Ko e Laumalie Fakasisipeli′ ‘i he’ene ‘Asi ‘i he Tohitapu′ (Jezebel Spirit#5).

Fa’u ‘e Linda Tu’ulakitau

Folofola ke Lau: 1 Tu’i 18 – 1 Tu’i 19; Matiu 14:1-12; Fakaha 2:20-23

‘Oku ou tui pe ‘oku tau fakatokanga’i ko e fa’ahinga laumalie maumau mo faka’auha tatau ‘a ia na’a ne faka’auha ‘a e kau Palofita ‘a e ‘Otua′ he taimi ‘o ‘Ilaisiaa′ pea ne feinga ke faka’auha ‘a e laumalie palofisai′ (spirit of prophecy) ‘i he Siasi ‘i Taiataila′, ko e fa’ahinga laumalie tatau pe ia ‘oku lolotonga ngaue malohi ‘i hotau kuonga′ he ngaahi ‘aho ni. Kuo liliu ‘a e human personalities ka ko e demonic entities na’a nau faka’ai’ai ‘a Kuini Sisipeli ‘o e Fuakava Motu’a′ pea mo e fefine ko Sisipeli ‘o e Fuakava Fo’ou′ ‘oku kei tatau pe ia he ngaahi ‘aho ni. Ko e fa’ahinga laumalie tatau pe ia ‘oku ne fakatupunga ‘a e maumau lahi ‘oku hoko he mo’ui fakafo’ituitui′, mo’ui ‘a e famili′, mo’ui ‘a e Siasi′ pehee ki he fonua′ mo e ngaahi pule’anga′. Ko e ngaahi maumau lahi ‘oku hoko he Siasi ‘o e ‘Otua′ he ngaahi ‘aho ni ‘oku toitoi mei mui ai ‘a e laumalie ‘o sisipeli′, pea ‘oku matu’aki mahu’inga ketau mahino’i ‘a e fa’ahinga laumalie fakatu’utamaki ko ‘eni′.

‘I he taimi te ke move ai ‘i he tafa’aki faka-palofita′ (prophetic), ‘o ke tatala ai ‘a e lea ‘a e ‘Otua′, ‘e lava ai ke tau’ataina ‘a e popula′ pea hoko ‘a e lea ‘a e ‘Otua′ ko e faka-maama mo e taki hala ki he mo’ui ‘a e kakai.′ Te ke fehangahangai mo e ngaahi ‘ohofi ‘e fai ‘e he laumalie fakasisipeli′ ki ho’o mo’ui′ koe’uhí he ‘oku ‘ikai te ne loto ke tau’ataina ‘a kinautolu ‘oku ne ha’i popula′, pea ‘oku ‘ikai ke ne loto ke hulungia kinautolu ‘e he maama ‘a e ‘Otua′. Pea te ne ‘ohofi lahi ho’o mo’ui′, tautefito kapau ko ha Faifekau (Pastor) koe, taki ‘o ha potungaue, taki ‘o ha ngaue’anga pe ko e taki ‘o ha famili. ‘Oku feinga ‘a e laumalie fakasisipeli′ ke ne tapuni’i ‘a e lea pe ko e folofola ‘a e ‘Otua′ ‘a ia ‘oku ne ‘omai ‘a e faka-maama′, taki hala′, faka-lotolahi′ pea mo e faka-fua′ ki he mo’ui ‘a e tangata′.

‘Oku tu’o tolu ‘i he Tohitapu′ ‘a e ‘asi ai ‘a e laumalie fakasisipeli′.

  1. 1 Tu’i 18:4 – ‘a ia na’e ‘asi ai ‘a e laumalie fakasisipeli′ ‘i hono hanga ‘e Kuini Sisipeli ‘o faka’auha ‘a e kau Palofita ‘a e ‘Otua.′
  2. Matiu 14:1-12 – na’e ‘asi ‘a e laumalie fakasisipeli′ ‘ia Kuini Helotiasi ‘a ia na’a ne fakaloto’i hono ‘ofefine′ ke ne kole ki he Tu’i′ (Helota) ‘oku ne fiema’u ke tu’usi ‘a e ‘ulu ‘o Sione Papitaiso′, pea na’e ‘omi hono ‘ulu′ kiate ia ‘i ha peleti!
  3. Fakaha 2:20-23 – ‘asi ‘a e laumalie fakasisipeli′ ‘i he Siasi ‘i Taiataila′ ‘a ia na’e pehee ‘e he ‘Eiki′ ‘oku ne kovi’ia ‘iate kinautolu koe’uhí ko ‘enau kataki’i (tolerate) ‘a e fefine ko Sisipeli.′

‘I he ngaahi fonua mo e pule’anga lahi ‘i mamani, ko e laumalie fakasisipeli′ ‘oku ne fakatupunga ‘a e lotosi’i, holomui mo e to lalo (downfall) ‘a e kau Faifekau′ mo e kau Palofita tokolahi ‘a e ‘Otua′ ‘a ia na’a nau lea kakaha ‘i he Folofola ‘a e ‘Otua′ pea pani makehe kinautolu ‘e he Laumalie Ma’oni’oni′ kimu’a he’enau mo’ui′ mo ‘enau ministry. Tokolahi ‘a e kau tangata mo e kau fefine ‘a e ‘Otua′ ‘i he Siasi′ pe ko e ministries ‘oku nau feinga kenau fakafepaki’i ‘a e fa’ahinga ongo (urge) kiate kinautolu kenau li’aki pe hola (flee) mei he ui ‘a e ‘Eiki ki he’enau mo’ui.′ Pea a’u pe kuo tokolahi ‘a e kakai na’e me’a ngaue’aki ‘e he ‘Eiki′ ‘i Hono Siasi′ pe ko e ministries kuo nau li’aki honau ui′ kanau flee (hola) mei he laumalie sisipeli′ ‘a ia ‘oku ne kapui ‘a e Siasi′ ‘o tatau tofu pe mo e hola na’e fai ‘e he Palofita ‘a e ‘Otua′ ko ‘Ilaisiaa he taimi na’e kumi ai ‘e Kuini Sisipeli ke faka’auha ‘ene mo’ui′. Taha ‘o ‘eku Pastor (‘i he taimi na’a ku kei ‘i hoku ta’u 20’s ai′) na’e fu’u pani ‘aupito ‘a e taimi na’a ne malanga’i ai ‘a e Folofola′, pea na’a ku look forward ma’upe he Sapate kotoa keu ‘alu ‘o fanongo ki he’ene malanga′. Ka na’a ne hiki mo hono hoa′ mo ‘ena ki’i fanau′ ki he vahefonua ‘e taha ‘o hoko ko ‘enau Senior Pastor ‘a e Siasi lahi ai. ‘Osi e ngaahi ta’u lahi ‘ene hoko ko e Senior Pastor ‘o e Siasi ko ia′, pea u ‘ohovale he’eku lau ‘a e news kuo ne fakafisi mei hono lakanga′ koe’uhí ko e fekau ‘e he Poate′ kene fakafisi mei hono lakanga′, pea na’e mavahe ‘a e Pastor ko ‘eni′ mo e loto mamahi lahi. Ka ko e me’a na’e mahino kiate au he’eku sio ki he case ko ‘eni′ ko e ngaue ia ‘a e laumalie sisipeli′ ‘o fakafou he ni’ihi ‘o e Poate′ ke faka’auha e mo’ui ‘a e Faifekau′ mei he ui ‘a e ‘Eiki′ ki he’ene mo’ui′. Lahi ‘aupito mo e ngaahi Siasi mo e ngaahi ministries ‘i he ngaahi fonua kehekehe ‘o mamani kuo maumau mo ‘auha ko e ngaue ‘a e laumalie ko ‘eni′. Ko e laumalie sisipeli′ ko e laumalie (evil spirit) ia ‘oku ne ‘omai ‘a e manavahee (fear), depression mo e ongo’i ta’e’aonga′ (futility), ongo’i ta’eha ‘amanaki (hopelessness) tautefito ki he kakai na’a nau malanga’i malohi ‘a e Folofola ‘a e ‘Otua′ kimu’a he’enau mo’ui′. ‘Oku ‘ikai totonu ketau manavahee ki he laumalie sisipeli′, ka ‘oku totonu ketau expose ‘ene ngaahi founga′ (tactics) ki he maama ‘o e mo’oni ‘a e ‘Otua′ koe’uhí ke ‘oua na’a tau tō ‘i he’ene ngaahi tauhele′ (schemes) ‘a ia ko hono nunu’a′ ko e puputu’u (confusion), fetu’usi (division), mo e ta’e’iai ha ‘amanaki (despair).

Fehu’i: ‘Oku faka-tohitapu nai ke ui ha laumalie fakatevolo (demonic spirit) ‘aki ha hingoa hangee ko e laumalie sisipeli′?

Tau sio angee ki hono ngaue’aki ‘o e fo’i lea laumalie (spirit) ‘i he Tohitapu′.

  1. ‘Oku ngaue’aki ‘a e Laumalie′ ke ‘uhinga ki he ‘Otua′ ka ‘oku fa’a muimui mai ai ‘a e fo’i lea ko e Ma’oni’oni. ‘A ia ko e Laumalie Ma’oni’oni′ ko e pesona (person) fika tolu ia ‘o e ‘Otua′ (Godhead). He ‘oku taha pe ‘a e ‘Otua′ (only one God) ka ‘oku manifested ‘i he pesona ‘e tolu (three persons) – ‘Otua ko e Tamai, ‘Otua ko e ‘Alo mo e ‘Otua ko e Laumalie Ma’oni’oni. (Matiu 28:19; 1 Pita 1:1-2; 2 Kolinito 3:17).
  • Ko e fo’i lea laumalie′ ‘oku ngaue’aki ‘e he Tohitapu′ ke ‘uhinga ki he laumalie ‘o e tangata′ (human spirit) (1 Tesalonaika 5:23).
  • Ko e fo’i lea laumalie′ ‘oku ngaue’aki ‘e he Tohitapu′ ke ‘uhinga ki he fa’ahinga pule, fa’ahinga ma’u tu’unga, hou’eiki fakaleveleva ‘o e fakapo’uli′, mo e ngaahi kongakau laumalie ‘o e kovi′ (evil spirits, demonic spirits) – (‘Efeso 6:10-12; Luke 8:30; Matiu 12:45; 1 Kolinito 10:20-21).
  • Ko e fo’i lea laumalie′ ‘oku to e ngaue’aki pe ia ‘e he Tohitapu′ ke ‘uhinga ki ha me’a lelei (positive). Hangee ko ‘eni′, na’e pehee ‘e Sisu ko Sione Papitaiso ‘oku ne ngaue (move) ‘i he laumalie ‘o ‘Ilaisiaa, ‘a ia ko e fakakakato ia ‘a e palofisai ‘a Malakai′ (Malakai 4:5-6). Na’e pehee ‘e Sisu ko e laumalie ‘o ‘Ilaisiaa ‘oku ‘ia Sione Papitaiso ia. ‘Oku ‘ikai ke ‘uhinga heni ‘a Sisu ki he human spirit ‘o ‘Ilaisiaa, ka ‘oku ‘uhinga heni ‘a Sisu ki he fa’ahinga ‘ulungaanga (attitude) pe fa’ahinga mafai (authority) ‘o e Palofita ko ‘Ilaisiaa na’e ‘ia Sione Papitaiso ia. (Matiu 11:11-15); Matiu 17:10-13). ‘I he ngaahi veesi ko ‘eni′ ‘oku ‘uhinga ai ‘a Sisu ko Sione Papitaiso na’a ne ma’u ‘a e fa’ahinga pani (anointing) pe ko e fa’ahinga ui (calling) ‘o ‘Ilaisiaa, ‘a ia na’e hanga ‘e Sione Papitaiso ‘o palofisai ‘a e hoko mai ‘a e Misaia′, na’a ne fakahaa’i mata’ā’ā ‘a e angahala′ pea ne ui ‘a e kakai′ kenau tafoki mei he angahala′ ‘o fakatomala. Na’e fekau ‘e he ‘Otua′ ha ‘angelo ke ne fakahaa kia Sakalaia ko hono foha ko Sione Papitaiso′ te ne fonu ‘i he Laumalie Ma’oni’oni′ ‘o kamata pe mei he manava ‘o ‘ene fa’ee′, pea te ne fakamelomelo ki he Misaia′ ‘i he tatau ‘o e anga mo e ivi ‘o ‘Ilaisiaa′. (Luke 1:12-17).

‘Oku ou fakatokanga’i he taimi ‘oku ou ako ai ‘a e Folofola′, ‘oku ‘i ai ‘a e ngaahi laumalie (spirits) ‘oku toutou ‘asi, pe toutou hoko (recurring) ‘i he ngaahi kuonga′ (throughout time), ‘a ia ‘oku ‘asi (manifest) ‘i he kakai′. Tau fakatokanga’i ‘i he ngaahi deliverance ministries, ‘oku fa’a hanga ‘e he tangata pe ko e fefine ‘oku ui ‘e he ‘Otua′ ki he deliverance ministries ‘o fa’a expose ‘a e ngaahi laumalie ‘uli′ (evil spirits) mo e ngaahi laumalie fakatevolo′ (demonic spirits) ‘a ia ‘oku makatu’unga ai ‘a e mo’ua pe tofanga ‘a e kakai′ he faingata’a′, palopalema′ pe puke ‘a e sino, ‘atamai mo e laumalie′.

Ko e fo’i lea ko e “laumalie sisipeli” pe ko e “laumalie faka-sisipeli′” ‘oku ‘uhinga ia ki he fu’u fa’ahinga pule, ma’u tu’unga pe kongakau laumalie ‘o e kovi′ mo e tevolo′ (demonic/evil spirit/ principalities) ‘a ia na’e ‘asi (manifested) ‘i he mo’ui ‘a Kuini Sisipeli′, uaifi ‘o Kingi Ehapi′, to e ‘asi ‘ia Kuini Helotiasi, uaifi ‘o Kingi Helota′, ‘oku ou tui na’e ‘asi ‘ia Tilila, uaifi ‘o Samisoni′, pea to e ‘asi pe ‘a e laumalie sisipeli′ ‘i he Siasi ‘i Taiataila′, taha ‘o e ngaahi Siasi ‘i Asia Minor ‘i he Tohi ‘a Fakahā′.

Toki hoko atu . . .

Sponsor Advertisement

Be the first to comment on "Ko e Laumalie Fakasisipeli′ ‘i he’ene ‘Asi ‘i he Tohitapu′ (Jezebel Spirit#5)."

Leave a comment

This site uses Akismet to reduce spam. Learn how your comment data is processed.