga foki ‘o hono hingoa′- Panepasa′ – ko e Foha ‘o e Fakafiemālie (Son of Consolation). Ko hono tavi′ ke ne fale’i mo fakalotolahi’i ‘a e kainga tui′ mo fakafiemālie’i ha loto ‘oku palopalema’ia. Na’a ne fakalotolahi’i ‘a e Siasi ‘i ‘Aniteoke′ kenau nofo ki he ‘Eiki ′ ‘aki ‘a e loto pau (purposed heart), loto kuo tukupā kakato kenau nofo’i ‘o pikitai ki he ‘Eiki.′.

‘Oku ou tui ko e fa’ahinga loto ia si’i kaungā fononga ke tau tulituli ki ai ‘i he fononga Pilikimi ‘oku tau fai.′ Ko ‘etau ma’u ha loto pau, kuo fakapapau’i ko Sisu Kalaisi, ko IA hoku Tu’i′, ‘Eiki′ mo Fakamo’ui′ – pea ko IA teu pikitai ki ai mei Taimi ‘o a’u ki ‘Itāniti′.

Fakamanatu atu – koe hā ‘a e māfihunga mo e tūkunga loto ‘oku ke fili ki ai ‘i he Fika 1 ki he 6 ‘i ‘olunga′, ko ia ia ‘e tautau ki ai ho’o mo’ui′ mo ho’o mate′.

‘Ofa atu ki he Tonga kotoa.



















































Be the first to comment on "Kaveinga′ – Ko e Ngaahi Māfihunga ‘o e Loto′ – The Intents of the Hearts."

Leave a comment

Your email address will not be published.


*