Kaveinga′ – Ko e Fakatupu Mo’ui ‘a e ‘Otua′ ‘i he Pule’anga ‘o Natula.′ (Konga2)

Fa’u ‘e Faifekau Mosiana Fisi’ipeau

Folofola: ‘Aisea 55:10-13

Ko e hoko atu ‘eni mei he ‘Atikolo Konga1…

Veesi 13: “’E ‘oho hake ‘a e paini′ ‘o fetongi ‘a e talatala′. Pea ‘e ‘oho hake ‘a e maile′ ko e fetongi ‘o e hefa.′ Pea ‘e tupu ai ha Huafa fo’ou ‘o e ‘Eiki.′ Ha faka’ilonga ta’engata ‘e ‘ikai motu”.

Ko ‘enau fononga ki ‘api′, fou atu he ngaahi mo’unga mo e ngaahi tafungofunga, ‘e toka mālie ‘a e me’a kotoa. He ko Sihova ‘oku Takitau.′ Ko e ngaahi fonua tenau fou atu ai′, tenau fakahaā’i ‘enau loto lelei mo ‘enau good wishes ma’anautolu.′ ‘E kātoa mai ‘a e kakai′, ‘o pā mavava mo hiva fiefia ke talitali kinautolu he taimi tenau foki mai ai ki honau fonua.′ Liliu ‘a e me’a kotoa.

Tau sio mama’o atu′, ko e huhu’i ‘o ha’a Siu mei he’enau nofo popula ‘i Papilone′, ko e confirm ia ‘o e palōmesi lahi taha ‘a e ‘Otua′ ‘e hoko mai ‘a e Fakamo’ui Hono kakai′ pea mo māmani kātoa ‘ia Sisu Kalaisi:

1.Ko e Kosipeli Fakamo’ui ‘o Sisu Kalaisi′, tene veteange ‘a e kakai kotoa pē kuo, pea ‘oku, pea ‘e fakapopula’i ‘e Setane mo e angahala.′ Tenau hū ki tu’a mo e fiefia, pea ‘e taki atu kinautolu ‘i he melino he kuo fakatau’atāina’i mo’oni kinautolu ‘e Sisu Kalaisi.

2.‘E fakafonu ‘i he fiefia ‘a kinautolu ‘oku loto mamahi.′ Ko māmani mo e konga ‘o e ngaahi me’a fakatupu′, tenau ‘inasi ‘i he fiefia ‘o e fakamo’ui.′ (Saame 14:7 – “Taumaiā ke ‘omi mei Saione ‘a e Fakamo’ui ‘o ‘Isileli.′ Ka fakafoki ‘e Sihova ‘a e popula ‘o Hono kakai′, toki hakahaka ai ‘a Sekope, toki nekeneka ai ‘a ‘Isileli”).

3. ‘E ‘i ai ‘a e liliu lahi ‘i he ‘ulungaanga mo e mo’ui ‘a e kakai′, ‘o e fāmili′, ‘o e Siasi′ mo e fonua.′ Ko kinautolu ‘oku hangē honau anga′ mo ‘enau to’onga mo’ui′ ko e ‘akau talatala′ mo e talatala’āmoa′, ta’e’aonga, fakamamahi, mo fakatupu palopalema,′ ko hono tā pē ‘o laku ki he afi′ mo e ta’efua. Ka ko eni, kuo nau hoko ko e kakai mo’ui ‘aonga mo kelesi’ia ‘o hangē ko e ‘akau ko e paini′ mo e maile.′

Ko e talatala’āmoa′ mo e mateloi′ mo e fa’ahinga ‘akau talatala kotoa pē, ‘oku nau ha’u kinautolu mo e fakamala’ia kotoa pē ‘oku hā ‘ia Senesi 3:18, 19 – ka ko e ‘oho hake ‘a e ngaahi ‘akau lelei′ ‘oku hā ‘i he veesi 13′ ke ne fetongi ‘a e ‘akau talatala′ mo e hefa′, ko e faka’ilonga ia ‘o hono ta’aki pe ko hono to’o meiate koe mo au ‘a e mala’ia fakalao′, kae fakae’a mai ‘a e ngaahi tāpuaki ‘o e Kosipeli Fakamo’ui ‘o Sisu Kalaisi′, ‘aē kuo Ne ha’u ‘o fakangata he kolosi′, ‘o lau ‘a e tangata ko Sisu′ na’e ‘ikai tene ongona pe ‘ilo ‘iate IA ha angahala′ ko e koto angahala, koe’uhí ko kitaua, koe’uhí ke ta hoko ai ‘iate IA (‘ia Sisu) ko e koto mā’oni’oni faka-‘Otua. (2 Kolinito 5:21).

‘Oku tau tui ko e kalisitiane′, ko e to’onga mo’ui (lifestyle). Ko e kakai kuo faka’imisi ‘aki ‘a e to’onga mo’ui mo e ‘ulungaanga ‘o Sisu Kalaisi.′ Kuo tau hiki mei he mo’ui faka-‘akau talatala.′ Fakafeta’i ‘oku raise up ‘e he ‘Otua′ ‘Ene kakai′ ‘i hotau kuonga ni mo e to’utangata ka hokohoko mai′ – ko e to’utangata ‘o e ‘akau paini′ mo e maile.′ Ko e to’utangata ‘oku nau poto mo mo’ui faka-’Otua mo ngāue ‘aonga ‘i he tapa kotoa pē.

4. Pea ‘i he ngaahi me’a ni kotoa pē, ‘e langilangi ai ‘a e ‘Otua.′ Pea kiate IA pea mo Hono Huafa′ ‘e ‘iloa, ko Hono Huafa′ pē ke fakahikihiki’i mo fakalangilangi’i.′ Pea ‘i Hono Huafa′ pē, ko IA pē ‘oku fakalotolahi’i ‘aki Hono kakai.′ ‘E hoko IA ko e faka’ilonga ta’engata ‘o e manakoa mo hono ‘ofa’i ‘e he ‘Otua′ Hono kakai.′ Fakapapau’i ki Hono Siasi′, ki Hono kakai′, neongo pē ‘e ‘i ai ‘a e taimi ‘e ‘ao’aofia ai ‘a e fononga’anga′, fepaki Hono Siasi′ mo e ngaahi faingata’a, ka he’ikai pē Tene si’aki. He’ikai Tene mahu’i meiate koe mo au ko ‘Ene fānau. Ko e kovinānite ‘o ‘Ene kelesi′ – ko e kovinānite ta’engata′ ia. ‘A ia na’e  fai ‘e Kalaisi ma’atautolu he kolosi.′ Tali IA ki ho loto′ ka ke mo’ui. Haleluiā!

Tu’a’ofa atu ki he Tonga kotoa,

Mosiana Fisi’ipeau.

Be the first to comment

Leave a Reply

This site uses Akismet to reduce spam. Learn how your comment data is processed.