Falaite 5 Sune 2020

From Glory to Glory Devotional

‘Ilo’I ‘a e ‘Otua′ pea mo Sisu Kalaisi

Folofola: Sione 17:3 – Pea ko eni ia ‘a e mo’ui ta’engata′, ke nau fai ke ‘ilo koe ko e ‘Otua mo’onia′ pē taha, pea mo Sisu ne ke fekau mai ko e Misaia.′

Ko e faka’amu ‘a e ‘Otua′ ke tau a’usia ha “love relationship” vāofi ‘aupito pea mo IA. Talamai ‘e Sisu: “Pea ko eni ia ‘a e mo’ui ta’engata′, ke nau fai ke ‘ilo koe ko e ‘Otua mo’onia′ pē taha, pea mo Sisu ne ke fekau mai ko e Misaia.′” (Sione 17:3).

Ko e uho ‘o e mo’ui ta’engata′ ko ‘etau ‘ilo’I ‘a e ‘Otua′ pea tau ‘ilo’I foki mo Sisu Kalaisi ‘a ia na’a Ne fekau’I mai ki mamani′. ‘Oku ‘ikai ke makatu’unga ‘etau ‘ilo’I ‘a e ‘Otua′ ‘I ha polokalama pe ko ha fa’ahinga ako, pe ko ha Siasi, pe ko ha taki lotu (leader), pe founga ‘a ha tangata. Ka ‘oku makatu’unga pē ‘etau ‘ilo’I mo’oni ‘a e ‘Otua′ mei he ‘I ai ‘a e vā fakafo’ituitui vāofi ‘aupito (personal intimate relationship) ‘o kitautolu pea mo e ‘Otua′. Pea ‘oku fakafou mai ‘e he ‘Otua′ funga ‘I he fo’I relationship ko ‘eni′ ‘a ‘Ene fakahaā’I (reveal) mai IA, ‘Ene taumu’a′ pea mo ‘Ene founga′.

Pea ‘oku fakaafe mai ‘a e ‘Otua′ kiate kitautolu ketau kau fakataha mo IA he feitu’u (place) kuo Ne ‘osi ngāue ai.′ Pea kapau tetau talangofua ‘o kau fakataha mo IA, pea ‘e fai ‘e he ‘Otua′ ha ngaahi ngāue fakaofo ‘o fakafou ‘iate koe, ‘a ia ko e ‘Otua′ tokotaha pē te ne lava ‘o fai ‘a e ngāue ko ia.′ Pea ‘e kamata ke ke ‘ilo’I ‘a e ‘Otua′ ‘I ha founga ‘oku to e fu’u mātu’aki vāofi ange′ ‘aki ho’o a’usia (experiencing) ‘a e ‘Otua′ mo ‘Ene ngāue ‘oku fai ‘o fakafou ‘iate koe′.

‘I he’etau hiki (move) ki he fa’ahinga relationship vāofi mo loloto pehee mo e ‘Otua′, tetau a’usia mo’oni ai ‘a e mo’ui ta’engata′ ‘i hono kakato taha′ pe ko hono taupotu taha ‘oku ala lava′. Talamai ‘e Sisu ‘ia Sione 10:10 – “Ko au kuo u ha’u koe’uhί ke nau ma’u mo’ui, pea ke nau ma’u ‘o lahi ‘aupito”. ‘Oku ke faka’amu nai ke ke a’usia ‘a e mo’ui′ ‘o lahi ‘aupito? ‘Io, te ke malava pē ‘o ‘ausia ‘okapau ‘oku ke loto lelei ke ke tali ‘a e fakaafe ‘a e ‘Otua′ ke ‘i ai ha’o “love relationship” mātu’aki fu’u vāofi ‘aupito pea mo IA.

Be the first to comment

Leave a Reply

This site uses Akismet to reduce spam. Learn how your comment data is processed.