Kaveinga – Kuo ke kau ‘i he Fānau Ohi ‘a e ‘Otuá?

Kaveinga – Kuo ke kau ‘i he Fānau Ohi ‘a e ‘Otuá?

Fa’u ‘e Linda Tu’ulakitau

‘Etita ki he Lea Faka-Tonga – Mosiana Fisi’ipeau

‘Oku ou fakafeta’i ai pē ki hota ‘Otua mohu manava’ofa ‘oku ta tauhi ki ai′ ‘i he tāpuaki ‘o e mo’uí kuo, pea ‘oku Ne kei fakakoloa’aki kitaua ko ‘Ene fānau ‘ofeina. Pea ‘oku ou fiefia ma’u pē keu fakafe’iloaki atu mo e loto hounga’ia lahi ‘i he’eta kei kāfataha he fe’inasi’aki mei he Folofola ‘a e ‘Otua′ – ko e Me’atokoni pē IA ‘e TAHA ke fafanga’aki ‘a hota laumālie′ . Ka ava ‘a e tu’unga ‘o e FOLOFOLA′ ‘i he’eta mo’ui′ – pea ko e mo’oni, ‘oku ta mātu’aki ‘aungalua faka-laumālie, pea ta fononga he po’uli′ ‘o ‘ikai ‘ilo pe ko ‘eta taumu’a′ ki fē?

Ko ia ai si’i kaungā fononga Pilikimi ‘i he ‘Eiki′, ‘oku ou ha’u ai pē mo ha fehu’i kuo tohi ‘i he Folofola ‘a e ‘Otua′ ke ta tali fakafo’ituitui pē ki ai, ‘o fakatatau ki he’eta a’usia′.

KAVEINGA – Kuo ke kau ‘i he fānau ohi ‘a e ‘Otua′?

FOLOFOLA – Selemaia 3:19 – “Pea u lau ‘e au, Hono ‘ikai te u velo koe ki he tu’unga ‘o e ngaahi foha′? Pea teu ‘atu ha fonua mamana, ko e teunga ‘o e teunga ‘o e ngaahi pule’anga′ mo hao tofi’a? Pea u pehē, kuopau temou ui AU, ‘Alā Tamai, pea ‘e ‘ikai te mou tafoki meiate AU”.

Kaungā fononga, ko e palōmesi ‘eni ‘a e ‘Otua′ na’a Ne fakafai ‘i He’ene Palōfita′ ke ne fakahoko ki Siuta mo ‘Isileli, lolotonga ‘a e kei nofo popula ‘a e Pule’anga ‘Isileli ′‘I ‘Asilia′, pea ko e Pule’anga Siuta′, ki he Pule’anga Papilone′. Tenau foki mei he’enau nofo popula′ ‘onau toe nofo’i honau fonua′, ‘a ia na’e foaki ma’a ‘enau ngaahi kui.′ Pea tenau hoko ko e Fale pē ‘e taha, pea tena hoko ko e ONE STICK IN THE HAND OF THE LORD ‘o hangē ko ia ‘oku lea ki ai ‘a ‘Isikeli 37:16, 17, 18 &19.

(v.19) – Te ke lea kiate kinautolu ‘o pehē…vakai ‘oku ou teu to’o ‘a e ‘Akau ‘a Siosifa′, ‘a ia ‘oku ‘i he nima ‘o ‘Ifalemi′, pea mo e ngaahi matakali ‘o ‘Isileli ‘oku kau mo ia′, pea teu ‘ai kinautolu ki he taha koee, ‘a e ‘Akau ‘o Siuta′ – pea teu ngaohi ko e ‘akau pē taha. Pea tena taha pē ‘I HOKU NIMA′”. Pea ‘e hoko ko e me’a fakafiefia ‘a e taha ‘a Siuta mo ‘Isileli ‘i Kenani′, ‘a ia ko e taipe ia ‘o e fakataha ‘a e Siu′ mo e Senitaile′ ‘i he Siasi Kosipeli′ – ‘I he taimi ko ia′ ‘e vaivai ai hono ngaahi fili′. Pea tenau hoko ko e takanga pē ‘e taha ‘i he ‘Aofinima ‘o e TAUHISIPI pē taha ko Sisu Kalaisi. Ko e palōmesi ia ‘a e ‘Otua′ ki Hono kakai′ ‘i he veesi 18́.

Ka ‘i he veesi 19́, na’e ‘i ai ‘a e faingata’a na’e kamata fakatoka mai ‘i he ‘alunga ‘o e Meesi ko eni′. Ka na’e ‘i ai pē ‘a e fakapopoto na’e mapuna hake ke ne ikuna’i . Ko ia na’e fehu’i ‘a e ‘Otua′ ‘i Hono Laumālie Mā’oni’oni′ ‘i He’ene Folofola′ he ‘aho ni ke ta tali ange′ ki AI′ – How shall I put thee among the children? ‘E anga fēfē Ha’aku tuku koe pe fokotu’u koe, pe velo koe ki he tu’unga ‘o e ngaahi foha′?…tu’unga ‘o e fānau′? Pe ko hono ‘ai ke to e mahino ange′ – ‘E anga fēfē Ha’aku (‘Otua) lau koe mo au ko e taha ‘i Hono ngaahi foha′? (Adopted sons and daughters). ‘Oku ‘a e ‘Otua′ pē ‘a e tali ki He’ene Fehu’i′.

1. By receiving God’s Son – ‘I he’eta ma’u ‘a e ‘Alo ‘o e ‘Otua′ ko Sisu Kalaisí. Talamai ‘e he Folofola′ ‘ia Sione 1:12 – “Ka ka ‘ilonga ‘a kinautolu na’e ma’u IA′ (Sisu), na’a Ne fakamafai’i kinautolu ke hoko ko e fānau ‘a e ‘Otua′, ‘io, ‘a kinautolu ‘oku tui pikitai ki Hono Huafa′”. Huafa ‘o hai′? Huafa ‘o Sisu Kalaisi′.

Kaungā fononga, tā ‘oku ‘ikai ke ta hokosi noa pe ke ui kitaua ko e fānau, pe ko e ngaahi foha ‘o e ‘Otua′, kae’oua pē kuo ta ma’u ‘a Sisu Kalaisi ko e ‘Alo ‘o e ‘Otua′ ki hota loto′, pea ta tui pikitai kiate Ia ko hota ‘Eiki mo Fakamo’ui. Pea ‘oku toki ‘omi ‘e he ‘Otua′ ‘a e MAFAI ko ia′ ki he tu’unga ko e fānau ohi pe ko e ngaahi foha ohi kitaua ‘o e ‘Otua′ – ‘o makatu’unga pē ‘i he fo’i mo’oni ko IA′ – ko ‘eta ma’u ‘a e ‘Alo ‘o e ‘Otua′ ko Sisu Kalaisi ki hota loto′. Pea ‘oku fai leva ‘e he Laumālie Mā’oni’oni′ ‘a hono sila’i kitaua′. Kuo ta hoko ko e fānau ‘a e ‘Otua′ pea ‘oku ta kaungā‘ea mo Sisu Kalaisi ki he taloni ‘o e ‘Otua′. Pea ‘oku lea ki ai ‘a Paula ‘i he Tohi ki Loma 8:14-17′ – (v.14) “He ‘ilonga kinautolu ‘oku tākiekina ‘e he Laumālie ‘o e ‘Otua′, ko e ngaahi foha kinautolu ‘o e ‘Otua′. (v.15) – He tala’ehai′ na’a mou ma’u ha laumālie anga popula, kemou foki ai ki he manavahḗ, ka na’a mou ma’u ‘a e laumālie anga-faka-tama ohi, pea ‘i he’etau ‘iate IA′, ‘oku tau Kalanga “APĀ TAMAI”. (v.16) – Ko e LAUMᾹLIE′ ‘oku Ne kaungā fakamo’oni mo hotau laumālie′ ‘o pehē – KO E FᾹNAU ‘A E ‘OTUA′ ‘A KITAUTOLU. (v.17) – Pea kapau ko e FᾹNAU, tā ko e ngaahi ‘EA foki, ko e ngaahi ‘EA ‘o e ‘OTUA′, pea KAUNGĀ‘EA MO KALAISI: ‘O KAPAUĀ ‘OKU TAU KAUNGĀ MAMAHI MO IA, ka tau kaungā hakeaki’i mo IA” (emphasis mine).

‘Io, ko e tali ia ‘a Sihova ki He’ene fehu’i he Folofola ‘o e ‘aho ni′ – But I said, Thou shalt call ME, My FATHER…That He may put returning penitents AMONG THE CHILDREN – HE will give them the Spirit of Adoption, Te NE foaki kiate kinautolu ‘a e LAUMᾹLIE ANGA – FAKA-TAMA OHI and teach them to cry ABBA, FATHER.

Pea ‘ikai ia ko ia pē, ka Te ne foaki kiate kinautolu kuo Ne velo ki he tu’unga ‘o e ngaahi foha kuo Ne ohi ‘ia Sisu Kalaisi′ ‘a e Fonua Mamana ko e teunga ‘o e ngaahi pule’anga′ mo’onau tofi’a.

Si’i kaungā fononga, ko hota palōmesi ia kuo ‘omi He’ene Folofola′. Kapau kuo ke ‘osi ma’u ‘a Kalaisi ko ho ‘Eiki mo Fakamo’ui – kuo ta ‘osi hoko ko e fānau ‘a e ‘Otua′, pea ta kaungā‘ea fakataha mo Kalaisi ki Hevani, ko ia ‘a hota tofi’a′.

2. By Birth of God’s Spirit – 1 Sione 5:1 – Ko ia kotoa pē kuo fānau’i mei he Laumālie ‘o e ‘Otua′. Talamai ‘ia 1 Sione 5:1 – “Ko ia kotoa pē ‘oku tui ko e Misaia ‘a Sisu′ – kuo fānau’i ia mei he ‘Otua′ – pea ko ia kotoa pē ‘oku ‘ofa kiate Ia na’e fānau’i′ ‘oku ne ‘ofa foki kiate ia kuo fānau’i mei He’ene ‘Afio′.

‘Io, kaungā fononga, ko ‘eta fānau’i fo’ou pē mei he Laumālie ‘o e ‘Otua′ ko e mahino ia kuo ta ‘osi hoko ‘o kau ki he Fāmili ‘o e ‘Otua′. ‘Oku nofo mai IA ko ‘eta TAMAI, ka ta nofo atu kitaua ko ‘Ene fānau ke tau feohi ta’engata mo IA ‘i hota tofi’a ko Hevani mo hono MO’UI TA’ENGATA′.

3. By call of God’s Grace – 1 Sione 3:1 – “Kapau ‘oku mahino ko e MᾹ’ONI’ONI ‘a ‘Ene ‘Afio′, ‘oku mou ‘ilo leva, ko ia ‘oku fai mā’oni’oni′ – kuo FᾹNAU’I mei He’ene ‘Afio′ ”.

‘Io, si’i kaungā fononga, tau vakai ā ki hono fakaofo ‘o e ‘ofa kuo foaki kiate kitaua ‘e he ‘Otua′ – ‘a e fai ke ui kitaua ko ‘Ene fānau – ko e kelesi ‘ata’atā pē ‘a e ‘Otua′. Na’e ‘ikai te ta lave he ui kitaua ko ‘Ene fānau kuo Ne ohia′ tu’unga ‘i ha’ata mā’oni’oni, pe ngāue lelei, pe ko ha’ata fakafeangai kuo tōnunga, ka ko e unconditional LOVE ‘ata’atā pē ‘a e ‘Otua′, ‘ofa tu’unga’a pē, ta’ekouna’i, pe tu’unga ‘i ha me’a – ka ko ‘Ene ‘ofa′ pē he ko e UHO ia ‘o e ‘Otua′ ko e ‘OFA′.

Tau fakafeta’i mo fakamālō’ia ke ta’engata ‘a e ‘Otua ko ‘Etau Tamai ‘ofa′, he na’e ‘ikai te tau mei anuanu ‘i he tāpuaki ‘o ‘eta kaungā ‘EA mo Kalaisi ki he to’omata’u ‘o e Tamai′ – ka ko hono tohoaki kitautolu ‘e he Tamai′. Folofola tonu’aki ‘e Sisu ‘ia Sione 6:44 – “’Oku ‘ikai lava ‘e ha taha ke ne ha’u kiate AU, ka ‘i he TOHOAKI IA ‘E HE TAMAI′ na’a Ne fekau mai au′ ”.

‘A ia ‘e kaungā fononga Pilikimi, ko ‘eta hoko ko e kaungā‘ea′, ko e fānau ohi ‘a e ‘Otua′, fou ‘i he’eta tui pikitai kia Sisu Kalaisi, na’e ‘osi toka tu’utu’uni ‘e he ‘Otua′ te’eki ke tanupou ‘a e māmani ko eni′ – ‘e ‘i ai ‘a e kuonga pehe ni, pea ‘e ‘i ai ‘a e taha ‘i he kakai ‘o e māmani ko eni′, ko koe mo au TE NE UI ‘O FAKAMO’UI, pea te ta hoko ko ‘Ene fānau kuo Ne ‘osi ōhia. Talamai ‘ia Loma 8:29&30 – (v.29) – “He ko kinautolu NA’A NE TOKA MEA’I′, NA’A NE TOKA TU’UTU’UNI foki kenau hokosi ‘a e ‘IMISI ‘O HONO ‘ALO′ koe’uhí ke Ne (Sisu) hoko ko e TA’OKETE ki he TEHINA (ko koe ia mo au ko e fanga tehina) tokolahi (‘o Sisu Kalaisi). (v.30) -..ko kinautolu na’a Ne toka TU’UTU’UNI′ na’a Ne UI foki kinautolu – pea ko kinautolu na’a Ne UI′ (ui ‘o fakamo’ui′) na’a Ne fakatonuhia’i kinautolu – pea ko kinautolu na’a Ne fakatonuhia’i′, na’a Ne fakalangilangi’i foki kinautolu (emphasis mine).

‘Io, ko e tu’unga ia ‘oku ta a’u ki ai ‘i he’eta hoko ko e fānau kuo ohi ki he Fāmili ‘o e ‘Otua′ ‘ia Sisu Kalaisi′, ko ‘eta hoko ko e fanga fototehina ‘o Sisu Kalaisi, pea ko e me’a ia ‘a e Laumālie Mā’oni’oni ‘o e ‘Otua′ ‘oku Ne fai faka’aho he’eta mo’ui′ – ko ‘Ene LILIU hota ‘IMISI′ ke ta hokosi mo’oni ‘a e ‘IMISI ‘o Kalaisi′ – ‘o fai mei he Langilangi ki he Langilangi ‘o hangē ai pē ko e ngāue ‘a e ‘Eiki ko Laumālie′ (2 Kol. 3:18b).

Ko e Fekau ‘o e ki’i vahevahe mei he Folofola ko ‘eni′. MA’U ‘a Sisu Kalaisi ‘o TUI PIKITAI KIATE IA – KA TA KAU ‘I HE FᾹNAU OHI ‘a e ‘Otua′.

‘Ofa atu ki he Tonga kotoa.











































Be the first to comment on "Kaveinga – Kuo ke kau ‘i he Fānau Ohi ‘a e ‘Otuá?"

Leave a comment

Your email address will not be published.


*


This site uses Akismet to reduce spam. Learn how your comment data is processed.