Ko e Ongo Nekativi ko e ILIFIA pe ko e Manavahē. Ikuna’i ‘a e ILIFIA′ – Kailavaki

Fa’u ‘e Faifekau Mosiana Fisi’ipeau

Taipe & ‘Etitā: Linda Tu’ulakitau

Folofola: 2 Kalonikali 20:1-30

Talitali fiefia ‘a koe kotoa pē ‘oku ke me’a mai mei he ngaluopē′ ki he peesi ‘a e Lea ‘o e Mo’ui′ mei he God-be-Glorified Ministry.

‘Oku tau hoko atu foki he uike ni ki he taha ‘o e ngaahi ongo nekativi (negative emotions) ‘oku ne fa’a fakalotosi’i kitautolu ke tau fehangahangai lotolahi mo ha fa’ahinga me’a pē, ke tau ikuna.

‘I ha kalasi ‘e toko 500, ko e kau ako ki he ‘atamai′ na’e kole kiate kinautolu ke nau lisi (list) mai ‘a e me’a ‘oku nau ilifia pe manavahē ki ai.′ Pea mei he kau ako ‘e toko 500 ko eni′, na’a nau list mai ha ilifia ‘e 7,000. Faka’uta ange! Ko e fo’i ilifia ‘e 14 ki he student ‘e 1. Pea ko e ngaahi ilifia lahi ia ki ha taha ke ne fehangahangai mo ia ‘i ha ‘aho pē taha. Ka ‘oku ‘ikai fiema’u ia ki ha taha ke mo’ui ilifia, he kuo ‘osi ha’u ‘a Sisu Kalaisi ‘o fakatau’atāina’i kitautolu mei he’etau nofo popula ki he ilifia′.

Talamai ‘e 2 Timote 1:7 – “He ‘oku ‘ikai ke ‘omai ‘e he ‘Otua′ kiate kitautolu ‘a e laumālie ‘o e ilifia′, ka ko e mālohi, ‘ofa, mo e fakapotopoto (sound mind). Ko e lea ‘e taha ki he ilifia′ ko e “Phobia”. ‘Oku ke ‘ilo, ko e toko fiha ‘oku nau ‘ilo ‘a e lahi ‘o e ilifia′ ‘i hotau māmani′? Ko e lau fakamuimui taha′, ‘oku fakaofiofi ki he 530+. Kae tuku mu’a ke u ‘oatu pē ha kihi’i konga si’i ke fakamahino’aki ‘etau kaveinga ‘o e ‘aho ni.′

‘I he ngaahi ‘aho ni′, ko e ilifia lahi taha hono fakafōtunga′ – ko e ilifia ki he fēliliuaki ‘a e ‘ea′ (climate change), ilifia ki he ngaahi mahaki faka’auha′, tailiili ki he ngaahi mahaki mate′, ilifia ki he kovi mo e tōlalo ‘a e ‘ekonomika′, ilifia ki he kau tautoitoi′, ilifia ki he mole ‘ete ma’u’anga pa’anga (income) mei he’ete ngāue′, ilifia ki he mole ngaahi ‘api′ ta’elava ‘o tā ‘a e ngaahi nō′, ilifia mo ta’eongo’i malu, ilifia ki he mofuike, peau kula, tāfea mo e ngaahi matangi saikolonḗ, ilifia ki he ngaahi huelo kona mo e ngaahi ivi faka’ātomi′, ilifia ‘a e ni’ihi ki he tō (fail) ‘i ha me’a pē ‘oku nau fai e.g. (ako pe pisinisi), ilifia ke nau fai ha me’a fo’ou na’a nau tō pe hinga, ilifia ki he fakaanga′ (criticism), ilifia ki he fakatanga′ (persecution).

Ko e ilifia ‘e taha, ko ho’o ilifia ki ha taha, ‘a ia ‘oku ui ia ko e ilifia ki he tangata′, ‘i he’etau tokanga, ko e hā ‘a e fakakaukau ‘a e kakai′ kia kita′? Pea ‘oku te mafasia ai ki ha tafa’aki ‘e 2. Ko e tafa’aki ‘e taha′, ko ‘ete mafasia ke te ma’u ‘a e loto ‘o e kakai ‘oku nau sai’ia ‘ia kita′ mo nau poupou’i mo fakamo’oni ma’ata he me’a kotoa pē. Pea ko e tafa’aki ‘e taha′, ‘oku te ilifia mo mafasia ki he fakasītu’a’i kita ‘e he kakai.′ Talamai ‘e Palōvepi 29:25 – “Ko e ilifia ki ha tangata, ‘oku te mo’ua ai ‘i ha tauhele, ka ko ia ‘oku tu’u ‘ene falala′ kia Sihova′, ‘e malu’i”. Ko ia, ko e ilifia ki he tangata′ ‘oku ‘ikai fihia ai he tauhele ‘a e kakai kehe′, ka ko koe pē ‘oku ke ‘ai ‘e koe ke si’isi’i ‘a e ‘Otua′ kae lahi e tangata′. ‘Oku tau tuku ai ‘a e tangata′ ki he tu’unga (place) ‘o e ‘Otua′ ‘i he’etau mo’ui.′ Pea ‘i he’ene pehee, ko e founga mo’oni ia ‘o e “tauhi ‘aitoli′”.

Ko e ilifia ‘e taha ‘a e kau talavou ‘oku nau faka-kengi′. Ko ‘enau lolomi mālohi ‘a e ngaahi kaungā tangata′ kenau fakakaukau taha  ki ha me’a pē. Kenau talanoa ki ha founga mo’oni, sio ki ha founga mo’oni, tui ki ha founga mo’oni, sai’ia ‘i ha founga mo’oni, fehi’a ki ha founga mo’oni. ‘A ia kuopau ke ke tali pea ke loto ki he me’a kotoa pē ‘oku tali ‘e ho ngaahi kaungāme’a.′ Ko e fakafōtunga mo’oni ia ‘o e ilifia ki he tangata′, ko ho’o fakafiefia’i ha ni’ihi – ko e ‘ikai te ke lava ‘o faka’ikai (say no) ki ho’o kau kengi′, ko ho’o ilifia na’a nau motuhi koe. Ka ‘oku folofola mai ‘a Sisu ‘ia Luke 12:5 – “Ka te u hinoi’i kimoutolu ki he Tokotaha kemou manavahē ki AI′. Mou manavahē kiate IA, ‘a ia ‘e hili ‘Ene tāmate’i ‘a e sino′, pea Ne mafai ke lī ki heli, ‘io ‘oku ou talaatu, mou manavahē ki he Tokotaha ko IA′”.

Ko ia ‘i he taimi ni′, ‘oku ‘i ai ha manavahē lelei (“healthy fear”), ko e manavahē ki he ‘Otua′, ko ‘etau ‘a’apa’ia ‘a e ‘Otua′ mo ‘Ene mā’oni’oni′. ‘A ia ‘oku Ne fakatupu ‘ia kitautolu ketau talangofua ki He’ene ngaahi fekau′ pea tau fai Hono finangalo.′ Talamai ‘e Palōvepi 9:10 – “Ko e kamata’anga ‘o e poto′ ko e ‘apasia kia Sihova pea ko e ‘ilo’i ‘o e Tapuhā́ ko e ma’u ‘atamai′ ia”. Pea ‘oku ‘ikai ‘uhinga ‘eni ko ‘etau tu’u ‘i Hono ‘Ao′ koe’uhí ko hotau tautea′ mo e fakamaau.′

Ka ko e fa’ahinga manavahē eni ia ‘oku ha’u mei hono faka’apa’apa’i loloto ‘i he loto hounga’ia mo e ‘ofa mo’oni ki he ‘Otua.′ Ko e fua ia ‘o e mo’ui worship, mo’ui fakatāpui mo mā’oni’oni – pea ta’ofi mei he faiangahala′ mo e mo’ui ki he tevolo.′ Ko e ‘apasia mo e manavahē ki he ‘Otua′, ko e fakapulipuli ia ki he’etau mo’ui fiefia′ – he ko e KAKATO mo e KOTOA, KOTOA ia ‘o e tangata′. Talamai ‘e Tangata Malanga 12:13 – “Ke ke ‘apasia kia ‘Elohimi, ‘o tauhi ‘Ene ngaahi fekau′, he ko e KOTOA ‘o e tangata′ ia”. ‘Io, ko e tangata kakato′ ia ‘i he sino, ‘atamai mo e laumālie.

Ko e fa’ahinga ‘apasia mo e manavahē ko eni′ ‘oku ne ‘omi ‘a e poto (wisdom) ‘a e ‘Otua′ ‘o fakafonu ‘i hotau loto′, pea ne ngaohi kitautolu ketau fili tonu ‘a e me’a ‘oku lelei′. Tetau ako mālohi, faka’uli hao, kai mo’ui lelei, fakamālohi sino ma’u pē, mo’ui lotu, lau ho’o Folofola′ etc., ‘e fakatonu ho’o me’a kotoa pē ‘o fakatatau ki Hono finangalo′. He kuo ke ‘oange ho tangata kotoa′ pe ko ho tangata kakato′ Ma’ana – ko ho’o ‘apasia mo manavahē ia kiate IA.′

Tau ngata ai he uike ni. Ka tau toki hoko atu he uike kaha’u′ ki he’etau Folofola tefito′ – Ke Ikuna’i ‘a e Ilifia′ – Kailavaki – 2 Kalonikali 20:1-30. (To Overcome Fear – Shout-Out – 2 Chronicles 20:1-30).

Mālō ‘aupito ho’omou me’a mai.′

Tu’a’ofa atu ki he Tonga kotoa mo e lotu

Mosiana Fisi’ipeau ma’ae GBG Ministry.

Be the first to comment

Leave a Reply

This site uses Akismet to reduce spam. Learn how your comment data is processed.