Kaveinga′ – Hoko ko e Tokotaha Ikuna!

GBG Lea ‘o e Mo’ui′ Pulelulu 22 Sanuali 2020

Fa’u ‘e Faifekau Mosiana Fisi’ipeau

Taipe & ‘Etita: Linda Tu’ulakitau

‘Oku ou fakafe’iloaki fiefia atu ki he tokotaha kotoa pē ‘oku ke me’a mai ki he Peesi ‘a e Lea-‘o e-Mo’ui.′ Mālō ‘etau to e lava! Fakaafe’i koe ke tau kaungā ‘inasi mei he Folofola mo’oni mo mo’ui ‘a e ‘Otua.′

Kaveinga′ – Hoko ko e Tokotaha Ikuna!

Kainga, ‘oku ui kitautolu ‘e Kalaisi ke tau hoko ko e kakai IKUNA – ‘ulu ‘o ‘ikai ko e hiku, ikuna ‘o ‘ikai ulungia, mālohi ‘o ‘ikai vaipalo. Na’e tohi ‘a Sisu ki he ngaahi Siasi ‘e fitu ‘o ‘Esia Minu′ ‘o Ne talaange, “kiate ia ‘oku ikuna′ ke ne hoko ko e tokotaha ikuna”. Ko ho tu’unga eni ke ke ngāue’aki ‘ia Kalaisi.′ Ko ho tu’unga′ ko e tokotaha ikuna koe, koe’uhí ko e me’a na’e fai ‘e Kalaisi ma’au mo au he kolosi.′ Pea ‘oku totonu ai ke tau hoko ko e kakai ikuna ‘ia Kalaisi Sisu.

Koe hā ‘a e tu’unga ‘oku ‘i ai ‘eta mo’ui kalisitiane′ he ngaahi ‘aho ni′? Ko e tokotaha ikuna koe? Kuo u matu’otu’a faka-laumālie? Kuo u ma’u nai ha poto fe’unga? Mahalo pē ko e taimi ‘oku ou lotu lahi ai′? ‘Ikai! Ko koe ko e tokotaha ikuna KOE! Kuo ui ‘e Kalaisi pea Ne fakamafai’i koe. Na’e tohi ‘e Sione ki he fānau′ (1 Sione 4:4) – “’Oku ‘a e ‘Otua′ kimoutolu, pea kuo mou ikuna” – ki he ngaahi tamai′ (1 Sione 2:14) – ki he mātu’a′ – kuo mou ‘ilo mo’oni ‘a ‘Ene ‘Afio.′ Pea ki he kau talavou′ (youth), kuo mou kaukaua, pea ‘oku nofoma’u ‘a e Folofola′ ‘iate kimoutolu, pea kuo mou ikuna ‘a e fili.′ (1 Sione 2:14).

‘I he’etau mo’ui faka’aho′, ko e kakai ikuna kitautolu hono fakaivia ‘e he Laumālie Mā’oni’oni′ hotau tangata-‘i-loto′ ke tau fetaulaki mo ha fa’ahinga me’a pē, ‘o tatau ai pē pe koe hā?… ‘i ha fa’ahinga taimi pē…lahi pe si’i! ‘Oku ke mahulu hake koe ‘i ha to e taha IKUNA. Ko e tokotaha ikuna pāpela koe, koe’uhí ko Kalaisi ‘a e Tokotaha IKUNA KAFAKAFA ‘oku mo’ui IA ‘i loto ‘iate koe.′ Talamai ‘e Loma 8:37 – “Ka ‘i he ngaahi me’a ni kotoa pē, ‘oku tau ikuna noa pē ‘iate IA Ne ne ‘ofa’i kitautolu′”.

‘I he’etau kaveinga′ – “Hoko KO HA TOKOTAHA IKUNA” – ‘oku mātu’aki fehangahangai ia mo ha ngaahi ongo nekativi (negative emotions), ‘a ia ‘oku mātu’aki fiema’u ia ke tau ikuna’i. Tau kamata ‘i he ongo nekativi ko e HOHA’A (Worry).

IKUNA’I ‘A E HOHA’A′ – KE KE LOTU! To overcome worry – pray!

Folofola′: ‘Eseta 4:1-17 – (kātaki toki lau ‘a e Folofola′).

‘I he 1998′, na’e tu’ukimu’a ai ‘a ‘Amelika ha fo’i hiva pop hit ‘a e tangata ko Bobby Mc Ferrin, pea lekoōti ia ko e fo’i hiva ‘o e ta’u′ – “Ko e tokotaha kotoa pē ‘oku fiema’u ke fiefia ‘o ‘oua ‘e hoha’a”. Na’e hiva ‘a Bob ‘o pehē – “Don’t worry be happy”…kapau ‘oku ‘i ai ha me’a kamosi (switch) fiefia mo ha me’a kamosi hoha’a, te ke kamosi ki he fiefia′ pea ke tala kiate koe “Don’t worry be happy”, pea ‘e hoko ia kiate koe.

Ko e lea faka-Kalisi ki he hoha’a′ (worry), ‘oku ‘uhinga ia ko hono fefūsiaki koe ki he feitu’u kehekehe. Ka ko e tefito’i ‘uhinga ‘i he lea faka-Pilitānia′ ‘a e worry ko e strangle, ko e no’ou’a pe ko e fakasisina ke fulutāmakia. ‘O ‘uhinga ia, ka ko ha tokotaha hoha’a (worry) koe, ‘oku ke fakasisina pē ‘e koe ‘a koe ke ke fulutāmakia. Ko e me’a ia ‘oku fai ‘e he hoha’a′ kiate kitautolu.′ ‘Oku ne hanga ‘o fakasisina ‘etau mo’ui′, ‘etau mānava′, ‘etau fiefia′, ‘etau fakakaukau′, hotau ifo ki he’etau kai′, ko e tā hotau mafu′ ‘e oma, ‘e mā’olunga ‘aupito hotau toto′, tetau tele tauta’a mo pupuha’ia, lahi faka’ulia, pea tau iku ‘o puke mo mahamahaki. ‘E tu’u ‘i he ni’ihi ‘a e ki’i konga lea ko ia′ – “’Oku ou hoha’a he kuo u si’i mahamahaki”.

Kuo ‘osi fakatotolo atu ‘a e kau mataotao′, pea nau līpoōti ‘o pehē, ko e hoha’a′ ‘oku ne fakatupu ‘e ia ‘a e langa ‘ulu′, langa kia′, pala ngākau′, langa tu’a′, mahaki mafu′, kanisā′, suka′. Pehē ‘e he toketā sino ‘e taha – “Kapau ‘e ako ‘a e kakai′ ke tuku ‘enau hoha’a′, ko e ngaahi mahaki lahi ia ‘e lava pē ‘o mo’ui”.

Na’e fakatotolo ha Palōfesa ‘i ha ‘Univēsiti ‘i ‘Amelika ki he ngaahi me’a ‘oku hoha’a ki ai ‘a e kakai′, pea ‘omi ‘ene līpoōti′ ‘o pehē:

40% hoha’a ki honau kaha’u′, me’a te’eki ke hoko.′

30% hoha’a ki he ngaahi me’a he kuohili.′

12% hoha’a ki he ngaahi me’a fekau’aki mo e mo’ui′ (health).

10% hoha’a ki he ngaahi me’a faka-pa’anga.′

8% hoha’a ki he ngaahi me’a faka-fāmili.′

‘A ia ko e lau ia ‘a e kau poto.′ ‘A ia ko e meimei kotoa ho taimi hoha’a′, ko ho ivi mole noa’ia ia.

Ka koe hā ‘a e tali ‘a e ‘Otua′ ki he hoha’a′?

‘Oua! Don’t worry be happy! Ko e ikuna ‘o e hoha’a′ ko e LOTU! Ko e fekau ia ‘a e ‘Otua′ kiate kitautolu meia Filipai 4:6-7 – “Mou fiefia ‘i he ‘Eiki′ ma’u ai pē, ‘io, kau to e ‘ai atu, mou fiefia…Neongo pe koe hā ha me’a, ‘oua temou loto mou’a ai, ka ‘i he me’a kotoa pē, tuku ke hā ki he ‘Otua′ ho’omou ngaahi kole′, ‘i he lotu mo e hūfia, pea fai mo e fakafeta’i! Pea ko e nonga ‘a e ‘Otua′, ‘a ia ‘oku mama’o atu ‘i he tatae ‘o e ‘atamai kotoa pē, te ne malu’i homou loto′ mo ho’omou ngaahi fakakaukau′ ‘ia Kalaisi Sisu”.

Te tau toki hoko ki he’etau Folofola tefito′ ‘a ia ko ‘Eseta 4:1-17 ‘i he Lea ‘o e Mo’ui hoko mai.′ Ke ikuna’i ‘a e hoha’a′ – Lotu! God cares! He ‘oku tokanga ‘a e ‘Otua′!

Tu’a’ofa lahi atu ki he Tonga kotoa pē,

Mosiana Fisi’ipeau

God-be-Glorified Ministry.

Image by Jill Wellington from Pixabay 

Be the first to comment

Leave a Reply

This site uses Akismet to reduce spam. Learn how your comment data is processed.