Sapate 7 Sune 2020

From Glory to Glory Devotional

Ko e Fa’ahita’u ‘o e Mo’ui

Folofola: Koheleti 3:1 – Ko e me’a kotoa ‘oku ai hano taimi, pea mo hono ‘aho kotofa ki he feinga kotoa pē ‘I he lalo langi.

Ko hono faka’ofo’ofa hono hanga ‘e he ‘Otua′ ‘o fokotu’utu’u ‘a e ngaahi fa’ahita’u′, he neongo ‘oku ‘I ai pē ‘enau faikehekehe, ka ‘oku nau ngāue fakataha ke ‘I ai ‘a e mo’ui pea mo e tupu.

Ko e fa’ahita’u matala′ (spring), ko e fa’ahita’u ia ‘o e kamata’anga fo’ou (new beginning), ‘oku kamata ke fisiki hake ‘a e matala ‘a e ‘akau′ pea ‘I ai ‘a e mo’ui fo’ou he funga ‘o e fonua.′ Ko e fa’ahita’u māfana′ (summer), ko e taimi ia ‘o e tupu mo e mahutafea ‘I he funga ‘o e fonua.′ Ko e fa’ahita’u fakatōlau′ (autumn), ko e fa’ahita’u ia ‘o ‘etau utu ‘a e ngaahi me’a kuo tau ‘osi tō mo ngāue’I kimu’a.′ Pea ko e fa’ahita’u momoko′ (winter), ko e fa’ahita’u ‘o e ngata’anga, fa’ahita’u ‘o e mālōlō mo e fakalongolongo. ‘Oku ‘I ai ‘a e faka’ofo’ofa mo e me’a ‘oku makehe ai ‘a e fa’ahita’u takitaha. Pea ‘oku nau mahu’inga kātoa ki he mo’ui′ (life).

Hangē pē ko e palani ‘e he ‘Otua′ ‘a e fa’ahita’u ‘o natula′, ‘oku pehē tofu pē mo e fokotu’utu’u ‘e he ‘Otua′ ‘a e fa’ahita’u ‘o e mo’ui.′ ‘Oku ‘I ai ‘a e fa’ahita’u matala (spring) ‘I he mo’ui ‘a e tangata′ (human beings), ‘a ia ‘oku tau kamata’I ai ha ngaahi me’a fo’ou pea tau faka’amanaki lelei ki he kaha’u.′ ‘Oku hoko mai ‘a e fa’ahita’u māfana′ (summer), pea ‘oku tau ngāue mālohi ‘I he vela ‘o e ‘aho′ koe’uhί ko ‘etau tulituli ke fakakakato ‘a e ngaahi ngāue kuo kouna kitautolu ‘e he ‘Otua′ ketau fai′. ‘Oku hoko mai ‘a e fa’ahita’u fakatōlau′ (autumn), pea mo ‘etau sio mata ki he ola pe ko e fua (fruition) ‘o e ngaahi me’a na’a tau ngāue’I he ngaahi taimi kimu’a ‘etau mo’ui′. ‘Oku hanga ‘e he fa’ahita’u momoko′ (winter), ‘o ne ‘omai ‘a e ngata’anga ‘o ha fo’I vaha’a taimi he’etau mo’ui.′ Taimi lahi ‘oku ‘I ai ‘a e ngaahi faingata’a ‘oku tau fa’a fehangahangai mo ia he fa’ahita’u momoko′, ka ‘oku ‘ikai pē mole ‘etau ‘amanaki′ koe’uhí ko ‘etau fakatu’amelie ki he hoko mai ‘a e fa’ahita’u matala′ (springtime).

‘I he haohaoa ‘o e palani mo e fokotu’utu’u ‘a e ‘Otua′ ki he’etau mo’ui′, kuo Ne ‘osi fokotu’utu’u ‘a e taimi ‘o e fua lahi′ mo e mahutafea′ he’etau mo’ui.′ ‘E to e langa hake foki ‘e he ‘Otua′ ‘etau mo’ui′ he taimi ‘o e mālōlō mo e fakalongolongo.′ ‘E ‘I ai foki ‘a e taimi ‘e fiema’u ai ‘e he ‘Otua′ ketau angatonu kiate IA pea tau tuiaki hono fakahoko ha fo’i ngāue tatau he ‘aho ki he ‘aho ki he ‘aho. Pea ‘e ‘I ai foki ‘a e taimi ‘o e fiefia mo e kamata fo’ou (new beginnings) he’etau mo’ui.′

‘I he kelesi pē ‘a e ‘Otua′, te tau anuanu ai he ngaahi tāpuaki lahi ‘o ‘etau utu ‘a e ngaahi tenga lelei ‘o e angatonu′ na’a tau tō he’etau mo’ui′. Pea ‘I he kelesi tatau ai pē ‘a e ‘Otua′, te tau lava’I ‘o matatali ‘a e fa’ahita’u momoko ‘o e faingata’a′, loto mamahi′ mo e fakatanga.′ He ka ‘ikai ha fa’ahita’u momoko, he’ikai ke ‘I ai ha fa’ahita’u matala. Ka ‘ikai ke ‘I ai ha faingata’a, he’ikai ke ‘I ai ha kamata fo’ou. Ka ‘oku tau fakafeta’I lahi ki he ‘Eiki′ koe’uhí ko e fa’ahita’u kehekehe ‘o e mo’ui′ ‘oku ne faka’atā kitautolu ketau fononga ai′. He hangē pē ko e fa’ahita’u ‘o natula′, ko e ngaahi fa’ahita’u ko ‘eni ‘e fā he’etau mo’ui′ ‘oku nau fengāue’aki fakataha ke ‘omai ‘a e finangalo haohaoa ‘o e ‘Otua′ ki he mo’ui ‘a e tokotaha kotoa pē ‘iate kitautolu.

Be the first to comment

Leave a Reply

This site uses Akismet to reduce spam. Learn how your comment data is processed.