Ongo Nekativi ko e Ilifia – Konga Faka’osi

Fa’u ‘e Faifekau Mosiana Fisi’ipeau

Taipe & ‘Etita – Linda Tu’ulakitau

Fakafe’iloaki fiefia atu kiate koe kotoa pē ‘oku ke me’a mai mei ha feitu’u pē he ope′ ki he peesi ‘a e LEA-‘O E-MO’UI′  mei he GOD-BE-GLORIFIED MINISTRY. Tuku mu’a keu faka’osi atu ‘a ‘eku vahevahe ki he ongo nekativi ko e manavahē pe ko e ilifia′, ‘a ia ‘oku ne fa’a fakafe’atungia’i kitautolu ke tau ikuna ha me’a pē ‘oku tau fai pe fehangahangai mo ia.

Ko ‘etau ikuna’i ‘a e ILIFIA′ – ko ‘etau kailavaki ‘o talaki pe fanongonongo, KOE HᾹ ‘A E ME’A kuo ‘osi fai ‘e he ‘Otua′ ma’au′.

Ko e ‘Otua′, ko e ‘Otua ‘o e hisitōlia′ (v.7-9). Ko e hisitōlia′, ko hono talanoa′ (story). ‘Oku ne talamai kiate kitautolu ‘a e ngaahi ngāue kuo ne fai ma’a hono kakai′ mo kinautolu ‘oku ne ‘ofa ai′. Talamai ‘e he hisitōlia′, ‘a ‘ene fai me’a lalahi mo fakaofo fau ‘a e ‘Otua′ ma’a hono kakai.′ Na’a ne foaki ‘a e fonua ko Kenani′ ki he hako ‘o ‘Epalahame.′ Na’e fili ‘e he ‘Otua′ ‘a ‘Epalahame, pea ne palōmesi ki ai te ne ngaohi ia ko e pule’anga lahi. Na’a ne to’o hake ‘a Mosese, pea ‘i he’ene ngaahi mana fakaofo′, na’a ne fakatau’atāina hono kakai′ mei he’enau nofo pōpula ‘i ‘Isipite′. Na’a ne fakamōmoa ‘a e Tahi Kulokula′ kae fononga atu ai ‘a ‘Isileli ki he kauvai ‘e taha.′ Ka na’a ne to e fakafoki mai ‘a e tahi′ ‘o ne lōmekina ai ‘a e tau ‘Isipite na’a nau tuli mui ki he kau ‘Isileli.′

Hili ‘a e pekia ‘a Mosese′, na’e to’o hake ‘e he ‘Otua′ ‘a Siosiua ke ne hoko atu ‘a e taki  ‘o e fononga′ ke fakaa’u ki he fonua ‘o e tala’ofa′, ‘a ia na’a ne tala’ofa te ne foaki mo’onautolu.′ ‘Ange’ange ‘ene fai me’a fakaofo ‘i he taimi ‘o Mosese′ ‘i he taimi ‘o Siosiua′. Talamai ‘e he Folofola′ ‘ia Siosiua 1:5 – “Hangē ko ‘eku ‘ia Mosese′, ‘e pehē ‘a ‘eku ‘iate koe′. ‘E ‘ikai lava ‘e ha taha ke tu’u kiate koe lolotonga ho’o mo’ui.′ ‘E ‘ikai teu fakatukuhausia’i koe, ‘uma’ā ha’aku li’aki koe”. (Lau ‘a e veesi 6-8).

Taha kotoa pē ‘oku ‘i ai hono hisitōlia ki he me’a na’e fai ‘e he ‘Otua′ ma’ana′ – na’a ne fakahaofi kitautolu mei hotau fili′ ko e tevolo′, mo e angahala′ mo e mate.′ Kailavaki ‘a e fakamo’ui kafakafa kuo fai ‘e Sisu he kolosi′, ke ke ikuna’i ‘aki ia ‘a e ilifia′ mo e manavahē. He kuo, pea, ‘oku, pea ‘e kei fai me’a lalahi ai pē ‘a e ‘Otua′ ma’au he ‘aho ni ‘o ta’engata. He’kai te ne li’aki pe fakatukuhausia’i kitaua ko ‘ene kakai ‘i ha taimi ‘o ta’engata!

Ke ikuna’i ‘a e Ilifia′ – Kailavaki Faka-Palōfita – Koe hā ‘e fai ‘e he ‘Otua′ ma’au′? (V.13-17).

Ke ke ikuna’i ‘a e ilifia′, kalanga ‘aki, ko hai ‘a e ‘Otua′ kiate koe? Who God is? Koe hā ‘a e me’a kuo fai ‘e he ‘Otua′ ma’au′? What God has already done for you? Pea ko e taimi ni′, koe hā ‘e fai ‘e he ‘Otua′ ma’au′? What God will do for you?

Talamai ‘e he veesi 14′ – “Na’e hifo ‘a e Laumālie ‘o Sihova′ kia ‘Iakasili ko e foha ‘o Sakalaia′, ‘i he lotolotonga ‘o e fakataha ‘a Siuta′. Pea tu’u hake ‘a ‘Iakasili ‘o ne kalanga faka-palōfita ‘aki ‘a e fekau ki he tu’i′ mo Siuta kotoa, ‘a ia kuo tuku ‘e Sihova ki hono loto′ ke ne lea’aki ki hono kakai.′ Pea ne toki kalanga le’olahi: “Fanongo mai ‘a Siuta mo e nofo Selusalema kotoa, ko e folofola ‘eni ‘a Sihova′: ‘Oua te mou manavahē, pea ‘oua temou tailiili telia ‘a e fu’u hositē koee, he ‘oku ‘IKAI ‘AKIMOUTOLU ‘A E TAU′, KA ‘OKU ‘A E ‘OTUA′ PĒ” (v.16). Mou ‘alu hifo ‘apongipongi ke fakafetaulaki kiate kinautolu…(v.17). ‘E ‘ikai ‘amoutolu ke fai tau ‘i he potu ko ia′ – ka mou fakatē pē ‘o tu’u ‘o mamata ki he fakamo’ui ‘a Sihova′ kuo ō mo kimoutolu.′

Ko e ngaahi lea palōmesi ia ‘a e ‘Otua′, koe hā ‘a e me’a te ne fai ma’a hono kakai′ ‘apongipongi′? ‘I loto he houa ‘e 24′, ko e mafoa mai ‘a e ata ‘o e ‘aho fo’ou′, ‘e hopo mai ‘a e ‘Otua′ ‘o tu’u ‘i honau faingata’a’ia′ ‘o malu’i hono kakai′. Te ne tau ma’anautolu HE KO E TAU′ ‘OKU ‘A SIHOVA IA – ka ‘oku ‘ikai ‘anautolu. Koe hā ia ma’au mo au he ‘aho ni? Claim ko hota palōmesi. Ko e palōmesi ia ‘a e ‘Otua′ ma’au mo au ko ‘ene fānau. ‘Oku ‘ikai mama’o ‘a e ‘Otua′, pe te ne ta’etokanga ki he ngaahi fiema’u ‘a hono kakai.′ Ko e kakai ‘oku tauhi kovinānite mo Sihova ko e ‘Otua′, ko ‘ene Pele-tu’u-kano’imata kinautolu (the Apple of His eyes). Talamai ‘e Sakalaia 2:8 – …”He ko ia ‘oku ala kiate kimoutolu′, ‘oku ne ala ki he tama’imata ‘o ‘ENE ‘Afio′”. Ko e palōmesi ‘a e ‘Otua′ kia ‘Epalahame′, ko e palōmesi ia ki he kakai fili ‘a e ‘Otua′, ‘a e kakai ‘Isileli′, pea ko e palōmesi ia ma’au mo au, he ko e kau ‘Isileli faka-laumālie kitautolu ki he tui ki he ‘Otua mo’ui′ – ‘a ē na’e fai kovinānite mo ‘Epalahame′, ko Sihova pē ko e ‘Otua′ ‘ia Kalaisi Sisu, na’e hoko mai ai hotau fakamo’ui′ he kolosi′. ‘O ne ha’u ‘o ngaohi ‘a e ua′ (Siu′ mo e Senitaile′ – ‘a koe mo au) KO E TANGATA FO’OU PĒ TAHA ‘IA SISU KALAISI. ‘O ne HOLOKI ‘a e ‘ā vahevahe kotoa pē ‘aki HONO SINO′ ‘I HE KOLOSI′, pea ne fakaka’anga mo e ngaahi LAO FEKAU′, KO E KOTO TU’UTU’UNI pē ‘a e tangata. Ka ne kalanga le’olahi mei he kolosi′ – kuo LAVA, kuo ‘OSI, kuo mo’ui ‘a māmani”. ‘Io, ko e hako kitaua ‘o e palōmesi ‘a e ‘Otua′ kia ‘Epalahame′ ‘i he’eta tui kia Sisu Kalaisi′ mo e tau na’a ne fai ma’atautolu he kolosi′, ‘o ne IKUNA’I ‘a hotau HUHU’I TA’ENGATA′. Haleluiā!

Ko ia ‘oku fekau’i kitautolu ‘e he ‘Otua′ ke tau fanongo, ‘oua ‘e manavahē, ‘oua ‘e lotosi’i, laka atu, tu’u ho tu’unga′, tu’uma’u pea ke mamata ‘i he tui′, koe hā te ne fai ma’a kitautolu′? ‘Oua na’a ke faka’atā ‘a e manavahē ke ne fakatokoto koe, ke ne fakamamatea’i koe, pe te ne lolomi mo kūmoa koe. Ka ke fakafanongo ki he folofola ‘a e ‘Otua′ – ‘oua ‘e manavahē, ‘oua ‘e lotosi’i, ‘oua ‘e puputu’u. Hoko atu mo ho’o mo’ui′, tupe’i ‘a e efu′, pea ke tu’u hangatonu ‘o sio he tui′, koe hā ‘e fai ‘e he ‘Otua′ ma’au′, ma’a ho fāmili′, ma’ae Siasi′ mo e fonua′? KO E TAU′ ‘OKU ‘A’ANA, ka ko e IKUNA′ ‘OKU ‘A’AU IA!

Vv.18-30 – ‘I he fakapapau’i ‘e he tu’i ko Sihosafate′ mo hono kakai′ ko hai ‘a e ‘Otua′ kiate kinautolu′, koe hā kuo ne ‘osi fai ma’anautolu′, pea koe hā te ne fai ma’anautolu′, na’a nau ongona ‘a e le’o ‘o Sihova′ mei he’ene Folofola′ kuo tuku mai faka-palōfita ki honau lotolotonga′, pea na’e hola pea punakaki atu ‘a e manavahē mo e tailiili′ meiate kinautolu kotoa. Pea nau kailavaki ikuna ‘o nau fakafeta’i’ia ‘a e ‘Otua.′ Ki mu’a ke tu’utu’ulaki ‘a e tau′, na’a nau kailavaki ‘a e fakafeta’i′ mo e fakamālō′ ‘o nau praise mo worship ‘a e ‘Otua.′ Pea lolotonga ‘a e tau′ ‘o a’u ki he’ene ‘osi, mo ‘enau fakafeta’i’ia pē mo hiki pē ‘a Sihova ko e ‘Otua ‘o ‘Isileli′, ke ma’olunga taha pē. Pea ko e ola ‘o e tau na’a nau fai′, ko e OLA IKUNA KAFAKAFA – ‘aki pē ‘enau hiva mo fai fakafeta’i ‘ata’atā pē kia Sihova – ‘o hangē ko e tu’utu’uni na’e fai ‘e Sihosafate kiate kinautolu.′ “Mou fai ‘a e fakafeta’i′ kia Sihova, he ‘oku tolonga ‘o ta’engata ‘a ‘ene ‘alo’ofa′”.

‘Ilo’i taimi na’e ‘akolo’i ai kinautolu ‘e honau ngaahi fili′, na’e toka malumu ‘a Sihova ma’anautolu. Ko e malumu pe ko e mahafu ‘a Sihova na’a ne fakatoka ke faka’auha ‘aki ‘a e ngaahi fili ‘o hono kakai′, ko e mālohi ‘o e praise mo e worship ‘a hono kakai′, pea tafoki hake pē fili′ ia ‘o nau fetāmate’aki pē kinautolu ‘ia kinautolu.

He’ikai te ke manavahē pea ke kalanga’aki ‘a e praise he taimi tatau. He ko e manavahē, ‘oku focus pē ia he ngaahi me’a ‘oku ta’emo’oni, me’a kovi mo ta’eikuna, ka ko e fakafeta’i′ mo e fakamālō mo e hū (worship), ‘oku focus pē ia ‘i he ‘Otua′ mo ‘ene lelei kotoa pē.

Hoko ko e tokotaha ‘oku ke center he ‘Otua′ ‘o ‘ikai te ke center he manavahē. Ko e ni’ihi ‘o hotau ngaahi tāpuaki lalahi′, ‘oku ha’u ia mei he’etau ikuna’i ‘etau ngaahi manavahē lalahi.′ Koe hā pē ha fa’ahinga me’a ‘oku ke manavahē ki ai, tatau ai pē! Falala pē koe ki he ‘Otua′! Talamai ‘e ‘Aisea 54:17 – “’Ilonga ha mahafu ‘e fa’u ke fai ‘aki ha kovi kiate koe, ‘e ‘ikai sia’a, pea ‘ilonga ha ‘elelo ‘e hopo mo koe ‘i he fakamaau′, te ke fakahalaia’i. Ko e ‘inasi ‘eni ‘o e kau tamaio’eiki ‘a Sihova.′ Pea ko honau fakatonuhia′ ‘oku meiate AU. Ko Sihova IA mei he Ta’ehāmai′”.

Ko e ongo nekativi te tau toki hoko atu ki ai′ – ko e ongo nekativi ‘o e ‘ITA′. Nomipa 20:1-13.

Tāpuekina kimoutolu ‘e he ‘Eiki′. Mālō ‘aupito ho’omou me’a mai.′ Ka mou me’a ā.

Tu’a’ofa atu ki he Tonga kotoa mo e lotu.

Mosiana Fisi’ipeau mei he GBG Ministry.

Be the first to comment

Leave a Reply

This site uses Akismet to reduce spam. Learn how your comment data is processed.