Laumalie FakaSisipeli (Jezebel Spirit#2) – Falaite 9 ‘Aokosi 2019

Fa’u ‘e Linda Tu’ulakitau

Hoko atu . . .

‘E hoko atu pe ‘etau ako ki he ngaahi ‘otua na’e tauhi ki ai ‘a Sisipeli′ koe’uhí he ‘oku mahu’inga ketau ‘ilo ki ai koe’uhí kae lava ke mahino lelei kiate kitautolu ‘a e fa’ahinga natula totonu ‘o e laumalie ‘o Sisipeli′. Hangee pe ko e me’a na’a ku lave ki ai ‘aneafi′ ko e laumalie fakasisipeli′ ‘oku ‘ikai ke ‘i ai hano gender (pe ko e tangata pe fefine) ka ‘oku malava pe ke uluisino ‘a e fa’ahinga laumalie ko ‘eni′ ‘i ha tangata pe fefine.

‘I he’etau mahino’i lelei ‘a e fa’ahinga ‘otua na’e tauhi ki ai ‘a Sisipeli mo hono husepaniti ko Ehapi′, ‘e lava leva ketau mahino’i ‘a e fa’ahinga dark forces he laumalie ko ‘eni′.

Ko e ‘otua ‘o e kau Saitoni′

Na’e lotu ‘a e fa’ahinga kakai ko ‘eni′ ki he ongo ‘otua ‘e ua ko Peali (Baal) mo Asela (Ashtoreth). Ko e tangata’eiki ‘a Sisipeli′ ‘a Etipeali na’e ‘ikai ngata pe he’ene hoko ko e tu’i Saitoni′ ka ko e taula’eiki lahi (high priest) ia honau ‘otua′. Pea tupu hake ‘a Sisipeli ‘i ha famili na’a nau tauhi ki ha ongo ‘otua (pagan deities) ‘e ua ‘a ia ko Peali mo Asela.

Ko Asela – ‘otua fefine ‘o Sitoni

Na’e ‘i ai ‘a e ngaahi hingoa kehekehe na’e ‘iloa’aki ‘a Asela he hisitolia′ ‘a ia na’a ne ‘iloa ko e fefine mali ‘o hevani′ (bride of heaven), ‘otua fefine ‘o e ma’oni’oni′ (goddess of holiness), ‘otua fefine ‘o e tu’ulelei′ (goddess of good fortune) mo e kuini ‘o hevani′ (queen of heaven). Na’a ne to e ‘iloa ‘aki ‘a e ngaahi hingoa kehekehe hangee ko Aphrodite, Asherah, Ashtart, Astarte pea mo Ishtar. Ko Asela mo e laumalie sisipeli′ ‘oku na taha mo tatau pe (one and the same).

Ko Peali – ‘otua tangata ‘o Sitoni′

‘Oku pehee ‘e he hisitolia′ ko Asela′ (pe ko e laumalie fakasisipeli′) ko e uaifi ia ‘o Peali′, pea na’e pehee ‘e he fakamatala ‘e ni’ihi ko e fa’ee ia ‘a Peali′. ‘A ia ko Asela′ na’e ‘i ai ‘ene fekau’aki vāofi ‘aupito mo Peali, pea ‘i he’ene pehee ‘e ‘asi (manifest) ‘a e ngaahi ‘ulungaanga (traits or characteristics) tatau pe ‘ia Sisipeli′ ‘a ia na’e ma’u ‘e Peali′. Pea ‘i he’etau ‘ilo ‘a e fa’ahinga ‘ulungaanga (attributes) ‘o Peali mo Asela′, ‘e lava leva ketau to e ‘ilo loloto ange ki he anga ‘o e operation ‘a e laumalie sisipeli′.

Pehee ‘e he fakamatala ‘a e hisitolia′ ko Peali′ ko e ‘otua ia ‘o Kenani (Canaanite) ‘o e ‘uha′ mo e matangi′ (storm) pea mo e fakafanau′ (fertility). Ko e ‘uhinga faka-Hepelu ‘o e Peali′ ko e “’eiki” (lord), “pule” (master) pe ko e “husepaniti” (husband). Na’e to e ‘iloa’aki pe ‘a Peali ‘a e ngaahi hingoa hangee ko e ‘eiki ma’olunga ‘o e mamani′ (exalted lord of the earth), tokotaha heka/fononga he ‘ao′ (rider of the clouds), pea mo e ‘eiki ‘o e kolo′ (lord of the city). ‘A ia ko Peali ‘a e tefito’i ‘otua tangata ia ‘o e kau Finisia′ (Phoenicians) pe Saitoni′, pea ko Asela leva ‘enau tefito’i (principal) ‘otua fefine′. Na’e fakatou lotu mo hū lōua pe ‘a Ehapi mo Sisipeli kia Asela mo Peali. Na’e fokotu’u ‘e Ehapi ha ‘olita kia Peali ‘i he fale ‘o Peali kuo ne langa ‘i Samēlia′, ‘a ia na’e fai ai ha ngaahi ouau na’e tapui (forbidden) pea ne ‘omai ai ke to e fakautuutu ange ‘a e houhau ‘a Sihova′ (1 Tu’i 16:32). Na’e ‘alu pe ‘a e taimi′ mo e fakautuutu ‘a e tafoki ‘a e kakai ‘Isileli′ mei he’enau tauhi mo lotu ki honau ‘Otua mo’oni mo taha pē ko YHWH, ka nau tafoki ‘o tauhi mo lotu ki he ongo ‘otua loi (pagan deities) ko Peali mo Asela. Na’e a’u ki he tu’unga kuo tokolahi ange ‘a e kau lotu ki he ‘otua loi′ ‘iate kinautolu na’a nau tauhi ‘a e ‘Otua mo’oni mo taha pē ‘o ‘Isileli′.

Kapau te tau sio kimui ki he hisitolia ‘o e tohitapu′ he taimi na’e hu ai kitu’a ‘a ha’a ‘Isileli mei ‘Isipite′, na’a nau ngaohi hanau ‘otua tamapua ko ha kafi pe pulu (calf/bull) ‘onau hu ki ai he toafa′ (wilderness), ko ‘enau lotu tatau ia na’e fai kia Peali′ (‘a ia na’e ‘osi depicted pe ia ‘aki ha ki’i pulu tamapua).

Kapau te tau sio ki he talanoa ko ia ‘o e Folofola′ ‘ia Ekisoto 32 he taimi na’e ‘alu ai ‘a Mosese ki he mo’unga′ ke ‘omai ‘a e fekau ‘e hongofulu′, pea te’eki ai hifo ‘a Mosese mei he mo’unga′ mo e fekau ‘e hongofulu′, kuo fai ‘a ‘Elone ia ki he me’a na’e fiema’u ‘e he kakai′ ‘o nau fa’u ha kaafi ukamea koe’uhí kenau hu ‘o lotu mo feilaulau ki ai pea nau pehee: “Ko eni, ‘e ha’a ‘Isileli ho ‘Otua′, ‘a ia ne ne ‘ohake koe mei ‘Isipite′”. (‘Ekisoto 32:4). Kuo ‘alu honau taki′ ‘a Mosese, kae hanga ‘e he laumalie ‘o Peali′ ‘o tohoaki kinautolu kenau ngaahi ‘otua tamapua fa’u ‘aki ‘enau ngaahi spoils mei ‘Isipite′ pea nau langa ha ‘olita ki ai ‘onau hu ki ai mo nau feilaulau ki ai kae tuku ‘enau hu mo tauhi ki honau ‘Otua′ ‘oku taha pē ‘a YHWH. Pea ko e fu’u tauhi ‘aitoli mata’ā’ā ia ‘i he vakai mai ‘a e ‘Otua′ ‘a ia na’e tohoaki ki ai ‘a e kau ‘Isileli′ ‘e he demonic powers ‘o Peali′.

‘Oku mahino mei he Folofola′ ko e characteristic ‘e taha ‘o Peali ko ‘ene malava ke palofisai (prophesy). He ko Peali ko e ‘otua ‘o e prophetic divination. Kapau te tau sio ki he fe’auhi fakahāhā na’e hoko ki he Palofita ‘a e ‘Otua′ ko ‘Ilaisia′ mo e fu’u kau palofita ‘a Peali ‘e toko 450 pehee ki he kau palofita ‘a Asela ‘e toko 400 ‘i Mo’unga Kameli′. ‘Oku tau ako ai ‘a e me’a ko ‘eni′, ko e taimi koee na’e fekau ai ‘e ‘Ilaisia kenau tautapa ki honau ‘otua′ ‘a Peali,′ na’e mahino mei ai na’e tui ‘a e kau palofita ‘a Peali′ ‘e lea honau ‘otua′ ‘o fakafou ‘iate kinautolu (through them). Na’a nau tui ‘e palofisai honau ‘otua′ ‘o fakafou ‘iate kinautolu. Pea talamai ‘e he Folofola′: “Pea nau kalanga le’o lahi, pea nau fefoafoa’aki ‘a e heletā mo e tao, he ko honau anga′ ia, kae’oua ke fetāfe’i ‘a e toto′ ‘i honau sino′. Pea ‘i he faifai pea pale ‘a e la’aa′, pea nau fa’ahikehe’ia, ‘o fai ‘enau valelau, ‘o a’u atu ki he feitu’ula’ā ‘o e ‘oatu ‘o e feilaulau-me’akai′: ka na’e ‘ikai ha le’o, pea na’e ‘ikai ha taha ‘e tali pea na’e ‘ikai ha taha ‘e tokanga mai”.

(1 Tu’i 18:28-29). ‘Oku tau to e ako ai ki he fa’ahinga founga ‘a Peali′ ‘oku nau to e self-afflict pe ‘enautolu ‘anautolu ‘aki ‘enau hele mo fefoafoa’aki honau sino′ kae ‘oleva kuo fetaafe’i honau toto′, pea ‘oku hangee ‘oku nau fonu fa’ahikehe′ ‘i he anga ‘enau valelau′.

Na’e hanga ‘e Kuini Sisipeli ‘o ako’i e kau palofita Peali′ kenau lava ‘o vavanga mo palofisai fakatevolo.

‘Oku to e fakamatala foki ‘a e hisitolia′ ko Peali′ ko e foha ia ‘o e ‘otua ‘e taha ko Takoni (Dagon). Ko Takoni′ ko e ‘otua ia ‘o e fanau/fakafanau′ (god of fertility) pe ko e ‘otua ia ‘o e holi kovi ‘o e kakano′. ‘Oku pehee ko Takoni ko e tama tau (warrior) ‘a ia na’a ne tau’i hono ngaahi fili tokolahi na’a nau fakafepaki’i ‘ene pule′, pea na’a ne iku mate, pea na’e to e fanau’i fo’ou mai ia (born again) ‘a ia ko e taha ‘eni ‘o e ngaahi fo’i tui hala. Na’e pehee ko Takoni′ na’e fefononga’aki mei he feitu’u ki he feitu’u ‘o fakafou pe ‘i he’ene fakakaukau/misi′ (fantasy). Pea ko hono fakafe’ao′ ko Asela, ‘a ia na’e to e ‘iloa pe ko e uaifi ‘o Peali′. Pea ‘oku ‘osi mahino pe ‘a e fa’ahinga mo’ui ‘a Asela′ ‘i hono reveal mai he’ene feohi vāofi ki he ‘otua ‘o e holi kovi′ ‘a Takoni′.

Ko Takoni′ ko e to e ‘otua pe ia ‘o e kau Filisitia′ ‘a ia na’a nau ‘ave ‘a e ‘a’ake ‘o e kovinanite ‘a e ‘Otua′ ‘o nau tuku ia he temipale ‘o e ‘otua loi ko ‘eni ko Takoni. Pea ko e nunu’a na’e hoko kia Takoni′ ‘i he lotolotonga ‘o Sihova′ (presence of God), ko e fa’ahinga nunu’a pe iku’anga tatau pe ia na’e hoko kia Kuini Sisipeli′ (2 Tu’I 9:35). Na’e iku li loua kinaua ki lalo.

Toki hoko atu . . .

Sponsor Advertisement

Be the first to comment on "Laumalie FakaSisipeli (Jezebel Spirit#2) – Falaite 9 ‘Aokosi 2019"

Leave a comment

This site uses Akismet to reduce spam. Learn how your comment data is processed.