Kaveinga: Lī ki lalo, Fai ha hiki hake, Fakamo’ui! Casting down, Lifting up, Saving!

Fa’u ‘e Mosiana Fisi’ipeau

‘Oku ou fakafe’iloaki fiefia atu ‘i he pongipongi fo’ou ko ‘eni′ kiate koe kotoa pē ‘oku ke me’a ki he Peesi ‘a e GBG-Online Ministry – “Ko e ‘ū ‘OFA pē ‘a Sihova′ ‘oku ‘ikai te tau ‘auha ai′. Koe’uhí ‘oku ‘ikai ke ‘osi ‘Ene fai faka’atu’i′. ‘Oku nau fo’ou [‘Ene ‘ū ‘ofa′] ‘i he pongipongi kotoa – ko e me’a lahi Ho’o FAI MO’ONI′ ‘e Sihova”.

‘Oku ou ha’u mo au ha’atau ki’i fakapongipongi ko e MᾹ-‘O E-MO’UI′ ke ta ma’u me’atokoni mei ai he pongipongi ni. Ko e Folofola′ ‘oku to’o meia:-

Siope 22:29 – “Kapau ‘e tō ki lalo ha ni’ihi, pea te ke pehē, Fai ha hiki hake, pea ‘e fakamo’ui ‘e He’ene ‘Afio′ ha angavaivai”.

v.29 – “when men are cast down, then thou shalt say, there is lifting up, and He shall save the humble person”. (KJ Version).


‘E kaungā fononga Pilikimi – ko e Folofola ‘o e ‘aho ni′, ko e kei hokohoko atu ia ‘o e felīngiaki talanoa ‘i he vaha’a ‘o Siope mo hono ngaahi kaungāme’a ‘e toko tolu na’a nau ‘a’ahi mai kia Siope koe’uhí ko ‘enau fanongo he ongoongo fakaloloma kuo hoko kiate ia′ – ‘a e ‘auha ‘ene me’a kotoa pē ‘o a’u ki he kotoa ‘o ‘ene fānau ‘e toko hongofulu′ [7 sons & 3 daughters]. Ko e to e kanoni ‘aki ‘a e faingata’a lahi ‘oku hoko ki hono sino′ ‘a e mahaki fakalilifu kuo taā’i ‘aki ia′. Ha toki tā ō’o mo fakamamahi mo’oni! Ta ‘ahi’ahi tui ange′ ‘a e sū ‘o Siope′ pe te ta lava? ‘Ai ai ‘ene hoko fakatu’upakē mo ‘ene ‘auha pē he taimi pē taha′. To e to’o mo ‘ene mo’ui lelei′ – to e pē hono uaifi talanoa ta’eikuna′.

To e ‘a’ahi mai hono ngaahi kaume’a′ ‘o nau fale’i ‘a Siope ‘aki ‘a e ngaahi lea ‘oku ngali faka-‘Otua – ka na’a nau sio’aki ‘a e mata ‘o ‘enau fakamaau’i ‘a Siope. Na’a nau pehē ko e tu’unga ‘a e ngaahi faingata’a kuo tō kiate ia mo hono fāmili′ – ko e angahala na’e, pea ‘oku fai ‘e Siope, pea kuopau ke fakatomala ‘a Siope mo foki ‘o fakalelei mo Sihova kae to e fakatu’umālie ia [veesi 21&23]. – “Fai ke mo vālelei mo ‘Ene ‘Afio′ mo melino, ‘E ha’u ai ‘a e tu’umālie′ kiate koe – v:23 – “kapau te ke foki ‘aupito kia Sātai, ‘e to e langa koe, kapau te ke fakamama’o ‘a e kovi′ mei ho tēniti′”. Na’e hoko ‘enau omi ko e tokoni pe fale’i, pe feinga fakanonga ki he ngaahi faingata’a’ia ‘o Siope′, ko hono tanumaki ke to e kanoni mo huluange ‘a e faingata’a′.

Kaungā fononga, ‘oku tokanga mai ‘a e Laumālie′ He’ene Folofola′ – koe’uhí ko ‘etau fale’i ha taha ‘oku si’i tō lalo koe’uhí ko ha faingata’a ‘oku huki ‘iate ia mo hono fāmili′. Tau fai ‘a e tokoni′ mei he loto ‘ofa mo’oni ‘o ‘ikai ‘aki ‘a e laumālie fai fakamaau. Ko e taipe ‘o e Folofola ‘o e ‘aho ni′, Siope 22:29 – ko e founga faka-kuonga mu’a ia ‘o e Kosipeli′. He kuo tohi ‘i he Lao ‘o e Fekau 10′ – “Teu ‘eke ‘a e kovi ‘a e mātu’a′ ki he fānau′ ‘o a’u ki he tolu mo e faā’i to’utangata ‘a kinautolu ‘oku fakafili mai.′ [‘Ekisoto 20:5(b)].’Oku ou tui na’e sio pehē ‘a e ngaahi kaume’a ‘o Siope′, koe’uhí ko e kau ‘a ‘ene fānau′ ‘i he mate′ – ko e ‘eke ia ‘e Sihova ‘a e kovi pe angahala ‘a Siope′ ki he’ene fānau′.

Pea ‘i he hoko mai ‘a Sisu Kalaisi ‘i Hono kuonga′ mo e Kosipeli ‘o ‘Ene kelesi′ ‘o Ne faka’ā ‘a e mata ‘o e tangata na’e fānau’i kui′. Na’e ‘ekea ia ‘e he kau Falesi′, pea na’a mo e kau ako′ ‘ia Sione 9 – Lapai, ko hai na’e fai angahala′, ko e siana ni, pe ko ‘ene ongo mātu’a′ ne tupu ai hono fānau’i kui′? Ka ka tali kiate kinautolu ‘e Kelesi mo Meesi [Sisu Kalaisi] na’e ‘ikai ko ha angahala ‘a e siana ni pe ko ‘ene ongomātu’a′ ka koe’uhí ke fakae’a ‘iate ia ‘a e ngaahi ngāue ‘a e ‘Otua′.

‘Oku ou fievahevahe ki ha tu’unga lea ‘e 3:

1.Lī ki lalo ‘o e angahala′.

Matiu 15:26-28 [lau ‘a e Folofola′] – Ha’u ‘a e fefine Kēnani ko eni′ ‘o kole tokoni ki he ‘Eiki′ koe’uhí ko hono ‘ofefine′ na’e fu’u kovi ‘a ‘ene puke ‘i he ‘āvea′. Kae talaange ‘e Sisu, “’oku ‘ikai ngofua ke to’o ‘a e mā ‘a e fānau′ ‘o lī ki he fanga kulī′. Pea tali ange ‘e he fefine ni kia Sisu, “ka na’e fai ‘Eiki, he ‘oku kai ‘a e fanga kulī́ mei he ngaahi momo ‘oku ngangana mei he tēpile ‘a honau ‘Eiki′”. Pea tali ange ‘e Sisu, “Fefine, tā ‘oku lahi ho’o tui′, ‘e fai ma’au ‘a e me’a ‘oku ke loto ki ai′”. Pea na’e mo’ui ‘ene ta’ahine′ ‘i he taimi pē ko ia′.

Kapau te tau fakatokanga’i ‘a e fefine ni mo hono faingata’a’ia′- pea mo e tali ‘a Sisu kiate ia′, ‘alu fakataha mo hono valoki’i ia (rebuke) ‘e he kau ako′, ‘oku tokoni kotoa ia ke tanumaki ‘a ‘ene lotosi’i kuo ne ‘osi a’usia ‘i hono ‘ohofi ia mo hono ‘ofefine′ ‘e Setane′.

Kapau te tau fakakaukau, koe hā ē ‘uhinga na’e tataki ai ‘e Sisu ‘a e fā’e ko eni′ ‘i ha founga fakavaivai mo mātu’aki faingata’a, kimu’a pea Ne toki tali ‘ene kole′. Lolotonga ko ia,′ ‘ikai ngata pē he ngali fu’u fefeka ‘Ene tali′ mo Ne tukuhifo ia ki lalo′ ‘o Ne lau ko e kulī ia, ka ko e lēsoni ‘o e tui ‘oku kikivi mo vilitaki′, ‘oku fakahāhā ia ‘i he taimi ‘o e ‘ahi’ahi′ – ‘a ia ko e kaveinga tu’upau ia ‘a e Folofola′. Na’e sivi’i (test) ‘a e tui ‘a ‘Epalahame′ ke ne feilaulau ‘aki hono foha ko ‘Aisake′, ‘ikuna’i ‘e Siosiua ‘a e ngaahi kolo ‘aā’i′ kimu’a pea nau hū ki he fonua ‘o e tala’ofa′, ikuna’i ‘e Tevita ‘a Kolaiate′, pea nofo fakaheē’i kimu’a ke ne hoko ko e tu’i′. Lahi ē ngaahi talanoa ‘o e kakai ne ma’u honau fakamo’ui′ he Folofola′ tu’unga he’enau tui.′

Na’e fakamo’ui hono ‘ofefine′ mei he ‘āvea′, tēpū hono fakamo’ui mo ia ko e fa’ē′ koe’uhí ko ‘ene tui′. Na’e fakatokia ia ‘e he Laumālie Mā’oni’oni′ ke ne fakavaivai he ‘e tokoni ia ki hono fakamo’ui′. ‘Oua na’a ke ongo’i puputu’u ha taimi ‘i hoo ma’u ha loto ma’ulalo mo fakavaivai. Ko e fā’e ko ‘eni′ na’a ne tukulolo kakato ki he ‘Otua ‘o e ‘univeesi′. Na’e tokoni ki he’ene ikuna′ ‘a ‘ene tui pikitai′. Taimi koē na’e fakahilihili’i ai ia mo hono tu’unga he sosaieti′, na’a ne tuiaki ki mu’a, taimi na’e knock down ai ia ‘e he ‘ātakai′ mo e fakaanga′, na’a ne to e tu’u hake, taimi na’e talaange ai ‘e he ni’ihi ke holomui ā he ‘oku mole taimi ‘o Sisu′ – na’a ne nafui atu ta’emotu ‘ene kole′. Na’e lotu hangē ha louhi’i nima ‘i he tafa’aki langi′, na’e lotu tu’o 3 ‘a Sisu ‘i Ketisemani′ – ko e si’i fā’e ko eni′, na’a ne kole tu’o tolu ha tokoni.

Ko e taumu’a tefito ‘o e talanoa ko eni′, ke tokoni’i kitautolu ke ‘oua na’a tau fo’i pe holomui koe’uhí ko e mo’unga ‘oku faingata’a fau ke ke kaka ai′. Hokohoko kole pē, kei kumi pē, kei tukituki pē. Ka lī koe ki lalo ‘i ha feitu’u – lau ko ho tāpuaki – pukepuke ho’o loto lelei′ mo ho’o fakavaivai′ (humility) ‘i he ‘Ao ‘o e ‘Otua′, ka Ne fai ‘e IA ho hākeaki’i′. Talamai ‘e 1 Pita 5:5b – “he ‘oku talitekei’i ‘e he ‘Otua′ ‘a e ‘afungi′, ka ‘oku Ne foaki kelesi ki he angavaivai′”.

2. Hiki ki ‘olunga ‘a e Fakamo’ui′.

Sione 3:14 & 15 –“Pea hangē na’e hiki ki ‘olunga ‘e Mosese ‘a e ngata′ ‘i he toafa′, pehē foki kuopau ke hiki ki ‘olunga ‘a e Fānautama-‘a-Tangata′, koe’uhí ko ia kotoa pē ‘oku tui′ ke ne ma’u ‘iate ia ‘a e mo’ui ta’engata′”.

Taimi na’e lahi ai ē lāunga mo e fai talangata’a ‘a e kakai ‘Isileli′ he fononga he toafa′ – na’e faka’atā ‘e Sihova ke huhu kinautolu ‘e he fanga ngata huhu kona′ – pea lahi ē mate′. Pea na’e tangi ‘a e kakai′ mo nau lāunga kia Mosese, pea tu’utu’uni ai ‘e Sihova kia Mosese ke ne ngaohi ha ngata palasa, pea ke ne hiki ia ki ‘olunga – pea ko kinautolu ‘e huhu ‘e ha ngata, ke ne sio ki he ngata palasa′, pea te ne mo’ui. Ko e taipe ia ‘o hono hiki ‘o Sisu ki ‘olunga ‘o tutuki ki he kolosi′, ko ia te ne sio ki ai′ ‘aki ‘a e mata ‘o e tui′, te ne ma’u ‘a e mo’ui ta’engata′.

Pehē ‘e Sisu ‘ia Sione 12:32 – “Pea ko AU, kapau ‘e hiki au ki ‘olunga mei he kelekele′, te u tohoaki ‘a e kakai kotoa pē kiate AU.” Ko ‘Ene fakatātā atu ia ‘a e mate’anga te ne mate ai′. ‘E hiki ki ‘olunga ‘i he kolosi′ ‘o tautau ‘i he vaha’a ‘o langi mo māmani′. Pea ‘ilonga ha taha ‘e tautau he ‘akau′ (kolosi′) na’e lau ia ko e mala’ia.

Kaungā fononga, ko hai ‘oku ke hikihiki’i ki ‘olunga he ngaahi ‘aho ni′? Kau fokotu’u atu, tau liliu ‘o tui pikitai kia Sisu – pea tau hiki IA mo sani ke mā’olunga taha koe’uhí ka Ne tohoaki ‘a e taha kotoa pē kiate IA. Ke tau ma’u kotoa pē ‘iate IA ‘a e mo’ui ta’engata.′

3. Ko e Fakamo’ui ‘o e Tokotaha Tui′.

Ngāue 16:31 – “Pea na pehē, tui falala ni ki he ‘Eiki ko Sisu′, pea te ke mo’ui, ‘a koe mo ho fale′”.

Lolotonga ‘a e ngāue ‘a Paula mo Sailosi ki he ‘ave ‘o e Kosipeli′ ki he Senitaile′ ‘i he kolo ko Filipai′, na’e iku ai ki hono lī kinaua ki he pilīsone′. Ka ‘i he pō ‘e taha na’a na hiva fakafeta’i mo hū (worship) ‘i he loto pilīsone′. Kae fakafokifā na’e hoko ha mofuike lahi ‘o ne lulu ē pilīsone′ ‘o ava ē ngaahi matapā́ pea homo mo e ngaahi kī́ mei he nima ‘o e kau pōpula′. Pea ūnuhi ‘e he sela′ ‘ene heletā́ ke ne tāmate’i ia he’ene mahalo kuo hola e kau pōpula′ – ka ka ta’ofi ia ‘e Paula ke ‘oua te ne fai ha kovi kiate ia he ‘oku nau kei kakato pē. Pea ne ‘omi kinaua ki tu’a, pea ne pehēange, “Hou’eiki, koe hā ‘eku me’a ‘e fai keu mo’ui ai′? Pea na tali ki ai, “ke ke tui falala ni ki he ‘Eiki ko Sisu′, pea te ke mo’ui ‘a koe mo ho fale′”.

Kaungā fononga, ko ‘etau ngāue ia kuo ui kitautolu ki ai′ ke tau talaki ‘a e Kosipeli′ ke fakamo’ui ‘a e kakai′ ki he Pule’anga ‘o e ‘Otua′. Ko e me’a ē na’e hoko ki he ongo ngāue faka-‘evangeliō koē ‘a Paula mo Sailosi′ – na’e lī kinaua ki lalo ‘aki hono haha mo lī kinaua ki he pilīsone′. Ka na’e tafunaki ‘ena tui′ – na’a na hiva fakafeta’i mo fakahikihiki’i ‘a e ‘Otua′ he taimi ‘o e faingata’a′ mo hona fakamo’ulaloa′. Tuai ē kemo, kuo hifo ‘a e lotolotonga ‘o Sihova ko e Mafi′ ki he fakafeta’i ‘a Hono kakai′, ‘o Ne tangaki ‘a e matapā ‘o e pilīsone′, veteange ē loka kotoa pē mei he kau pōpula′ ‘o Ne fakatau’atāina’i kinautolu. Ne hoko ai ‘a e fakamo’ui′ ki he sela′ mo hono fale′ mo e kau pōpula′. ‘Io, ka toki fakatau’atāina ‘e he ‘Alo′ ha taha, ko ‘ene toki tau’atāina mo’oni′ ia. (Sione 8:36).

‘Ofa atu ki he Tonga kotoa.

Sponsor Advertisement

Be the first to comment on "Kaveinga: Lī ki lalo, Fai ha hiki hake, Fakamo’ui! Casting down, Lifting up, Saving!"

Leave a comment

This site uses Akismet to reduce spam. Learn how your comment data is processed.