Monite Sune 1, 2020

From Glory to Glory Devotional (Tongan)

‘Omi koe ‘e he ‘Otua′ kiate IA

Kuo mou mamata ki he me’a kuo u fai ki he kau ‘Isipite, mo ‘eku fafa kimoutolu ‘i he funga kapakau’i ‘ikale, ‘o ‘omi kimoutolu kiate au.

‘Ekisoto 19:4

Fakafeta’I mu’a ki he ‘Eiki′ ‘Ene taulama hao ‘oku fai ma’a’etau mo’ui′ ‘otau to e a’usia ai ‘a e ‘uluaki ‘aho ‘o e mahina ko Sune′ 2020.

Kamata pē ‘a ‘Ekisoto 19′ ‘aki hono fakamatala’i mai ‘I hono mahina tolu hili ‘a e hū kitu’a ‘a ha’a ‘Isileli mei ‘Isipite′, na’a nau a’u ki he Toafa ‘o Sainai′ ‘o nau fokotu’u teniti ai, ‘o hanga ki he mo’unga′. Pea na’e ‘alu hake ‘a Mosese ki he ‘Otua′, pea na’e ui ‘a e ‘Otua′ kia Mosese mei he mo’unga′. ‘Oku ‘uhinga ‘a e mo’unga ko ‘eni′ ki Mo’unga Sainai, ‘a ia na’e ofi ki he feitu’u na’e fetaulaki ai ‘a e ‘Otua′ pea mo Mosese ‘I he vao talatala’āmoa′ (burning bush). Na’e to e ‘iloa ko Hōlepi (Horeb) – ko e mo’unga ‘o e ‘Otua′ (the mountain of God). Na’e talaange ‘e he ‘Otua′ kia Mosese ko ‘eni ‘a e ngaahi lea ke ne fai ki he fale ‘o Sekope′ pea mo e fakahinohino ki ha’a ‘Isileli.′ ‘A ia ‘oku tau a’u mai ai ki he veesi tefito ‘o e ‘aho ni′: “Kuo mou mamata ki he me’a kuo u fai ki he kau ‘Isipite, mo ‘eku fafa kimoutolu ‘I he funga kapakau’I ‘ikale, ‘o ‘omi kimoutolu kiate au.” ‘Ekisoto 19:4.

Faka’amu ‘a e ‘Otua′ ke ne fakamanatu ki ha’a ‘Isileli na’e ‘ikai ko e ‘uhinga lahi ‘o ‘ene fakatau’atāina’I mai kinautolu mei he’enau nofo popula ‘I ‘Isipite′ koe’uhí kenau anuanu ‘I he lelei kotoa pē ‘I he Fonua ‘o e Tala’ofa′. Ka ko e ‘uhinga ‘o ‘Ene fakatau’atāina’I kinautolu′ koe’uhí ko ‘Ene ‘omi ia kinautolu kiate IA!  Fakamanatu ‘e he ‘Otua′ ki ha’a ‘Isileli, ko e ‘uhinga ‘o ‘Ene hanga ‘o fafa kinautolu ‘I he funga kapakau’I ‘ikale′ koe’uhí ke Ne ‘omi kinautolu kiate IA! Ko ‘Ene ‘omi kinautolu kenau ‘ilo’I IA pea kenau hū mo tauhi kiate IA. Na’a ne fakahaofi kinautolu koe’uhí ke ‘I ai honau vā fakafo’ituitui pea vāofi ‘aupito pea mo IA (intimate personal relationship with Him). Taimi ‘enau nofo popula ‘I ‘Isipite′ na’e ‘ikai kenau tau’atāina kenau hū mo tauhi (worship) ki honau ‘Otua′. Pea fokotu’utu’u ‘a e ‘Otua′ ke Ne ‘oange kiate kinautolu hanau fonua pē ‘onautolu, ‘a ia ‘e lava ai kenau tau’atāina he’enau hū mo tauhi ki honau ‘Otua.′ Na’e ‘ikai ko e ui (call) fika ‘uluaki ‘a e ‘Otua′ kiate kinautolu′ kenau faka’auha ‘a e ngaahi matakali tauhi ‘aitoli ‘I Kenani′ pe tenau nofo he fonua na’a nau ikuna’I′ pe tenau fokotu’u ha pule’anga (nation) fo’ou, neongo tenau a’usia kotoa ia. Ka ko e ui fika ‘uluaki ‘a e ‘Otua′ kiate kinautolu′ kenau hoko ko e kakai ‘oku nau tauhi angatonu kiate IA, ko e kakai ‘oku nau ‘ofa kiate IA ‘aki ‘a e kotoa ‘enau mo’ui′ pea nau hū mo tauhi kiate IA Tokotaha pē.  ‘I he fakahaofi kuo fai ‘e he ‘Otua′ ma’anautolu′, na’e lava kenau sio tonu ai ki he Mafimafi ’o e ’Otua′, ko e ’Otua aoniu ‘Ene pule′ mo Hono mafai′ mo Hono mālohi′. ‘Ikai ngata ai′, na’a nau sio tonu ai ki he mafu ‘o e ‘Otua′—ko e ‘Otua ‘oku Ne ‘ofa’I kinautolu.

Kainga, hangē ko e fakatau’atāina na’e fai ‘e he ‘Otua′ ki ha’a ‘Isileli′, ‘oku pehē ‘a ‘Ene fakatau’atāina ‘oku fai kiate koe pea mo au mei he vanu ‘o e angahala′ pea mo e pule’anga ‘o e fakapo’uli.′ Fakafeta’I ki he ‘Otua′ he lolotonga ‘etau nofo ‘I he vanu ‘o e angahala′ kuo Ne foaki mai hono ‘Alo tofu pē Taha′ ‘a Sisu Kalaisi ke Ne pekia ‘I he kolosi′ ‘o fai hotau fakatau’atāina′. Na’a Ne fai hotau fakatau’atāina′ koe’uhí ke Ne ‘omi kitautolu kiate IA. Ke ‘I ai ‘a e vā fakafo’ituitui vāofi ‘aupito (intimate personal relationship) ‘iate kitautolu pea mo IA.

Taimi lahi ‘oku tau fa’a pehē na’e ‘uhinga hotau fakahaofi (saved) ‘e he ‘Otua′ koe’uhí ketau fai ha ngaahi fu’u ngāue lahi Ma’ana ta’e’iai ha vā fakafo’ituitui vāofi ‘iate kitautolu mo e ‘Otua′. Ka ‘oku to e fakamanatu mai ‘e he Folofola ‘o e ‘aho ni′, na’e fakahaofi kitautolu ‘e he ‘Otua′ ke Ne ‘omi kitautolu kiate IA. ‘Oku ngāue’aki ‘e he ‘Otua′ ‘etau ngaahi ngāue′ (activities) pea mo e ngaahi tūkunga kotoa pē ‘o e mo’ui′ ‘oku tau fou ai′ ke Ne ‘omi kitautolu kiate IA. Ko e taimi ‘oku faka’atā ai ‘e he ‘Otua′ ha ngaahi vaā’ihala faingata’a ketau fou ai′, ‘oku ne hanga ‘o ‘omi kitautolu ketau to e vāofi ange pea mo e ‘Otua′. Ko e taimi ‘oku ‘omai ai ‘e he ‘Otua′ ha ngaahi fu’u assignment lalahi pea faingata’a ketau fai, ’oku hoko ‘etau ongo’I ta’emalava′ ke ne ’omi kitautolu ki he ‘Otua′—ke tau to e vāofi ange pea mo e ‘Otua′ ka Ne fai ‘e IA ‘a e fakamalava′. 

Kainga, kapau he’ikai ketau tokanga, ‘e nofo ‘etau fakamamafa′ he ngaahi ngāue ki he ‘Otua′, ka tau tukuange ‘a e me’a mahu’inga taha′—ko hotau vā fakafo’ituitui vāofi pea mo e ‘Otua′—’a e taimi fakafo’ituitui ‘o koe pea mo au pea mo e ‘Otua′ ‘I he lilo′. ‘A e taimi mahu’inga ‘oku ta tangutu fakalongo ai ‘o tatali ‘I Hono ‘Ao′ pea ta faka’atā ke lea ‘a e Laumālie Mā’oni’oni′ kiate kitaua. Manatu’I ma’upē ko e taimi kotoa pē ‘oku ta mo’umo’ua ai he ngāue (activity) ki he ‘Otua′, ‘oku fa’a faka’atā ‘e he ‘Otua′ ‘a ‘etau ngaahi a’usia′ (experiences) koe’uhí ke Ne ‘omi kitautolu kiate IA.

‘Ofa ke tāpuekina koe ‘e he ‘Eiki′ he ‘aho ni pea ‘aonga ‘Ene Folofola′ kiate koe ‘o hangē ko ‘ene ‘aonga kiate au′.

Be the first to comment

Leave a Reply

This site uses Akismet to reduce spam. Learn how your comment data is processed.