Kaveinga′ – Ko e Fakatupu Mo’ui ‘a e ‘Otua′ ‘i he Pule’anga ‘o Natula.′

Fa’u ‘e Faifekau Mosiana Fisi’ipeau

Folofola: ‘Aisea 55:10-13

‘Oku ou talitali fiefia ‘a e tokotaha kotoa pē ki he ki’i ‘atikolo ‘o e ‘aho ko eni′ ‘i he Huafa ‘o hotau ‘Eiki Huhu’i′ ‘a Sisu Kalaisi. Ko e Folofola′ ‘oku to’o ia mei he Tohi ‘a e Palōfita ko ‘Aisea′ 55:10-13.

Veesi 10 – He hangē ‘oku hifo ‘a e ‘uha′ mo e sinou′ mei langi′

Veesi 11 – ‘o ‘ikai te ne foki ki ai, kae’oua ke ne fakaviviku ‘a e fonua′, ‘o ngaohi ia ke fakatupu me’a, mo laku muka mai ‘o ‘oua foki ke ‘i ai ha tenga ma’ae tangata tūtuū’i′, mo ha me’akai ma’ae fiekaia′, ‘e pehē pē mo ‘eku lea′ ‘e ‘alu atu mei hoku ngutu′, ‘e ‘ikai foki nge’esi mai, kae’oua ke ne fai ‘a e me’a na’a ku loto ki ai′, mo fakaa’u ‘a e me’a na’a ku fekau atu ai ia.′

Kaveinga′ – Ko e Fakatupu Mo’ui ‘a e ‘Otua′ ‘i he Pule’anga ‘o Natula.′

Kapau tetau sio ki māmani, ‘oku tau ‘ilo ai ‘a e Folofola ‘a e ‘Otua′ ‘oku mo’ui, fu’u mālohi pea effective, pea ‘oku ne fai ‘a e me’a na’e ‘uhinga ai hono ngaohi ia.′

  1. Ko e fakatupu me’a ‘a e ‘Otua′ ‘i he Pule’anga ‘o Natula.′

 Kapau tetau vakai ki he Folofola ko ‘eni′, “Na’a Ne pehē ki he sinou′, hifo ki māmani. Na’a Ne fokotu’u hono taimi ‘e tō ai.′ Koe hā hono lahi ‘o e tikilī (degree) ‘o e momoko′? Pea koe hā ‘a e lōloa ‘o ‘ene toka he fonua′? Pea ki he ‘uha mosimosi′ mo e ‘uha lōvai′ mo hono mālohi′, pehē ‘e Siope 37:6 – “He ‘oku Ne folofola ki he sinou′, tō ki he fonua′, pehē ki he tu’u mo tō, pehē ki he fu’u ‘uha lōvai′, ko ‘Ene tōtōivi′ ia”. Pea fakatatau ki He’ene tu’utu’uni′ ‘oku nau ha’u pē tō hifo mei hevani, pea nau fai ‘a e me’a kotoa pē ‘oku Ne tu’utu’uni kenau fai ‘i he māmani.′ Talamai, he’ikai tene foki ki AI kae’oua kuo ne fakaviviku ‘a e fonua′, ‘o ngaohi ia ke fakatupu fua, pea ke laku muka mai ke ‘i ai ha tenga ma’ae tangata faama′ mo ‘i ai ha me’akai ma’ae kakai fiekaia.′ Ke lava ‘e he kau faama′ ‘o fafanga honau ngaahi fāmili′, fafanga mo e kakai kehe′, pea toe ha tenga pe ko ha pulopula ke hokohoko atu hono tō ke fakakakato ‘a e me’a na’e ‘uhinga ai hono fekau’i mai ‘e he ‘Otua′ ‘a e ‘uha′ ki he fonua.′

V.10 – Pea ko e fakatupu mo’ui ‘a e Folofola ‘a e ‘Otua′ ‘i he Pule’anga ‘o e tangata.′

V.11 – Pea ko ‘eku Folofola′ ‘e fu’u mālohi ia ‘i he ngutu ‘o ‘eku kau Palōfita′, ‘o hangē ko ia ‘i he Nima ‘o e Tokotaha Fakaai.′ He’ikai foki mola ‘eku Folofola′ kiate AU, kae’oua kuo Ne fakakakato ‘a e me’a ‘oku OU loto ki ai′, mo fakaa’u ‘a e me’a Neu fekau’i atu ai IA.′

Ko e fakamo’oni fakahāhā mai ia ‘e he ‘Otua′ kiate koe mo au, ‘a Hono finangalo′ ‘o fakatatau ki he ‘uhinga ‘o ‘Ene ngaohi ‘a e me’a kotoa pē ‘oku Ne fakapapau’i mai kia kitaua′:-

  • Tā ko e palōmesi ‘a e ‘Otua′, kuopau ke Ne fakakakato ia ‘i hono taimi totonu.′ Pea ko ‘Ene Folofola′, he’ikai ha ki’i fo’i kohi ai ‘e taha ‘e tō ‘o ‘ikai fai. (1 Tu’i 8:56). Ko e ngaahi palōmesi ‘o e meesi pea mo e kelesi ‘a e ‘Otua′ ‘i he veesi 6′ mo e veesi 7′ ‘e hoko mo’oni hono ola′ mo hono fua′ he laumālie ‘o e kakai tui′ honau fakatupu fo’ou mo fakatapui ‘o hangē ko e tō ‘a e ‘uha′ ki he kelekele′ ke fai hono fakafo’ou mo fakatupu fua.′
  • Fakatatau ki he ngaahi taumu’a kehekehe ‘o hono ‘omai ‘o ‘Ene Folofola′ – kuopau kene ma’u ‘a e ngaahi ola kehekehe ‘o fakatatau ki he anga ‘o ‘etau tali ia.′ Kapau ‘oku ‘ikai ko ha ifo (flavour) ‘o e mo’ui′ ki ha mo’ui, ko e ifo (flavour) ‘o e mate′ ki ha mate. Kapau he’ikai kene fakaake ha konisēnisi, pea ne fakamolū ha loto, te Ne tutu ho konisēnisi′, pea Ne fakafefeka ho loto.′ Kapau pē he’ikai teke momoho polo’uto ma’a Hevani – te ke momoho polo’uto koe ma’a Heli (veesi 6&7). Ko e hala koē, pe ko e hala koē? Ka kuopau keta “take” hono ola′ pe ko hono fua′ – ko e ola mo’ui pe ko e ola mate!
  • Ko e ha’u ‘a Kalaisi Sisu ki māmani′ ‘oku hangē ia ko e tō mai ‘a e hahau mei Hevani.′ Mo’oni ‘a Hosea 14:5 – “Te u hangē ko e hahau ki ‘Isileli′, tene fisi ‘o hangē ko e lile′, tene faiaka ‘o hangē ko Lepanoni′”.

Taimi ‘o e kei fakafefeka ‘a e loto ‘o e kau Siu′ ‘onau fakatale’i (reject) ko Sisu ia ‘a e Misaia′, pea nau fakafisinga’i ‘a e Kosipeli ‘o Sisu′ – ko e langilangi’ia lahi ia ‘a e ‘Otua′ ‘i he Senitaile′ (‘a koe mo au) ‘etau liliu ‘o tali ‘a Sisu mo ‘Ene Kosipeli Fakamo’ui′ kimu’a pea ‘e toki fakamo’ui mai ‘e he ‘Otua′ ‘a e Ha’a Siu.′ ‘Io, mo’oni ko e ta’ane ‘a e Lami,′ ‘e katoanga’i ia ‘e he fu’u kau fakaafe (guests) tokolahi. Mo’oni ‘a Fakahā 5:9-10: “Pea nau hiva ‘aki ha hiva fo’ou ‘o pehē:

Taau pē Koe ke to’o ‘a e tohi′

Pea ke vete hono ngaahi sila′,

He na’a ke mate tamate’i

Pea na’a ke fakatau kakai ma’ae ‘Otua′

‘aki Ho Ta’ata’a.′

Mei he matakali fulipē

Mo e lea mo e fa’ahinga mo e Pule’anga

Pea na’a ke ngaohi kinautolu

Ko e Pule’anga mo e ngaahi Taula’eiki

Pea tenau hau ‘i māmani”.

‘Io, ko e Kosipeli Fakamo’ui ‘o Sisu Kalaisi′, ‘oku ne aoao kakai ma’ae Pule’anga ‘o e ‘Otua.′ He’ikai pē ke foki mola ia pe foki nge’esi mei ha feitu’u.

Veesi 12 – “He temou hū ki tu’a mo e fiefia. Pea ‘e taki atu kimoutolu mo e melino. Ko e ngaahi mo’unga′ mo e ngaahi sia′ tenau pā mavava ‘i ho’omou hā mai.′ Pea ko e ‘akau kotoa ‘o e vao′ tenau pasipasi nima”.

Ko e ‘uhinga ‘a e veesi ko ‘eni′ ki hono fakatau’atāina ‘a e kau Siu′ he’enau nofo pōpula ‘i Papilone.′ ‘E mu’omu’a ‘a Sihova ‘o taki kinautolu kenau a’u  ki honau fonua.′ Tenau hū ki tu’a ‘i he fiefia mo e ikuna. ‘Ikai ha mamahi, kuo nau hoko ko e konga ‘o Papilone, ‘ikai ha ilifia ‘e toe fai mai ha tulimui ke fakafoki kinautolu, hangē ko e tulimui ‘a Felo mo ‘ene tau′ ke fakafoki kinautolu ki ‘Isipite.′ Ka ko e hū ki tu’a ‘i he melino mo e fiefia…

Kātaki pē toki hoko atu he uike kaha’u′ ‘a e ‘atikolo ko ‘eni′ he ‘oku ou tui kuo ‘osi fu’u lōloa fe’unga, kae toki faka’osi atu ‘a e ‘atikolo ko ‘eni′ he Monite uike kaha’u.′ Mālō ho’omou me’a mai.′

Be the first to comment

Leave a Reply

This site uses Akismet to reduce spam. Learn how your comment data is processed.