Ongo Nekativi ko e ‘ITA′ (Anger)

Fa’u ‘e Faifekau Mosiana Fisi’ipeau

Taipe & ‘Etita: Linda Tu’ulakitau

Folofola: Nomipa 20:1-13.

Glory to God! Fakafe’iloaki fiefia ki he taha kotoa pē ‘oku ke me’a mai mei he ngaluopē′ ki he peesi ‘o e Lea ‘o e Mo’ui′ mei he God be Glorified Ministry mei Senē ‘Aositelēlia.

‘Oku tau hoko atu foki he uike ni ki he taha ‘o e ongo nekativi ‘oku ne fa’a kūmoa kitautolu ‘o faingata’a ai ke tau hoko ko e kakai mo’ui ikuna. Pea ko e ongo’i nekativi ko ia′ ko e ‘ITA′ (Anger).

Ko e ‘ITA′, ko e ongo mālohi ‘aupito ia. Lolotonga ‘oku ‘i ai ‘a e ngaahi ongo ia ‘oku ne fusi ‘e ia koe kimui, pea ne puketu’u koe ‘i lalo, ka ko e ‘ita′, ko e fa’ahinga ongo ia ‘oku ne hanga ‘e ia ‘o teke koe ki mu’a, pea ne fusi koe ki ‘olunga. Ko e ‘ita koee ‘oku ta’emapule’i′, pe ‘ita tōtu’a′ ‘oku ne faka’auha mo fakamamahi’i koe, pea pehee ki ho ngaahi ‘ofa’anga′ (loved ones) faka-e-sino, faka-e-loto, faka’atamai, fakalaumālie mo faka-e-kainga foki.

‘I he tafa’aki ‘e taha′, ko e ‘ita koee ‘oku mapule’i lelei′, ‘e hoko ia ko e ongo ‘aonga lahi, he ‘oku ne hanga ‘e ia ‘o fakatupu mo faka’ai’ai ha liliu mātu’aki lelei kiate koe. Ko e ‘ita′ ‘iate ia pē ‘oku ‘ikai ke sai pe kovi – ko hono anga′ ia ‘oku tau ‘ita, ka ‘oku anga fēfē ‘a ‘etau fakahaā’i ‘a e ‘ita ko ia′? ‘Oku tau fakakaukau ko e ‘ita lelei ia pe kovi? Fakamo’ui lelei pe ta’emo’ui lelei? Talamai ‘e he Folofola′, Palōvepi 14:29 – “Ko ia ‘oku fakatotoka ‘ene ‘ita′, ko e tama ‘atamai lahi. Ka ko ia ‘oku loto ‘oho′, ko hono ‘inasi′ ko e vale”.

Ko e ‘ita′, ko e me’a ia he’ika ke tau lava ‘o ta’ofi. Ka kuopau ke tau ako ketau malava ‘o pule’i ia. Pea tau pukepuke ia ke hoko ko e koloa (asset) ‘o ‘ikai ko ha mo’ua (liability). Talamai ‘e ‘Efeso 4:26-27: “’Ita pē kae ‘oua ‘e angahala ai. ‘Oua ‘e tuku ke tō ‘a e la’aa ‘oku mou kei mamahi, kae’uma’ā ‘oua na’a tuku ha ava ki he tevolo′”. ‘Oua na’a ke ‘alu ke ke mohe ‘oku ke kei ‘ita ‘i ha taha. ‘Oua te ke ngāue’aki ho’o ‘ita′ ko ha lolo ke ke tafunaki ‘aki ha afi ko e loto sāuni ki ha taha ‘oku ke ‘ita ai. ‘Oua na’a ta tuku ha ki’i ‘eu ‘i he’eta mo’ui′ ko e tu’unga va’e ‘o e tevolo.′ Palōvepi 29:11 – “’Oku ‘a’au ki tu’a ‘e he vale′ ‘ene ‘ita′ kotoa. Ka ko e poto′, ‘oku ne pule’i ‘o fakamokomoko ki ai”.

‘Oku ‘i ai ‘a e fotunga ‘e 4 ‘o e ‘ita.

Fo’i lea ‘e 4 ‘oku ne fakamatala’i ‘a e faikehekehe ‘i he ngaahi tu’unga mo e ngaahi kalasi kehekehe ‘o e ‘ita′ ‘a ee ‘oku tau fa’a a’usia′.

  1. ‘Ita Lili (Rage) – ‘Oku ne fakamatala’i ko e ‘ita lili lahi ‘aupito; ‘ikai mapule’i ‘o hake kitu’a ‘o ne hoko ko e faka’auha. Ko e ‘ita ‘eni ‘oku hangee ha fu’u tu’oni matangi mālohi′ ‘oku puhi’i kitu’a, ‘o ne tuku koe mo e ni’ihi fanongo′ ke nau lavelavea (haehae ke kongokonga).

Ko e kau ‘ita lililili ta’emapule’i′, ‘oku nau fa’a excuse ‘aki ‘enau pehee: “’Oku ou ‘ilo’i ‘oku ou ma’u ‘a e fakapo’uli vave′, ka ‘oku ‘osi pē ia ‘i ha ki’i taimi nounou. ‘Oku hangee pē ia ko e fo’i pomu faka’auha′, pe ko ha fu’u ‘ahiohio ‘oku tō takutaku ‘i ha ki’i taimi nounou. Talamai ‘e Palōvepi 29:22 – “’Oku fakalanga kē ‘a e tangata loto ‘ita′. Pea ‘oku mohu angahala ‘a e tangata tafulu.′”

Semisi 1:19 – “Fai ha fale’i lelei ki he tangata ‘ita′. Fakavave ke ke fanongo ka ke fakatuotuai ki he lea pea tuai ki he ‘ita. ‘I hono ‘ai ‘e taha′, ke ke lāpisi ‘i ho’o fanongo′, pea ke hangee ha fonu′ ‘o ka ke ka lea. Pea ke hangee ko e ki’i ‘unga′ ‘o ka ke ka ‘ita. He ko e kakai ‘oku nau anga ‘aki ‘a e ‘ita ta’emapule’i′, tenau mamahi ‘amui ange.

  • Wrath – Ko e ‘ita ‘oku ‘alu fakataha mo e loto sāuni.′ Ko e fiema’u′ ke totongi fakafoki ‘o fakatatau ki he fakamamahi na’e fai′, pe ko ha ta’efaitotonu, pe faihia na’e fai ki ha taha. Fiema’u ‘a e mata ki he mata, nifo ki he nifo.

Ko e loto ‘ita ia ‘oku ‘alu fakataha mo e loto ta’efakamolemole′, ‘o hangee ko e kau Falesi′ kia Sisu.′ Luke 6:11 – “Pea fakautuutu ai ‘enau sesele′, ‘o nau feālēlea’aki koe hā tenau fai kia Sisu′”. Ko e loto ‘ita kakaha′, ‘oku fonu angahala’ia he ‘oku fonu ai ‘a e loto sāuni′. Pea kuopau ke ta’ofi. Talamai ‘e Hepelū 10:30 – “He ‘oku tau ‘ilo ‘a e anga ‘o e tokotaha ko ia′, ‘oku ne pehee ‘oku ‘a’aku ‘a e sāuni′, ko AU te u ‘atu hono tuha′, ko e folofola ee ‘a Sihova′, mo ne to e pehee, ‘e fakamaau ‘e he ‘Eiki′ hono kakai′”. ‘Io, ko e Tokotaha pē ke ne fai ‘a e ‘ita kakaha′ (fai houhau′) ko e ‘Otua′. ‘Oku taku ia ‘i he Tohitapu′ ko e Houhau Kakaha (wrath) ‘a hotau ‘Otua′. Talamai ko e kakai ta’efakatomala′, tenau fehangahangai mo e houhau kakaha ‘a e ‘Otua.′ Ko e ‘Otua′, ‘oku ne tuai ki he houhau′, ka te ne fakahoko ‘ene houhau kakaha′ ki he kakai faka’otuamate′, ta’efaitotonu′, fulikivanu′ mo angakovi.′

Mālō ‘aupito ho’omou me’a mai′, ka tau ngata heni he uike ni. Ka tau toki hoko atu he uike kaha’u′. Ka mou me’a ā. ‘Ofa ke fai tāpuekina ‘e he ‘Otua′ ‘a e Tonga kotoa pē ‘oku ke me’a mai mei he ngaluopē.

Tu’a’ofa atu mo e Lotu

Mosiana Fisi’ipeau

Mei he God be Glorified Ministry.

Be the first to comment

Leave a Reply

This site uses Akismet to reduce spam. Learn how your comment data is processed.