Kaveinga: Fokotu’u ke Tonu ‘a e Me’a ‘oku ke Fakamu’omu’a ‘i ho’o Mo’ui′.

Fa’u ‘e Faifekau Mosiana Fisi’ipeau

Folofola: Matiu 6:33 – “Ka mou fuofua kumi ki he Pule’anga ‘o e ‘Otua′, mo ‘Ene ma’oni’oni ‘A’ana′ pea ‘e fakalahi ‘aki ‘a e ngaahi me’a ni kotoa pē kiate kimoutolu”.

Fakafe’iloaki atu mo e loto fiefia mo’oni ‘i he Huafa IKUNA ‘o e ‘Eiki ko Sisu Kalaisi′. ‘Oku ou ha’u mo au he pongipongi ni ha tala fungani mei he kosipeli′ ke tau fe’inasi’aki ai he ‘aho lelei ko ‘eni′.

‘I he Folofola ‘o e ‘aho ni′, ko e tō tonu pē ia mei he fofonga ‘o hotau ‘Eiki ko Sisu Kalaisi′. ‘Oku ou tui pē te ke lava ‘o fakanounou ki he ngaahi fo’i lea ko ‘eni′. “First thing first”, “mu’omu’a ē me’a mu’omu’a′”. ‘Oku ongo ngali faingofua pē ka ‘okapau te tau fai ia he ‘aho ni kuopau ke ke ‘ā ‘o ‘ilo (consciously) ma’upē (constantly) hokohoko (continuously and consistently) hu’ufataha ho loto′ hono fai ‘a e tuku ke mu’omu’a ‘a e me’a ‘oku mu’omu’a′ – ketau fuofua kumi ki he Pule’anga ‘o e ‘Otua′ mo ‘Ene ma’oni’oni ‘A’ana′, pea ‘e toki fakalahi ‘aki ‘a e ngaahi me’a ni kotoa pē kiate kimoutolu”. ‘E ‘i ai ‘a e mātu’aki fakafo’ou (transform) makehe ‘i he’etau mo’ui′.

Ko e me’a kotoa pē heni ‘alu hake mo ‘alu hifo (up and down), kapau ko ho’o fakamu’omu’a′ ‘oku ‘ikai maau, ko ‘eta mo’ui′ ‘oku ta’emaau (not be in order), kapau ko ‘eta ngaahi fakamu’omu’a′ (priorities) ‘oku ‘ikai tonu (not right) he’ikai te ta tonu kitaua (we won’t be right). He’ikai te ta lotu kitaua ki ai pe koe hā ho’o fo’i me’a fika ‘uluaki te ke fakamu’omu’a ‘i ho’o mo’ui′. He’ikai te ta to e hela fakakaukau’i, he’ikai te ta to e alealea’i pe to e kumi ha fale’i ‘a ha taha. He’ikai te ta pehē, tuku keu toki sio ki ai. Kuopau ke ta fai ia! Right now without delay in the Name of Jesus. Pea ko ‘Ene folofola tonu ia, comes out from the lips of the Living Words, our Lord Jesus Christ. ‘Oku Ne tala fakapatonu mai ke tau fuofua kumi ki he Pule’anga ‘o e ‘Otua′ mo ‘Ene ma’oni’oni ‘A’ana′.

Ko e lea kumi ko eni′ (seek) ko e ‘uhinga ia ke tau tulimui longomo’ui hokohoko he ‘aho kotoa pē ‘o ‘etau mo’ui′ – kumi mu’omu’a pē ki he Pule’anga ‘o e ‘Otua′ mo ‘Ene ma’oni’oni ‘A’ana′. Ka kimu’a ke ta kumi ki hono Pule’anga′ – ta fua kumi ‘a e Tu’i′ koe’uhi′ he’ikai te ke ma’u ‘a e Pule’anga′ without the King. Ko ia ko e first priority ia ho’o mo’ui′ ke ke kumi ke ma’u ‘a e Tu’i ‘o e Pule’anga′ (King of the Kingdom). Ko e ‘Otua′ ‘oku ‘ikai ko e Tokotaha pē IA kuo ke tali ki ho’o mo’ui′ – ka ko e Tokotaha IA kuo ke tulimui tāupaua ho’o kumi longomo’ui kiate IA he ‘aho kotoa pē ‘o ho’o mo’ui′.

‘Oku ke ‘ilo ho ‘Otua′ ‘oku ‘ikai te ne fiema’u ha me’a meiate kitaua – ‘oku ‘ikai ‘iate IA ha filifilimānako – ka ‘oku ne manako ke fafale mo feohi ma’upē mo koe. Talamai ‘e Semisi 4:8 – “’Unu’unu atu ki he ‘Otua′ pea ‘e ‘unu’unu mai IA kiate kimoutolu”. ‘I he veesi 30′, ‘oku ‘i ai ‘a e fo’i lea ai ko e Tui, veesi 32′, fo’i lea ai ko e Tamai, veesi 33′, fo’i lea ai ko e Fuofua (first). ‘I he Tohitapu′ ‘oku talamai ai ‘e Hepelū 11:6 – “Ka ‘ikai ha Tui ‘oku ‘ikai momo’i lava ke te fakahoifua ki he ‘Otua′”.

‘Oku ke ‘ilo koā ‘a e Tui′, ko ‘eta tuku ‘a e ‘Otua′ ke Ne fika ‘uluaki mo mu’omu’a ‘i he’eta me’a kotoa pē. ‘Oku fiema’u ‘e Sisu ‘a e ‘uluaki mōmeniti ‘o e ‘aho fo’ou kotoa pē ‘o ho’o mo’ui′ Ma’ana, ‘a e ‘uluaki ‘aho ‘o e uike kotoa pē Ma’ana, ‘a e ‘uluaki konga mei ho’o sieke vahe′ he uike kotoa pē Ma’ana.

‘Oku ‘ikai ke sai’ia ‘a Sisu ia ke Ne hoko ko e 1st runner up ‘i ho’omou Fili Misi Talavou′, pe sai’ia ke Ne hoko ko e Palesiteni Tokoni ‘i ho’o kautaha′. ‘Oku ‘ikai ke Ne sai’ia ia ke Ne hoko ko e 2nd Commander ‘i ho’o kau tau′. Ka ‘oku Ne fiema’u pē ‘e IA ke Ne hoko ko e Tu’i ‘oku Ne ‘afio ‘i Hono Taloni′ ko hota loto′, (Haleluia!) ‘o ‘ikai ko ha hoa ngāue lōua (co-partner in duplex).

‘Ikai ngata pē he’etau kumi ki he Tu’i′, ka ko Hono Pule’anga′ foki. Ko e fo’i lea Pule’anga′ ‘oku ‘uhinga ia ko e rule, pule pe pule’i (reign). Pea ko ‘etau kumi ki Hono Pule’anga′, ko e feitu’u ia ‘oku pule ai ‘a e Tu’i′, pea kuopau ke taungasino ‘i he’eta mo’ui′ kotoa ‘a e Pule ‘a e Tu’i ‘o e Pule’anga ‘o e ‘Alo ‘Ofa’anga ‘o e ‘Otua′ (Kolose 1:13b) ‘a ia ko Sisu Kalaisi!

Ko e me’a mu’omu’a taha he’etau fekumi ki he Pule’anga ‘o e ‘Otua′ ko ‘etau kumi ki Hono kolōlia′. Ko e konga kotoa pē mo e kofukofu kotoa pē ‘o ‘etau mo’ui′, miniti kotoa pē, momeniti ‘o hotau taimi′, ‘aunisi kotoa pē, pāuni kotoa pē ‘o hotau mālohi′ pe ivi′ (strength), uoua kotoa pē mo e kālava kotoa pē ‘i hotau sino′, ketau luva kotoa ia ko e langilangi’ia’anga ‘o e ‘Otua′. Mo’oni ‘a 1 Kol 10:31 – “Pe ko ‘etau kai, pe ko ‘etau inu, pe koe hā pē ha me’a te tau fai′, tau fai kotoa pē ke langilangi’ia ‘a e ‘Otua′”.

Na’e ‘i ai ha fine’eiki na’e puke ‘o fakatau atu ke mate. Pea ha’u hono kaungā’api′ ‘o ‘a’ahi ki ai ‘o ne ‘eke ange, pe ‘oku ne fiema’u pē ke mo’ui pe mate? Pea tali ange ‘e he fine’eiki′: “’Oku ou fiema’u pē ‘a e me’a ‘e hōhō’ia ai ‘a e ‘Otua′”. Talaange ‘e hono kaungā’api′: “Sai, fēfē ka refer atu pē ‘e he ‘Otua′ ia kiate koe, koe hā leva ho’o fili′?” Talaange ‘e he fine’eiki′, kapau ‘e refer mai pē ‘e he ‘Eiki′ kiate au te u hanga pē ‘o tuku atu (refer) to e fakafoki pē ‘a e me’a′ kiate IA”. Na’e tonu pea maau ‘a e ngaahi fakamu’omu’a ‘a e fine’eiki′. Pe te ke tui ki ai pe ‘ikai, ka ‘oku lelei ange ketau mate ‘i he finangalo ‘o e ‘Otua′ ‘i he’etau mo’ui nōnoa’ia ‘i tu’a mei he finangalo ‘o e ‘Otua′.

‘I he’etau kumi ‘o ‘ilo ‘a e Tu’i′ ‘oku Ne pule ‘i he Pule’anga ‘o e ‘Otua′ – kā ko e pau ia ketau kumi ki He’ene ma’oni’oni′. ‘Ikai ngata He’ene pule’i kitautolu′, ka kuo fotu pea e’a kitu’a mei he’etau to’onga mo’ui′. He kapau ‘oku pule ‘a e ‘Otua′ kiate koe mo au, ‘oku fa’o ‘i loto ‘iate kitaua ‘a ‘Ene ma’oni’oni′. Koe’uhí ko e ‘ulungaanga ‘o e tangata′ ‘oku hā ki tu’a′ – ko e ‘ulungaanga ia ‘o e tokotaha ‘oku ‘i loto′. ‘Oku ha’u meiate ia ‘ene ngaahi lea′, ‘ene ngaahi fakakaukau′ mo ‘ene ngaahi ngāue′. Ko e taimi ‘oku tau hanganaki kumi ai ki he Pule’anga ‘o e ‘Otua′, ‘oku malava leva ke sio ‘a e kakai′ ki he Pule’anga′ ‘iate kitautolu.

Ko e ma’oni’oni′ ko e taha ia ‘o e ngaahi tō’onga mo’ui ‘o e Pule’anga ‘o e ‘Otua′. Talamai ‘ia Loma 14:17 & 18: “He ko e Pule’anga ‘o e ‘Otua′ ‘oku ‘ikai ko ha kai mo ha inu, ka ko e ma’oni’oni mo e fiefia, mo e melino ‘i he Laumālie Mā’oni’oni′. Pea ko ia ‘oku ne fai’aki ia ‘a ‘ene tauhi kia Kalaisi′, ‘oku hoifua ai ‘a e ‘Otua′, pea ma’a’ia ai ‘a e kakai′”.

Kainga, hili ‘etau fokotu’utu’u ‘etau ngaahi priorities, ‘o tau tuku ke mu’omu’a taha pea fika ‘uluaki ‘a e ‘Otua′ through Jesus Christ ‘i he’etau me’a kotoa pē – pea toki fakamulituku mai ‘e Sisu He’ene Folofola′, “pea ‘e toki fakalahi ‘aki ‘a e ngaahi me’a ni kotoa pē kiate kimoutolu”. Ko e palōmesi ia ‘o e fakatu’amelie′ mei he ‘Eiki ko Sisu Kalaisi′. Ko e me’a kotoa pē ‘oku fai hōlinga ki ai ‘a e Senitaile ta’etui ‘Otua′, ‘e ‘oatu kotoa ia ma’amoutolu, ‘a e koloa′, ‘a e pa’anga′, me’akai lelei′, ‘a e fale faka’ofo’ofa′, ‘a e mo’ui lelei′ mo e vala lelei′, ‘a e tu’umālie fakamatelie′ mo e hāfua…hāfua! He kuo falala mai ‘a hotau ‘Otua′ kiate kitautolu. Kuo tonu ‘a ‘eta fokotu’utu’u ki he me’a fakamu’omu’a′ pea fika ‘uluaki he’eta mo’ui′ – ka ko e ‘Eiki ko Sisu Kalaisi′.

Fakamanatu atu – Seti ke tonu ho’o priorities ‘o fakatatau ki He’ene Folofola′ – ka ke hoko ko e faitapuekina koe ‘a e ‘Otua′.

Tu’a’ofa atu ki he Tonga kotoa.

Mosiana Fisi’ipeau.

Sponsor Advertisement

Be the first to comment on "Kaveinga: Fokotu’u ke Tonu ‘a e Me’a ‘oku ke Fakamu’omu’a ‘i ho’o Mo’ui′."

Leave a comment

This site uses Akismet to reduce spam. Learn how your comment data is processed.