Fiema’u ‘o e Ta’u 2020!

Fa’u ‘e Linda Tu’ulakitau

‘Oku tau fakafeta’i lahi ki he ‘Eiki′ ‘Ene taulama hao kuo fai ma’a ‘etau mo’ui′ ‘otau to e tu’uta ai ‘i he ‘uluaki uike ‘o e ta’u 2020.  

‘I he’etau fononga’ia ‘a e ta’u 2020′, ‘oku tau fiema’u ketau toe hiki ki ha lēvolo fo’ou ‘o ‘etau fekumi mo ‘etau feohi pea mo e ‘Otua′. Ko e ta’u fo’ou kotoa pē ‘oku ne ‘omai ‘a e fakakaukau ko ‘eni′ ko e ngata’anga ia ‘o e ngaahi me’a motu’a′ pea ko e kamata’anga ia ‘o ha me’a fo’ou.

‘Oku ou tui ‘oku mou ‘inasi tatau pea mo au pea mo hoku ki’i fāmili′ ‘i he faka’amu pea mo e fiema’u ‘i he ta’u fo’ou ko ‘eni′ ketau fononga ‘i he lēvolo ‘o e kolōlia ‘a e ‘Otua′. Kae hangē ko e me’a kuo mou ‘osi mea’i′, ‘oku ‘ikai ko ha me’a ‘e ‘otomētiki pē ‘ene hoko mai′ pe ko ‘etau a’usia′. Ka ko e pau ia ke ‘i ai ‘a e me’a tetau totongi (price) ketau a’usia ai ‘a e kolōlia ‘o e ‘Otua′. Talamai ‘e Sisu ‘ia Matiu 5:6 – “Monu’iaā ka ko kinautolu ‘o ka fie kai mo fie inu ki he mā’oni’oni′: he ‘e fakamākona ‘a kinautolu”. Kapau ‘oku tau fiema’u ke hoko ‘a e ta’u 2020′ ko ha ta’u ia ‘o ‘etau ‘unu’unu atu ketau to e vāofi ange pea mo e ‘Otua′ pea kuopau ketau fiekaia mo fieinua ki he mā’oni’oni ‘a e ‘Otua′. Kuopau ketau fiekaia mo fieinua lahi ki he ‘Otua′. Ko ‘etau fiema’u vivili taha′ pē ia ko e ‘Otua′. Ko e me’a pē ia ‘e taha tetau loto ai ketau totongi ‘a e price, ko ‘etau ma’u ‘a e fa’ahinga fiekaia mo fieinua vivili mo’oni ‘i hotau loto′ ki he ‘Otua′. He’ikai ke ‘i ai ha kākākunga ‘o e ki’i price ‘oku tau totongi′ ki he fu’u lelei ta’efakangatangata tetau ma’u he’etau feohi vāofi ‘o taha pea mo e ‘Otua′. Ka neongo ia, ko e toko lahi ‘o kitautolu ‘oku tau holomui mei he’etau fekumi ketau feohi loloto ange mo e ‘Otua′ koe’uhi′ ko e ‘ikai ketau loto ketau pay the price.

Kapau na’a ko e ngaahi ta’u kimu’a′ na’a ku lahi ange au kae si’i ‘a e ‘Otua′ ia, ka ko e ta’u 2020′ ko e ta’u ia ‘o e poletaki ‘a e mo’ui′ ke lahi ange ‘a e ‘Otua′ kau si’i ange au (more of Him and less of me). Ko e ta’u ia ke ngata ai ‘emau fakalele ‘a e Ministry′ kae hoko mai ‘a e ‘Otua′ ‘i Hono Laumālie′ ‘o fakalele ‘Ene Ministry′ ‘iate kimautolu. Ko e ta’u ‘o ‘emau holomui kakato kimui kae hoko mai ‘a e ‘Otua′ ‘o fai ‘a e me’a ‘oku Ne fie fai He’ene Ministry′ koe’uhi′ kae a’u atu ‘Ene fakamo’ui′ ki he māmani ko ‘eni′. He ko e fiema’u vivili ‘a e māmani mole ko ‘eni′ ko e ‘Eiki ko Sisu Kalaisi.′ Ko e ola koē ‘e lau ta’u ha’atau feinga ke tau a’u ki ai′ ‘oku malava ‘e he ‘Otua′ ‘o fakahoko pē ia ‘i ha houa pe ha miniti pe ha sekoni pē ‘e taha. Ko e ‘Otua′ IA ‘oku Ne malava ke Ne a’u atu ‘o ala ki he loto mo e mo’ui ‘a e kakai′ ‘o liliu kinautolu ki ‘Itaniti. Ko e taimi ‘oku ‘i ai ‘a e Lotolotonga pea mo e Kolōlia ‘o e ‘Otua′ ‘i ha feitu’u, ‘oku ‘i ai ‘a e healing ‘i he tapa kotoa ‘o e mo’ui′, ‘oku ‘i ai ‘a e fakatau’atāina′, ‘oku ‘i ai ‘a e fakaakeake′, ‘oku ‘i ai ‘a e mana′ mo e ngaahi ngāue fakaofo′ etc.

‘Oku ‘ikai fiema’u ‘e māmani ho’o Ministry pe ko ‘emau Ministry. Ko e Ministry ‘a e ‘Eiki ko Sisu Kalaisi′ ‘oku nau fekumi ki ai′ pea ‘oku nau fiema’u vivili′. Ko ia ai, ‘oku tau fiema’u ‘a Hono Lotolotonga′ pe ko Hono Fōtunga′ (His Presence) ke ‘iate kitautolu pea ‘alu mo kitautolu – ‘ikai ngata ‘etau fiema’u ‘a hono Intangible Presence ka ‘oku tau fiema’u foki ‘a Hono Manifested Glory ‘a ia ‘e toki hoko mai pē ia kiate kinautolu ‘oku nau kumi hākili kiate IA′ pea nau fiekaia mo’oni kenau ‘unu’unu vāofi ange kiate IA′. ‘Oku tau fiema’u ‘a Hono glory realm ‘o hangē pē ko ia na’e fiema’u ‘e Kingi Solomone′.

Tuku mu’a ke hoko ‘a e 2020′ ko ha ta’u ia ketau toe fekumi ange ai pea tau to e ‘unu’unu ange ai ketau vāofi ange pea to e fakaloloto ange ‘etau feohi pea mo e ‘Otua′. Ko e ta’u ‘o ‘etau to e faka’utumauku ange ‘i he lotu lilo′ pea mo e ‘aukai.′ Ko e ta’u ‘o ‘etau nofo mālohi ange ki hono lau mo ako ‘Ene Folofola′, pea tau fakalaulauloto ki He’ene Folofola.′ Ko e ta’u ‘o ‘etau hū ki tu’a ‘o fai ‘a ‘Ene ngāue′ ‘i he ivi mo e mālohi ‘o Hono Laumālie Mā’oni’oni.′ Pea ‘i he’etau feohi vāofi mo taha mo e ‘Otua′ pea tetau hū atu ki Hono glory realm. ‘I Hono glory realm, tetau liliu ta’engata ai. ‘I Hono glory realm, ‘e ‘i ai ‘a e fakaakeake lahi ‘i Hono Siasi′. ‘I Hono glory realm, ‘e ‘i ai ‘a e ngaahi fakamo’ui (healing), mana mo e ngaahi ngāue fakaofo ‘a e ‘Otua′ ‘i Hono Siasi′ pea ‘i he feitu’u kotoa pē tetau tu’u ai ke fai ‘Ene ngāue′, pea ‘i ho’o mo’ui′ mo ‘eku mo’ui′ fakafo’ituitui. ‘I hono glory realm, tetau to e fiekaia ange ai ki he ‘Otua′. Pea koe’uhi′ ko e fa’ahinga fiekaia ‘i hotau laumālie′ ki he ‘Otua′, tetau nofo mo mo’ui faka’aho ‘i Hono realm of glory. Pea hangē ko e lau ‘a 2 Kolinito 3:18 – “’oku tau liliu ai ki Hono ‘imisi ko ia′, ‘o fai mei ha langilangi ki ha langilangi, ‘o hangē ai pē ko e ngāue ‘a e ‘Eiki ko LAUMĀLIE′”. Fakafeta’i ki he ‘Eiki′! Haleluiā! 

‘Ofa atu ki he taha kotoa pē ‘oku ke fa’a ‘ahia mai ‘a e ki’i Peesi ‘a e God-be-Glorified Ministries. ‘Ofa ke mou ma’u ha ta’u fo’ou fonu ‘i he ngaahi tāpuaki mo e kelesi kotoa pē ‘a e ‘Otua′.

‘Ofa lahi atu,

 Charlotte Linda Tu’ulakitau.

Be the first to comment

Leave a Reply

This site uses Akismet to reduce spam. Learn how your comment data is processed.