Ikuna’i ‘o e Hoha’ā Konga 2

Fa’u ‘e Faifekau Mosiana Fisi’ipeau

Folofola: ‘Eseta 4:9-17

Veesi Tefito: 14 & 16 (Kātaki ka ke toki hanga ‘o lau ‘a e Folofola′)

Talitali lelei ‘a e tokotaha kotoa pē ‘oku ke me’a ki he peesi ‘a e Lea ‘o e Mo’ui′ mei he God be Glorified Ministry.

Te u faka’osi atu ‘a ‘eku lave ki he hoha’ā′, ko e taha ia ‘o e ngaahi ongo nekativi (negative emotion) ‘oku ne fa’a faka-faingata’a’ia’i ‘etau ikuna′ ‘i ha fa’ahinga me’a pē.

‘I he ‘omai ‘a e līpoōti ‘a Motekiai′ mo ‘ene kole kia ‘Eseta′, na’a ne manavahē ke ‘alu ki he tu’i′, telia ‘a ‘ene mo’ui.′ He ko e lao ‘o e fonua′, he’ikai ke ‘alu ha taha, tatau pe ko hai ‘o sio ki he tu’i′, ta’etene fekau mai ke ‘alu ange. Ka ‘i he veesi 14′, na’e tui falala ‘a Motekiai kia Sihova ko hono ‘Otua′ ‘oku Ne tauhi ki He’ene kovinānite′ mo ‘Ene ngaahi palōmesi′ ‘i he hisitōlia ‘o Hono kakai ‘Isileli′ – ko e ‘Otua tokanga (cares), ‘Otua fanongo (hears) pea ko e ‘Otua fakahaofi mo fakatau’atāina (deliverance). V.14 – “He kapau te ke mātu’aki fakalongo ‘i he taimi ni, ‘e tupu mei he kakai Siu′ ha fakahaofi mo ha fakamo’ui mei ha potu kehe, ka ko koe mo e fale ‘o ho’o tamai′ ‘e faka’auha, pea na’a kuo ke a’u ki ho tu’unga faka-pule’anga′ koe’uhí pē ko ha taimi pehee”.

Neongo ‘oku ‘ikai ke ‘asi ‘a e ‘Otua′- Hono Huafa′ ke lave ki ai ‘i he tohi ‘a ‘Eseta′, ka ‘oku Ne ngāue ‘i he mo’ui Hono kakai′ ‘i he kuohili′, lolotonga′ mo e kaha’u.′ Fou ‘i He’ene ‘ofa′ mo ‘Ene tauhi.′ Ko Hono fu’u ivi malu’i′, pea mo Hono lotolotonga ta’efeliliuaki′, ‘oku Ne tokanga, ‘oku Ne fanongo, ‘oku Ne fakahaofi mo fakatau’atāina. Ko e hā IA kiate koe he ‘aho ni?

Na’e ‘ikai ko Hāmani pē na’a ne fehi’a he kakai ‘a e ‘Otua′ pea ne feinga ke ne faka’auha′, ka na’e mapuna hake he ngaahi to’utangata′ ‘a e me’a tatau. Mapuna hake ‘a Hitilā he WWII, mapuna hake ‘a e ngaahi pule’anga ‘Alepea′ he Hahake Lotoloto′ ‘o nau ‘ohofi ‘a ‘Isileli ‘i he tau ‘oku ‘iloa ‘i he Hisitōlia ‘o e tau′ ko e Six Days Battle, pea ikuna ‘a ‘Isileli, ‘onau tukulolo kotoa.

‘I he kuonga ‘o Kingi Tevita ‘o ‘Isileli′, na’e ikuna ‘e Tevita ‘a e feinga tau kotoa pē he ko e tangata mo’ui lotu , na’a ne fakafeta’i’ia mo ne fakahikihiki’i ‘a e ‘Otua′ he’ene mo’ui′ ma’u ai pē. Na’a ne fakapoa ki he ‘Otua′ he me’a kotoa pē ke ne fai, ke ne ‘alu ki ai, pea ‘i he fānau’i kiate ia hono ngaahi foha′ fou he’ene lotu′, na’a ne fakahingoa ‘a e tokotaha ko ‘Elisama (God hears), ko e taha ko ‘Eliata (God knows) mo e tokotaha ko ‘Elifaleti (God delivers). Ko ia, ‘i he ngaahi hingoa ko eni′ ‘oku ne talaki mai ha ngaahi fekau – ke ‘oua te tau hoha’ā, ka tau lotu tōtōaki mo faka’utumauku he ‘oku fanongo ‘a e ‘Otua′ (hears), ‘oku tokanga ‘a e ‘Otua′ (cares), pea ‘oku fai fakatau’atāina ‘a e ‘Otua′ (delivers).

‘I he lotu ‘a Motekiai mo e kakai Siu′ ‘i Susani Lotokolo′, pea pehee ki he lotu ‘a ‘Eseta mo ‘ene kau sevāniti′, ‘o fakatatau ki he fekau na’a ne ‘oatu fakamuimui kia Motekiai′ – na’a nau ikuna’i ‘a e hoha’ā′. Na’e falala ‘a ‘Eseta ki he ‘Otua′ ‘o ne pehee: “Pea kapau te u mate ai, pea u mate”. (Veesi 16). Ko ‘ene lea′, ‘oku ‘ikai ko ha mate’anga kui (blind fatalism) pe ko ha’ane fakafisi ta’eha’amanaki (hopeless resignation), ka ko ‘ene lea′ na’e ha’u mei ha loto falala kakato ki he ‘Otua ‘oku tokanga, ‘Otua ‘oku fanongo, pea ko e ‘Otua fakamo’ui mo fakatau’atāina.

‘I he ‘aho ni′, ‘oua te ke sio ki lalo, ‘oua ‘e sio ki hema mo mata’u, hanga hake ki ‘olunga mo e ‘amanaki lelei, hanga hake mo e lotu, he ko ho TOKONI′ mo ho HUHU’I′ ‘oku HA’U. Mo’oni ‘a Saame 121:1&2 – “Te u hanga hake hoku mata′ ki he ngaahi mo’unga′, ‘oku ha’u mei fē ‘a hoku tokoni′? Ko hoku tokoni′ ‘oku meia Sihova, ‘a ia na’a Ne ngaohi ‘a e langi′ mo māmani′”.

Ko e pole lahi ia kiate kitautolu kotoa. Ikuna’i ‘a e hoha’ā′ – LOTU. ‘Oua te ke hoko ko e tokotaha fānau’i hoha’ā. ‘Oua te ke kumi ‘uhinga ‘i he mo’ui′, ke ke hoha’ā ki he tu’unga he taimi ni′, ho kaha’u′, ho tu’unga fakapa’anga′, ho’o fānau′, ho mali′, ho fāmili′, ho’o ngāue′, me’a ‘ikai te ke ma’u′ mo e hā fua hā fua…

Pehee ‘e Sisu: “’Oua te mou loto mo’ua ‘o pehee, koe hā ‘etau kai′? Ko e hā tetau inu′? Pe koe hā tetau vala′ pe kofu′? Ko ia, ‘oua temou hoha’ā ki he ‘apongipongi′ he ‘oku tokanga ‘a e ‘apongipongi′ ki he’ene me’a ‘a’ana. He ‘oku fe’unga pē ‘aho mo hono faingata’a ‘o’ona′”.

Ko ia, ‘i he ‘aho ni, tafoki mei he HOHA’Ᾱ′ ‘o LOTU. GOD CARES, GOD HEARS AND GOD DELIVERS. Ko hono totonu′ ia ke tau LOTU ‘oua ‘e hoha’ā! Ko e LOTU′ mo e HOHA’Ᾱ′ ‘oku na fakatou fiema’u ha MᾹLOHI. Ko ia, ngāue’aki ho mālohi′ ki he lotu ‘o ‘ikai ko e hoha’ā. Pea liliu ho teunga′, ko e pulupulu ‘o e fakafeta’i mo e fakamālō, ‘oku fekau’i mai ‘ia Kolose 3:15&17 – “Pea tuku ‘a e fakamelino ‘a Kalaisi′ ke fakamaau ‘i homou loto′, ‘a ia na’e fakaului kimoutolu ki ai…kae’uma’ā ke mou hoko ko e kau FAI FAKAFETA’I. (17) Pea neongo pe koe ha ha me’a te mou fai, ha lea, pe ngaue, mou fai kotoa pe ‘i he Huafa ‘o e ‘Eiki ko Sisu mo mou fakafeta’i ‘iate IA ki he ‘Otua ko e Tamai.

Pea ko e nonga ‘a e ‘Otua′ ‘a ia ‘oku mama’o atu ‘i he tatae ‘o e ‘atamai kotoa pē, te ne malu’i homou loto′ mo ho’omou ngaahi fakakaukau′ ‘ia Kalaisi Sisu! (Filipai 4:7). Fakamanatu atu. ‘Oua ‘e hoha’ā ka ke lotu!

Tau hoko atu he uike kaha’u′ ke tau ikuna’i ‘a e ongo’i nekativi (negative emotion) ko e ILIFIA (Fear), ka tau ikuna ‘a e me’a kotoa pē.

Mou me’a ā

Tu’a’ofa atu ki he Tonga kotoa pē mo e lotu

Mosiana Fisi’ipeau mei he GBG Ministry.

Be the first to comment

Leave a Reply

This site uses Akismet to reduce spam. Learn how your comment data is processed.