Kaveinga: Stay Connect!

Fa’u ‘e Linda Tu’ulakitau

Text: Filipai 4:6-8

‘Oku ou talitali loto fiefia mo’oni ‘a e tokotaha kotoa pē ‘oku ke me’a mai ki he ki’i Peesi ko ‘eni ‘a e GBG ‘i he Huafa ‘o hotau ‘Eiki Huhu’i′ ‘a Sisu Kalaisi. Ko e Folofola′ ‘oku to’o ia meia Filipai 4:6-8.

‘Oku mahu’inga ‘aupito kiate koe mo au ke ‘i ai hotau vā fakafo’ituitui (relationship) mo hotau ‘Otua′ ‘i he’etau stay connect kiate IA he ‘aho kotoa pē ‘o hangē ko ia ‘oku lea ki ai ‘a e veesi 6 ‘o ‘etau Folofola ‘o e ‘aho ni′ – “ke ‘oua na’a tau tokanga mamahi ki ha me’a ‘e taha, kae fakahā ‘aki ‘etau holi′ ‘i he me’a kotoa pē ki he ‘Otua′, ‘i he lotu mo e lotu tauma’u pea fai mo e fakafeta’i”. Pea ‘oku toki hifo mai ‘a e melino ‘a e ‘Otua′ ‘a ē ‘oku mama’o atu ‘i he ngata’anga ‘o ‘eta ‘ilo′ ‘o malu’i hota loto′ mo hota laumālie′ ‘ia Kalaisi Sisu. Haleluiā! (veesi 7).

Ko e vahe 4 ko eni ‘o e tohi ‘a Paula ki Filipai′ – ko e fakamā’opo’opo ia ‘o ‘Ene tohi.′ ‘A ‘ene feinga ki he ki’i Siasi′ kenau loto taha. Tautefito ‘ene akonaki′ ki he kakai fefine ‘o e ki’i Siasi′ (v. 2,3) ‘a e mahu’inga kenau ngāue fakataha mo lototaha. ‘Oku ou tui ‘oku fa’a depend ‘a e lelei mo e kovi ‘a e Siasi′ he taimi lahi mei he kau fefine ‘o e Siasi′. Kapau ko e kau fefine manako ki he stay connect – feohi fakafo’ituitui mo e ‘Otua′ ‘i he lotu, moe hufia pea fai moe fakafeta’i. Pea ‘oku hoko ‘ae Siasi′ koe Siasi melino, Siasi ‘oku nau taha, faaitaha, lototaha. Pea ‘oku hoko koe Siasi mo’ui fiefia moe Siasi IKUNA.

He koe me’a ia na’e ikuna kafakafa ai ‘e Sisu ‘a e kolosi′ koe’uhí ko ‘ena taha pē mo e Tamai′. Na’a ne ‘i māmani′ ke fakakakato ‘a e palani fakamo’ui ‘a e Tamai′ ki he māmani ko ‘eni′ – ka ‘i he taimi tatau, na’a ne kei stay connect pē ki he’ene Tamai′. Na’a ne fai pē ‘ene ngaahi ngāue′ ka na’e ‘ikai tene fai ‘iate IA pē – ka na’e kei fakapolokalama’i pē mei Hevani mei he’ene Tamai.′ Na’a ne lotu ma’u pē ‘o kumi ivi ki he Tamai′ ke ne lava’i’aki ‘a e kāfakāfa ‘o e ngāue na’a ne ha’anu hifo ai ki māmani′, ‘i Ketisemani′ ‘o a’u pē ki he kolosi′ mo ‘ene connect pē ki he’ene Tamai′. “Tamai, fakamolemole’i ‘a e kakai ni, he ‘oku ‘ikai tenau ‘ilo ‘a e me’a ‘oku nau fai′”. Ko e kupu’i lea ia mei he fitu’i lea ‘o e kolosi′ ‘oku ne fakamā’opo’opo ‘a e ngāue ‘o e kolosi′. Kuo LAVA pea KUO ‘OSI! Kuo mo’ui ‘a mamani! Kuo malava ke fakamolemole ‘eta angahala′.

Koe hā ‘a e tu’unga ‘o ‘eta fetu’utaki mo hota ‘Otua′ he ta’u ko ‘eni′? Kuo kamata ‘eta fononga’ia ‘a e ta’u fo’ou ko ‘eni′, ka ko e fehu’i′: ‘Oku fēfē ‘a ‘eta STAY connect? ‘Oku ta spend hota taimi′ ‘ata’ataā he stay connect mo hota ‘Otua′ ‘i he lotu mo e hufia, fai mo e fa’a fakafeta’i pe ‘oku ta stay connect pē kitaua ki he facebook′ mo e ngaahi me’a kehekehe ‘o e mamani′ he ‘aho mo e pō ‘o ta mo’umo’ua ai hota taimi′, kae ‘ikai ha taimi ia ‘e ‘oange ma’ae ‘Eiki′?

‘I he lahi ange ‘a ‘eta spend time mo e ‘Eiki′ ‘i he lilo′ he’eta manako keta fakafo’ituitui Mo IA ‘i he hū (worship) mo e fa’a fakafeta’i, lau ‘Ene folofola′, pea te fakalaulauloto ki ai – pea ‘oku Ne hiki kita ki ha levolo fo’ou ‘o e mo’ui′ ‘i he ‘aho kotoa pē. Ko e ngaahi me’a koee ‘o e mo’ui matelie′ na’a te depend ai′ kuo kamata ke tāututuku atu – te Ne tāpuaki’i ‘eta me’a kotoa pē ‘oku fai′ – ka ‘i loto ‘iate koe′ ko e fakafeta’i pē mo e fakamālō mo e loto fonu he hounga’ia. ‘Oku Ne toho kitautolu He’ene founga′ ketau manako ke tau stay connect mo IA ka Ne hiki kitautolu ki Hono levolo′ ketau ‘a’eva mo IA ‘i he fiefia, melino mo e IKUNA ‘i he ta’u 2020.′

Pea toki lea faka’osi mai ‘a e ‘Aposetolo ki Filipai′ mo kitaua ‘i he ta’u fo’ou ko ‘eni.′ Mālō ‘aupito ‘a ‘etau stay connect ki he ‘Otua′ kae ‘ilonga ‘a e ngaahi me’a ‘oku mo’oni′, ke ‘ilonga ‘a e ngaahi me’a ‘oku matamata lelei′, ke ‘ilonga ‘a e ngaahi me’a ‘oku totonu′, ke ‘ilonga ‘a e ngaahi me’a ‘oku mā’oni’oni′, ke ‘ilonga ‘a e ngaahi me’a ‘oku faka’ofo’ofa′, ke ‘ilonga ‘a e ngaahi me’a ‘oku ongoongolelei′ – kapau ‘oku ‘i ai ha lelei pe ha me’a ‘e fakamālō’ia – Tokanga ki he ngaahi me’a ko ia′!

Si’i kaungā fononga ‘i he ‘Eiki′, ko e ola ‘o ‘eta stay connect ki he ‘Otua′ ‘i he ta’u fo’ou ‘oku ta hū ki ai′ – ko e ‘ave kitaua ki Hono levolo′, pea Ne toki hanga ‘o fa’oaki ‘iate kitaua ‘Ene to’onga mo’ui ‘a e ‘Otua′. He ko e mo’oni′, ko e me’a ia ‘a e ‘Otua′ – koe matamatalelei′, koe me’a ia ‘a e ‘Otua′, ko e totonu′, mo e mā’oni’oni′, ko e me’a mo ia ‘a e ‘Otua′, ko e faka’ofo’ofa′ mo e ongoongolelei′, ko e me’a mo ia ‘a e ‘Otua′ – ko e me’a LELEI kotoa pē, ko e foaki LELEI kotoa ia mei he ‘Otua′ ko e TAMAI ‘o e ngaahi MAᾹMA′. Ko ‘eta me’a pē ke ta tokanga ki ai′ – keta FAKAMᾹLŌ’IA!

Na’e fēfē ‘eta tauhi vā mo ‘eta tauhi ‘Otua he ta’u ko ‘eni kuo maliu atu′ ‘a e 2019? ‘O! Hulu ē tōnounou′ ia! Ka ‘oku fakalotolahi’i kitautolu kainga ‘e he ‘Aposetolo′ ai pē he vahe 3:13 – “Kainga, ’oku ‘ikai te u lau au kuo u ma’u: ka ko e me’a pē taha ‘oku ou fai′; ‘oku ou fakangalongalo’i ‘a e ngaahi me’a kuo tuku ki mui′, kau kakapa atu ki he ngaahi me’a mei mu’a′: ‘ou tuli atu pē ki he ngata’anga′, ke ma’u ‘a e pale ‘o hoto ui mei ‘olunga′ na’e fai ‘e he ‘Otua′ ‘ia Kalaisi Sisu”. ‘Io, ko e fekau ia ‘o e ki’i ‘atikolo ko ‘eni′ – stay connect ke mafao atu ki ho ui ma’olunga mei he ‘Otua′.

‘Ofa atu ‘i he Huafa ikuna mo e Huafa lavame’a mo kafakafa fau ‘o hotau ‘Eiki ko Sisu Kalaisi′.

Linda Tu’ulakitau.

Be the first to comment

Leave a Reply

This site uses Akismet to reduce spam. Learn how your comment data is processed.