Where shall I spend Eternity? Te u hanga ‘o fakamoleki ‘a ‘Itanitiʹ ‘I fē?

Fa’u ‘e Linda Tu’ulakitau

‘Etita ki he Lea Fakatongá – Mosiana Fisi’ipeau

Pē ko hono ‘ai ke to e mahino angeʹ – Te u fakamoleki ‘a e iku’anga ‘o ‘eku mo’uiʹ ‘i fē? ….’I Hevani? Pe ‘I Heli?

THERE IS A HEAVEN OF ETERNAL GLORY FOR THE SAVED – AND A HELL OF ETERNAL WOE FOR THE LOST. ‘Oku ‘i ai ‘a e Hevani mo e langilangi’ia TA’ENGATA ki he kakai kuo ‘osi fakamo’ui honau laumālieʹ(saved) – pea mo e Heli ‘o e mamahi TA’ENGATA kiate kinautolu ‘oku mole honau laumālieʹ he angahalaʹ.

Kapau ko Hēvani te ke iku ki aiʹ – ko ho ‘api ta’engataʹ ia – ‘oku talamai ‘ia Fakahā 21:3 & 4 – “Pea ongo mai ha fu’u le’o mei he taloniʹ ‘o ne pehē – ko eni ko e tāpanekale ‘o e ‘Otuaʹ ‘oku tu’u mo e kakaiʹ – pea ‘e nofo Hono Sikainaʹ mo kinautolu, pea tenau nofo ko Hono kakai. Pea ‘e nofo ‘e He’ene ‘Afioʹ ko e ‘Otua ‘oku kau mo kinautolu. ‘Io, ko HONAU ‘OTUA”. (V4) “Pea te Ne holoholo’i ‘a e lo’imata kotoa pē mei honau mataʹ. Pea ‘e ‘ikai to e ‘i ai ha mate – pea ‘e ‘ikai to e ‘i ai ha mamahi, pe ha tangi, pe ha ongosia, kuo mole ‘a e ngaahi me’a mu’aʹ”

Pea kapau ko Heli te ta iku ki aiʹ ko hota ‘api ta’engataʹ ia – talamai ‘e Fakahā 20:13-15…(v.14 &15) – “Pea na’e lῑ ‘a mate mo hētesi ki he anoafiʹ – ko eni ia ‘a e MATE ‘ANGAUAʹ, ko e ANOAFI.ʹ PEA ‘ILONGA ‘A IA NA’E ‘IKAI ‘ILOA HONO HINGOAʹ ‘I HE TOHI ‘O E MO’UIʹ, NE LI KI HE ANOAFIʹ”.

To e lea fakapatonu ‘a Sisu ‘i He’ene Folofolaʹ ‘o Ne pehē, Ma’ake 9:43-48….(v:47&48) – “Pea kapau ‘e fakatūkia koe ‘e ho mataʹ, li’aki ia, he ‘oku ngutuhua ange ke ke a’u mata taha ki he Pule’anga ‘o e ‘Otuaʹ ‘i ha’o lῑ mata ua ki he Kihena ko iaʹ, ‘a ia ‘oku ‘ikai ‘auha ai honau ‘uangaʹ, pea ‘oku ‘ikai mate ai ‘a e afiʹ”.

Si’i kaungā fononga pilikimi, ko e fehu’i ia ‘oku ou ha’u mo ia he ‘aho niʹ ke ta kaungā vahevahe aiʹ. ‘Oku ou tui kuo huke’i ‘a e peesi faka’osiʹ (last page) ‘a e ‘Otuaʹ ki he māmani ko ‘eniʹ – he ngaahi ‘aho ni. Ko e signs of the Time – kuo fakahāhā he ngaahi liliu kehekehe, ‘a e tafe ‘a e ‘au ‘o TAIMIʹ mo e LILIU mei he kovi ki he to e kovi ange – pea ‘e ‘alu ‘o a’u ki he kovi taupotu tahaʹ. He kuo kovi ‘a e ngaahi ‘ahoʹ ‘o fakatatau ki he lau ‘a e Tohitapuʹ. Ka koe hā ‘a e me’a te ta fai ‘i ha kuonga kuo pehē fau? Mou ‘ā! Wake up! Wake up! Watch and pray! Talamai ‘e 1 Kolinitō 16:13 – “Mou ‘ā ‘o le’o! Mou tu’u’aki ‘a e Tuiʹ (Faith). Mou fai ‘o ngali tangata (Be a man); Mou fakama’u hifo, Stand firm!

Kaungā fononga, ko e ‘aho ‘eni ‘eta mateuteuʹ, ta nofo ‘o sivisivi’i faka’aho ‘eta mo’uiʹ, sio pē koe kiate koe mo e anga ho’o mo’ui faka’aho, sio hifo pē au kiate au mo e anga ‘eku mo’ui faka’aho. Ko e fē ‘a e feitu’u ‘i he ongo feitu’u ko ‘eni ‘e uaʹ ‘oku lea fakapatonu mai ki ai ‘a e ‘Otuaʹ ‘i He’ene Folofola mo’oniʹ te ta iku spend ta’engata mo ta’engata ai ‘a hota ‘itanitiʹ? ‘Oku UA pē ‘a e feitu’u ‘oku tohi’i ‘i he Folofola kuo fakamānava ‘e he ‘Otuaʹ, ko Hevani pē, pe ko Heli. Ko Hevani, ki he Mo’ui Ta’engata pea Ta’engata, pe ko Heli, ki he Mate mo e mamahi Ta’engata pea Ta’engata!

Si’i kaungā fononga, koe hā te ta fai ke ta a’u ai ‘o ma’u ‘a Hevani mo e Mo’ui Ta’engataʹ?

1. Without holiness, no man shall see the Lord! Ka ‘ikai te ta mā’oni’oni, ‘e ‘ikai te ta a’usia ‘a e mamata ki he ‘Eikiʹ mo nofo mo Ia ‘i Hono Pule’anga Ta’engataʹ. Talamai ‘i he Tohi Hepelū 12:14 – “Tuli ke mou melino mo e kakai kotoa pē, pea ki he Mā’oni’oní, ‘a ia ka ‘ikai ma’u, ‘e ‘ikai mamata ‘e ha taha ki he ‘Eikiʹ”.

Tā kuopau ke ta ma’u ‘a e melinoʹ pea ta ma’u mo e mā’oni’oniʹ kae lava ke ta mamata ki he ‘Eikiʹ. Pea tāne’ine’i ke tohi pē ia ‘i he Folofolaʹ. Talamai ‘ia Loma 14:17 – “He ko e Pule’anga ‘o e ‘Otuaʹ ‘oku ‘ikai ko ha kai mo ha inu, ka ko e MĀ’ONI’ONI mo e MELINO mo e FIEFIA ‘i he Laumālie Mā’oni’oniʹ”. Tā ko e me’a pē ‘a e ‘Otuaʹ te ta lava ‘o hū’aki ki Hono Pule’angaʹ.

Mahalo pē te ke pehē mai kiate au: “Keu mā’oni’oni fēfē? Tuku ho’o fie mā’oni’oniʹ he ‘oku tau kei tangata, pea ‘oku tau tō nounou he ‘aho kotoa pē”. ‘Io, ‘oua te ke ongo’i pepe’e ‘o ke sio ta’eikuna kiate koe kapau ko e KALISITIANE FANAU’IFO’OU koe. He ‘oku talamai ‘e 2 Kolinitō 5:21 – “Na’a Ne [‘e he ‘Otua] ngaohi ko e koto ANGAHALA ‘a e Tokotaha ko Iaʹ [Sisu] na’e ‘ikai te Ne ongona [pe ‘ilo ‘iate Ia] ha angahala koe’uhiā ko kitautolu – koe’uhiā ke tau hoko ai ‘iate IA [‘ia Sisu Kalaisi] ko e KOTO MĀ’ONI’ONI FAKA-‘OTUA”. Halelūiaʹ!

‘I he taimi kuo ke fānau’ifo’ou aiʹ (born-again) ‘oku hū mai ‘a Sisu Kalaisi ‘i Hono Laumālie Mā’oni’oniʹ ‘o taloni ‘i hota lotoʹ. Pea ko IA ‘oku Ne fai ‘a ‘Ene mā’oni’oniʹ ‘i ho’o mo’ui,ʹ mo ‘eku mo’uiʹ, ‘o ‘alu pē ‘ahoʹ mo e makehe ‘a e ho’ata ‘o ‘Ene mā’oni’oniʹ ‘iate koe mo auʹ – fai ‘ata’atā pē ia ‘e Kalaisi Toetu’u ‘i loto ‘iate koe mo au, ‘i he’eta manako ke ta feohi faka’aho mo Ia ‘i Hono Laumālie Mā’oni’oniʹ- ‘aki ‘eta lau faka’aho ‘Ene Folofolaʹ mo fakalaulauloto (meditate) ki He’ene Folofolaʹ pea mo ta mo’ui fa’a Lotu lilo, Vete, pea fai mo e fa’a Fakafeta’i. Pea talamai leva ‘e Filipai 4:7 – “Pea ko e nonga – the PEACE OF GOD, which passeth all understanding – Te ne malu’i homou lotoʹ mo ho’omou ngaahi fakakaukauʹ (our hearts and minds) ‘ia Kalaisi Sisu”.

‘Io, si’i kaungā fononga, ko e fo’i lea manuki ia ‘a e tevoloʹ, fakafou mai he’ene kakaiʹ ‘oku ne me’angāue’aki he taimi lahi ki he kakai ‘a e ‘Eikiʹ – “Tuku ho’o fie mā’oni’oni,ʹ vakai na’a ke pehē mo pehē ‘i mu’a ho’o mo’uiʹ te’eki te ke ha’u ‘o lotuʹ…” Fakafeta’i pē koe ki he ‘Eikiʹ. He ‘oku ‘ikai te nau lavelave ‘iloa ‘enautolu ‘a e me’a ‘oku fai ‘e he ‘Eikiʹ ‘i ho’o mo’uiʹ. Ko ‘eku tali ki he kakai ‘oku nau manuki pehē – “’Oku ou fakafeta’i he na’e ‘i ai pē TOKOTAHA na’a Ne foaki ‘Ene Mo’uiʹ ke mole ‘i he Kolosiʹ koe’uhí pē ko au”.

‘Oku ou fakalotolahi kiate koe kotoa pē ‘oku ke me’a ki he Peesi ‘a e God-be-Glorified Ministry- Tuli ki he Mā’oni’oni ‘a e ‘Otuaʹ mo ‘Ene Melinoʹ, ‘o puke ki ai he ko ia ho’o paāsipoōti ki Hēvaniʹ.

2. Apart from the NEW BIRTH, none enter the Kingdom of God. Ka mavahe mei he Fānau’ifo’ouʹ, pē ko hono to e fakalea ‘e taha ke to e mahino angeʹ – Ka ‘ikai ha Fanau’ifo’ou, he’ikai hū ha taha ki he Pule’anga ‘o e ‘Otuaʹ. ‘Ia Sione 3:3 – Ko e tala fakapatonu ia ‘e Sisu Kalaisi kia Nikotimasi – Ko Au ē, Ko Au ē, ‘oku ou talaatu, ‘ilonga ‘a ia ‘e ‘ikai fānau’ifo’ou mei ‘olungaʹ, ‘e ‘ikai te ne lava ke mamata ki he Pule’anga ‘o e ‘Otuaʹ”.

Si’i Kaungā Fononga, ko e tala ē mo e founga ‘o e hū ki he Pule’anga ‘o e ‘Otuaʹ, ‘a e Pule’anga ‘o Sisu Kalaisiʹ, ‘a ia Ko Ia, kuo tu’utu’uni ‘e hoko ko e ‘EA ‘e ‘O’ona ‘a e me’a kotoa pē, koe’uhí na’e tefito kiate Ia ‘a e ngaohi ‘o e me’a kotoa pē, ‘a e me’a hā mai,ʹ mo e me’a ta’ehā mai,ʹ ‘a e me’a ‘i langiʹ mo e me’a ‘i māmaniʹ…’a e fa’ahinga ma’u taloni, fa’ahinga hou’eiki, fa’ahinga pule, fa’ahinga ma’u tu’unga – ‘Io, kuo ngaohi ‘a e me’a kotoa pē ‘IATE IA, pea MA’ANA, …pea ‘oku fema’uma’utaki ‘a e me’a kotoa pē KIATE IA (Kolose 1:14-18). Ko Sisu Kalaisi Ia ‘oku ‘O’ona ‘a e Pule’anga ‘o Hevaniʹ. Talamai ‘e Kolose 1:13 – “’A ‘Ene ‘Afioʹ, na’a Ne hamusi kitautolu mei he pule ‘a Po’uliʹ, mo Ne hiki kitautolu ki he Pule’anga ‘o Hono ‘Alo ‘Ofa’angaʹ. Kohai ‘a e ‘Alo ‘ofa’anga ‘o e ‘Otuaʹ? Ko Sisu Kalaisi.

Ko Ia Ia ‘oku tala hangatonu mai kia kitaua Kaungā Fononga he ‘aho ni ‘a e Paasipooti ke ta hū ‘aki ki Hono Pule’angaʹ. Ka ‘ikai te tau fānau’ifo’ou mei ‘Olunga (mei he ‘Otuaʹ pea he’ikai ke lava ‘e ha taha ia ‘o hū ki he Pule’anga ‘o e ‘Otua.ʹ Without the New Birth in Jesus Christ, no one can enter the gate of the Kingdom of God. Ko e Hū’anga′ (The Gate) pe ko e Hala′ (The Way) ki he Pule’anga ‘o e ‘Otua′ ‘oku TAHA pē – ko Sisu Kalaisi.

Ko hotau fānau’i ‘uluaki mei he kakano′mo e toto′ ‘i hono fānau’i mai kitautolu mei he manava ‘o ‘etau fa’ee′. Talamai ‘e he Saame 51:5 – “Vakai na’e fanau’i au mo e hia′. ‘Io, na’e tu’itu’ia ‘eku fa’ē ‘iate au ko e me’a angahala”.

Ka ko e tokanga mai ‘a e Laumālie Mā’oni’oni′ ‘i He’ene Folofola′ he ‘aho ni ki hota fānau’i tu’o ua′, pe ‘oku ‘iloa ko hota fānau’ifo’ou mei ‘Olunga′, mei he ‘Otua′ fai ‘e he Laumālie Mā’oni’oni′ ‘iate kitauá.

Ko e ‘aho pē ‘o ‘eta tali pē ko ‘eta fakaafe’i ‘a Sisu Kalaisi ke Ne hū mai ki hota loto′ ke Ne hoko ko hota ‘Eiki mo Fakamo’ui ‘o a’u ki he ngata’anga ‘o ‘eta mo’ui mānava ‘oku ta ma’u he mamani ko ‘eni′. That is our special day with the Holy Spirit that we will never forget. He ko e ‘aho ia ‘Ene hū mai ki hota loto′ ‘o hoko ko hota Taukapo, ko hota Tokoni – pea Te Ne tataki kitaua ki he Mo’oni kotoa pē. ‘O hangē ko ia na’e palōmesi ‘aki ‘e Sisu ki He’ene kau ako′ (Sione 15:26). “Oka hoko mai ‘a e Taukapo′, ‘a ia Te u fekau atu ‘e Au mei he Tamai′, ‘io, ko e Laumālie ‘o e Mo’oni′”. Sione 16-13 – “Ka ‘oka hoko mai ‘a e Tokotaha ko Ia′, ‘a e Laumālie ‘o e Mo’oni′, Te Ne tataki kimoutolu ki he Mo’oni hono kotoa”.

Kaungā Fononga, kae tautefito ‘a e mātu’aki tokanga ‘a e God-be-Glorified Online Ministry, kiate kinautolu kotoa pē ‘oku te’eki te ke tali ‘a Sisu ki ho’o mo’ui′, ‘oku ke mo’ui fakahakonoa, you wander about in life with no purpose, ‘ikai te ke kau atu ki ha lotu faka-Kalisitiane – ‘oku fonu palopalema’ia ē mo’ui′ ‘ikai te ke ‘ilo ha to e tali pe fakanonga kiate koe – pea ‘oku ‘ikai te ke ‘ilo ko fē ho iku’anga′ ‘o ka mate ho sino kakano′ kae hoko atu ho laumālie′ ki ‘Itaniti. Ko KOE ia ‘a e tokotaha ‘oku mahu’inga’ia taha ai ‘a e Peesi ‘a e God-be-Glorified Online Ministry′, ‘OKU ‘OFA ATU ‘A SISU KIATE KOE. Talamai ‘e Sisu, “Na’e ‘ikai te u ha’u′ koe’uhí ke ui ‘a e Mā’oni’oni′ – ka ke kumi (ui) ‘a e Angahala′, ‘a ia ‘oku mole′ ke FAKAMO’UI. ‘Io, ke nau FAKATOMALA.

Ko e Fakafe mei he GBG Online Ministry′, kiate koe ‘oku te’eki ma’u ho Fakamo’ui′ (Salvation), ‘oku te’eki te ke fakapapau’i – Where shall you spend your Eternity? Ko e fē ‘a e feitu’u ‘e fakamoleki ai ho ‘Itaniti′? In Heaven of Eternal Glory with Our Blessed Lord Jesus Christ? ‘I Hevani mo hono Kolōlia Ta’engata′ ‘o fakataha ai mo hotau ‘Eiki ko Sisu Kalaisi′? OR Hell of Eternal Woe with Satan and his demons of darkness. Pē ‘i Heli mo e mamahi ta’engata′ fakataha ai mo Setane mo e kongakau ‘o e fakapo’uli′. KO E FILI′ ‘OKU ‘IATE KOE PÉ. THE CHOICE IS YOURS.

Ha’u ā tama ‘o fanongo mai – kau ‘oatu kiate koe ‘a e tala ‘o e Mo’ui′. Ke ke fakaafe’i ‘a Sisu ke Ne hū atu ki ho loto′ he taimi ni. ‘Oku Ne lolotonga fakaunga pē ‘i he tu’a matapā ho loto′ he ‘aho mo e pō ‘o tukituki atu – ‘afē nai te ke to’o kiate Au ‘alā – Kau hū atu ‘o ‘oatu ‘a e tali ki ho’o mo’ui′. He Ko Au Sisu ‘a e tali ki ho’o FIEMA’U KOTOA PÉ.

‘Oua mu’a na’a ke to e toloi. Ko ho faingamālié ‘eni. Kuo tohi ‘i He’ene Folofola′ ‘ia 2 Kolinitō 6:2 – “Ko e Taimi tali hū′, neu ongo’i ai koe – Ko e ‘aho fai fakamo’ui′, neu tokoni ai koe – Vakai mai, ko ‘eni pē taimi matu’aki tali hū [NOW] – Vakai mai, ko eni pē [NOW] ‘a e ‘aho fai fakamo’ui′ ”.

Ko e Lotu ia ‘a e GBG Online Ministry′ ma’ae Tonga kotoa pē ‘i ha tapa pē ‘o e kolope′. Tau tali kotoa ā ‘a Sisu ‘o fakaafe’i ki he’eta mo’ui′ – fakamā’oni’oni’i ‘eta mo’ui′ – kae sila’i kitaua ‘e he Laumālie Mā’oni’oni′, ko e kakai ‘o Hono Pule’anga′. Ko ‘ene ifi pē ‘a e talupite fakamo’ui′ – ko e ‘otomētiki (he kemo pē) ‘a ‘eta ‘alu hake ke fakafetaulaki ki hota ‘Eiki Huhu’i′.

‘A koe ‘oku ke me’a mai ki he Peesi ko ‘eni′ ka ‘oku te’eki ai te ke fakaafe’i ‘a Kalaisi ki ho loto′, ka ‘oku ke fakapapau’i he ‘aho ni, ‘oku ke fiema’u ho fakamo’ui′, ‘oku ou kole kiate koe ke ke lotu ‘aki ‘a e ki’i lotu ko ‘eni′. Fai mei he tefito ‘o ho loto′ ‘i he Tui ki he ‘Eiki ko Sisu Kalaisi′.

“’E ‘Otua, ‘oku ou fakahā ‘aki hoku ngutu′ he ‘aho ni pea ‘oku ou tui ki ai ‘aki hoku loto′ ko ho ‘Alo Mo’oní ‘a Sisu Kalaisi ‘a ia na’a Ne pekia ‘i he Kolosi′ koe’uhí ko au. ‘Oku ou ‘ilo he ‘aho ni ko ‘eku mo’ui′ na’a ku mo’ui pē au ma’aku pē mo mamani ‘o ‘ikai keu mo’ui Ma’au. ‘Oku ou ‘ilo ko au′ ko e angahala au. Pea ‘oku ou ‘unu’unu mai ‘i he ‘aho ni mo e loto fakatomala mo’oni, ‘o vete kiate Koe ‘eku angahala kotoa pē talu mei he ‘aho na’e tu’itu’ia ai au ‘e he’eku fa’ē ko e me’a angahala ‘o a’u ki he ‘aho ni. ‘Oku ou kole fakamolemole kiate koe he’eku ngaahi angahala kotoa pē. Pea ‘oku ou vete atu kiate koe he ‘aho ni ‘eku angahala kotoa pē. ‘Eiki, fō au ‘i ho Ta’ata’a′; fakama’a au ‘i ho Ta’ata’a′, Sisu. ‘Oku ou fiema’u koe Sisu ‘i he’eku mo’ui′. Pea ‘oku ou fakaafe’i Koe he ‘aho ni ke ke hoko mai ‘o ‘Afio tu’uma’u ‘i he Taloni ‘o hoku loto′. ‘Oku ou fakafeta’i he ngāue ma’ongo’onga kuo Ke fai Sisu ‘i he Kolosi′, Ho’o foaki Ho’o Mo’ui′ ke mole koe’uhí ko au angahala. Pea ‘oku ou fiema’u vivili he ‘aho ni keu tali ‘a e me’a’ofa fungani ko ia′ ‘a Ho’o Fakmolemole′ he kuo ke ‘osi foaki mai ia ma’aku ta’e’iai hano totongi. Hoko mai ā ki hoku loto′ he ‘aho ni. Hoko koe ko hoku Tu’i, ko hoku ‘Eiki, ko hoku Fakamo’ui. Mei he ‘aho ni ‘o ta’engata, he’ikai keu to e mo’ui pē ma’aku mo māmani. He’ikai ke to e pule’i ‘eku mo’ui′ ‘e he tevolo′ mo e angahala′. Ka te u muimui kiate Koe he ‘aho kotoa pē ‘eku mo’ui′. ‘Oku ou foaki atu hoku sino′, hoku ‘atamai′ mo hoku laumālie′ ko e feilaulau mo’ui ia Ma’au, ke u hoko ko ha tokotaha ke u ngāue ma’au ‘i hono langa ho Pule’anga′ ‘i he māmani ko ‘eni′. Pea ke hoko ‘a e toenga ko ‘eni ‘eku mo’ui′ ke ke langilangi’ia ai Sisu. ‘Oku ou fai ‘eni ‘i he Huafa ‘o Sisu Kalaisi′, ko hoku ‘Eiki mo Fakamo’ui. ‘Emeni.

Kapau na’a ke fai ‘a e lotu ko ‘eni′, fakafeta’i kuo ‘osi fai ho fānau’ifo’ou mei ‘Olunga′. Kuo ke kau ‘i he fāmili tapu ‘o e ‘Otua′. You are a new creation ‘ia Kalaisi! Fakafeta’i ki he ‘Eiki′!

Ko ho’o fakaafe’i ‘a Kalaisi ki ho’o mo’ui′ he ‘aho ni′, ko e matapā ia kiate koe ki he Mo’ui Ta’engata′ ‘i he Pule’anga ‘o e ‘Otua.′

Ko ho’o mate ‘i he angahala′ te’eki ke ke tali ‘a Kalaisi ke Ne hoko ko ho ‘Eiki mo Fakamo’ui′, ko ho iku’anga′ ko e anoafi ‘o Heli′ mo e mamahi ta’engata′. Ko e Fili′ (Choice) ‘oku ‘iate koe pē.

‘Ofa atu ki he Tonga kotoa pē.

Sponsor Advertisement

Be the first to comment on "Where shall I spend Eternity? Te u hanga ‘o fakamoleki ‘a ‘Itanitiʹ ‘I fē?"

Leave a comment

This site uses Akismet to reduce spam. Learn how your comment data is processed.