Ikuna’i ‘a e Hoha’a′ – Lotu! He ‘oku Tokanga mai ‘a e ‘Otua′ (v.1-4).

Folofola: ‘Eseta 4:1-4

Fa’u ‘e Faifekau Mosiana Fisi’ipeau

Taipe & ‘Etitā: Linda Tu’ulakitau

Tau kei hoko atu ki he ongo nekativi (negative emotion) ko e hoha’a′, ‘oku fiema’u ketau ikuna’i.

‘Oku mou mea’i kotoa pē ‘a e talanoa mālie ‘o kuini ‘Eseta′, ‘a ‘ene hoko ko e kuini ki he tu’i pule fakaaoao ‘o e Pule’anga Pesia′, ko kingi ‘Ehasivelo – ke ne fetongi hono kuini ko Vasitai.′

Ko ‘Eseta′ ko e Siu, pea ko ‘ene tamai-ohi ko Motekiai′ ko e Siu. ‘I he taimi ko eni′ na’e ‘ikai ‘ilo’i ‘e he tu’i′ ia ko hono kuini′ ko e Siu.

Ko Hāmani′, ko e tangata ‘Amaleki, na’e hākeaki’i ia ‘e he tu’i′ ke ne hoko ko ‘ene tangata fale’i (advisor). Ka ko e fili ia ‘o e kakai Siu.′ Na’a ne fale’i ‘a e tu’i′ ke faka’auha ‘a e kakai Siu.′ Pea na’e tui ki ai ‘a e tu’i′ ‘o na fokotu’utu’u ha ‘aho pau ke fakahoko ai hono tāmate’i mo faka’auha ‘a e kakai Siu.′

‘Oku ‘i ai ho fili ‘oku ha’u ke ne faka’auha koe (Sione 10:10). Ko e palani ‘a e fili′ ke ne faka’auha koe ‘aki ‘a e ngaahi faingata’a kehekehe. ‘Oua te ke hoha’a ka ke lotu. Talamai ‘e ‘Aisea 54:14…”Fakamama’o mei he hoha’a′ he ‘oku ‘ikai ha’o me’a ke ke manavahē ai, pea mei he mate ilifia′, he’ikai ofi ha me’a kiate koe”. Manatu’i ‘oku ha’u ‘a Tu’i Sisu ke Ne fakamo’ui koe (Sione 10:10).

‘I he fanongo ‘a Motekiai ki he ongoongo′ na’a ne fakafoa, pea ‘ai tauānga’a pea ne ‘alu atu ki loto’ā ke sio kia ‘Eseta. Pea pehē ki he kakai Siu′ kotoa ‘i he ngaahi vahefonua′, na’a nau fakafoa, tangi-‘a-lo’imata, ‘ai tauānga’a mo fakaefuefu. Ko e lao ‘o e Pule’anga ko ‘eni′, ‘e tapu ke ‘alu ha taha ki he loto’ā ‘o e palasi ‘o e tu’i′  ‘oku ‘ai tauānga’a pe mamahi ha me’a.

Ko e me’a ia ‘oku ‘ikai ke tatau ai ‘a Tu’i Sisu ia mo tu’i ‘Ehasivelo.′ Ka ha’u mamahi pe ‘ai tauānga’a ha taha ia ki he palasi ‘o kingi ‘Ehasivelo′, ko hono tautea′ ko e mate. Ka ‘oku ui pea fakaafe ‘a Kingi Sisu ia ki he taha kotoa pē, ke tau ha’u kiate IA, ‘o tatau ai pē koe hā ‘a e tu’unga ‘oku tau ‘i ai.′ He’ikai te Ne si’aki kitautolu, he’ikai toitoi pe fufū IA meiate kitautolu. Ka te Ne mātu’aki talitali lelei kitautolu ‘aki ha nima faka’atā mo ha telinga ‘oku fakafanongo ke Ne ongona ho’o to’e′ mo ho’o ngaahi fiema’u.′

‘Oku ‘ikai tautau mai ‘e he ‘Otua′ ia Ha’ane faka’ilonga pe sign he matapā′ ‘o talamai, “Hū mai pē koe ‘oku ke fiefia′, ‘e fana’i ‘a e kau talangata’a′, ‘ikai tali ha kau hoha’a, ‘ikai tali ha taha mata mamahi, mo ta’efiefia ke hū mai. Ka ‘oku Ne ui mai, “Ke tau ‘unu’unu ange mālohi ki he Taloni ‘o ‘Ene Meesi′, ke tau ma’u ‘Ene meesi′ pea tau ta’imālie ‘i He’ene kelesi′ ke tokoni mai kiate kitautolu”. (Hepelū 4:16).

Ikuna’i ‘a e hoha’a′ – Lotu! He ‘oku tokanga mai ‘a e ‘Otua′ kiate koe. He ‘oku ‘i ai ‘Ene ngaahi founga fakaava matapā kiate koe. Ka ko e hili ho’o lotu′, ko e me’a hoko ‘oku fiema’u ke ke fai′, ko e fetongi ho teunga′, pe ko ho kofu.′ ‘I he ha’u ‘a Motekiai ki he loto’ā ‘o e tu’i′, na’a ne tui kofu tauānga’a – ko e kofu ‘o e hoha’a′, kofu ‘o e puputu’u′, loto mamahi′ mo e tailiili.′ Ka na’e fekau atu ‘a ‘Eseta mo ‘oatu ‘a e kofu ke fetongi ‘aki ‘a e kofu ‘o Motekiai.′ Mo’oni ‘a ‘Aisea 61:3 – ”Ki he kau tangi ‘i Saione′, ke ‘oange ha pale ke fetongi’aki ‘enau ‘ulu efu′, ko e lolo ‘o e fiefia ke fetongi ‘aki ‘enau tangi′, ko e pulupulu ‘o e fakamālō ko e fetongi ‘o e laumālie mafasia′”. Ko e ngāue ia ‘a e ‘Otua′, ‘oku Ne fai ma’atautolu′ ke fakanonga ‘aki ‘etau hoha’a.′

Ko ia ai, koe hā ‘oku ke hoha’a ai′? Ikuna’i ‘a e hoha’a′ ‘aki ho’o lotu! ‘Oku tokanga mai ‘a e ‘Otua′ kiate koe! Koe hā ha me’a ‘oku hoko ki ho’o mo’ui′? Koe hā ‘a e me’a ‘oku ke fehangahangai mo ia he taimi ni′? Ha palopalema…’oku Ne ui kiate koe ke ‘oua te ke hoha’a, ka ke lotu ange kiate IA.

IKUNA’I ‘A E HOHA’A′ – LOTU! HE ‘OKU FANONGO ‘A E ‘OTUA.′ Overcome Worry – Pray! For God hears! (Vv.5-8). Kātaki ka ke toki lau ‘a e ngaahi veesi ko ‘eni′).

Na’e fekau’i atu ‘e ‘Eseta ‘a Hātaki ko e taha ‘o e kau ‘iunoke ‘a e tu’i′ ke ne vakai’i koe hā ‘a e fiema’u ‘a Motekiai′? Na’e fie fanongo ‘a Hātaki kia Motekiai. Na’e monū’ia ‘a Motekiai ‘i he’ene ‘i he lotolotonga ‘o Hātaki′ (‘uhinga ‘o e Hātaki′ ko e lelei (good)). Ka ‘oku tau ma’u ha Tokotaha ‘oku lelei lahi hake IA ‘ia Hātaki, ‘a ia ko Sisu. ‘Oku Ne lelei ma’u ai pē, ‘i he me’a kotoa pē, pea ‘oku Ne fanongo ki he’etau tangi′, ‘etau lotu′, ‘etau ngaahi kole′, pea mo ‘etau hoha’a.′

Na’e ‘ikai ha taimi ‘e ta’ofi ai ‘e Hātaki ‘a e lea mo e fakamatala ‘a Motekiai′, ‘a ‘ene hoha’a.′ Na’a ne fakafanongo mo e ongo’i ‘ofa kia Motekiai. ‘Oku ou tui mahalo na’a ne fakalotolahi’i ‘a Motekiai, ke ‘oua te ne hoha’a he te ne fakahoko kotoa ‘ene līpoōti′ pea mo ‘ene kole′ kia ‘Eseta.

Kuo foaki mai ‘e he ‘Otua′ ‘a e Laumālie Mā’oni’oni′ kiate kitautolu, ‘oku Ne fanongo kiate kitautolu, ‘oku Ne fakamo’oni kiate kitautolu, ‘oku Ne fakalotolahi’i kitautolu, ‘oku Ne fakafiemālie’i kitautolu, pea ‘oku Ne hufekina kitautolu. Ko Sisu, ko hotau Taula’eiki Lahi′, ‘a ia ‘oku Ne ‘i he to’omata’u ‘o e Tamai′ ‘i Hevani, ‘o Ne hufekina kitautolu. Mo’oni ‘a Hepelū 7:25 -”Ko ia ai foki ‘oku Ne mafai ke fakamo’ui opeope ‘a kinautolu ‘oku ha’u ki he ‘Otua′ ‘iate IA, ko ‘Ene mo’ui′ ma’u ai pē ke Ne hufekina kinautolu.”

Tokolahi ‘o kitautolu ‘oku tau lotu ‘o ‘ave ki he ‘Otua′ ‘etau ngaahi hoha’a.′ Ka ‘i he ‘osi ‘etau lotu′ ‘oku tau to e alaala ‘o to’o mai – ‘o tau to e fakamoleki ‘etautolu hotau taimi′ he uike ko ia′ he hoha’a.′ Pea ‘alu pē ‘aho′ kuo kanoni mai ‘a e hoha’a′ mo e lotomo’ua′ ‘o hoko ko e me’a angamaheni pē ia ma’au. Pea tau nofo ai ‘o sio nekativi ki he me’a kotoa, ka ‘oku mo’oni ‘a 1 Pita 5:7 – “’O mou lī atu ā hono kotoa ‘o ho’omou lotomo’ua′ ki He’ene ‘Afio′, he ‘oku Ne mamahi’i kimoutolu”.

Tau ngata heni ka tau toki faka’osi ‘a e ongo nekativi ‘o e hoha’a′ ‘i he Lea ‘o e Mo’ui ‘o e uike kaha’u.′

Mou me’a ā

Tu’a’ofa atu ki he Tonga kotoa

Ke tāpuekina kimoutolu ‘e he ‘Eiki′!

Mosiana Fisi’ipeau.

Be the first to comment

Leave a Reply

This site uses Akismet to reduce spam. Learn how your comment data is processed.