Tali Lotu ‘a e ‘Otua′ ‘oku Fai Ma’aku – God’s Small Blessings!!

by Linda Tu’ulakitau

Ko e taha ‘o e fakakoloa kiate au ‘a e Ministry ‘oku mau fakakaungatāmaki ai′ he ko e totongi ‘oku mau ma’u′ ‘oku foaki ‘ata’atā pē ‘e he ‘Eiki. Ko e ‘Eiki pē ‘oku Ne ‘afio’i ‘a e taimi mo e resources mo e pa’anga, mo e ngaahi feilaulau kehekehe ‘oku fakamoleki He’ene ngāue pea hangē ko e lau ‘a e Faifekau ‘e taha: “If you take care of God’s backyard, God will take care of your own backyard”. Ha ha.

‘Oku ou nofo he taimi lahi ‘o fakafeta’i lahi ki he ‘Eiki he’eku sio ki he’ene fanga ki’i small blessings ‘oku mau lave ai he taimi kotoa. ‘I ai ē ngaahi me’a lahi na’e tonu ia ke ‘i ai ha accidents ‘e hoko ki homau ki’i famili but God and His angels supernatually intervene in the right moment ‘o fakahaofi kimautolu. ‘Oku ou nofo ‘o fakafeta’i lahi kiate IA he’ene protection ‘oku mau lave faka’aho ai. ‘Oku tali lotu ‘a e ‘Eiki ki he’eku ngaahi lotu fakafo’ituitui ‘oku fai.

Na’a ku lotu ‘o kole ki he ‘Eiki ke Ne faka’atā ha ki’i feitu’u ke u lava ‘o lotu ai ‘ikai to e fakahoha’asi au pea ‘oku tali lotu ‘a e ‘Otua ki ai ‘o ne faka’atā mai ‘a e feitu’u makehe keu feohi fakafo’ituitui ai mo IA.

Na’a ku lotu ki he ‘Eiki ‘o kole ke ne to e fakalahi ange ‘a e lahi ‘o e ‘u gospel tracts ‘e lava ‘o hū mai ke mau tufa he ngaahi ‘api mo e ‘u shopping centres ‘i Sydney, na’e tali lotu ‘a e ‘Eiki ‘o ne fakaava ‘a e matapaa ke lava ‘o to e fakalahi mai ‘o triple ‘a e lahi ‘o e ngaahi gospel tracts ‘oku to e hu mai ki he GBG Ministry.

Na’a ku lotu ki he ‘Eiki ‘o kole ke ne faka’atā ha matapā ke lava homa ki’i ‘ofefine lahi ‘o hū ki ha University. Na’e tali lotu ‘a e ‘Otua ki he kole lotu ko ‘eni na’a ku fai. He ne ‘osi offer pē hono ngaahi places ‘ona ia mei he ngaahi Universities ki mu’a ‘oku te’eki ai ma’u mai ‘a e ola ‘ene sivi HSC. Pea neongo kuo ‘osi finalised ‘a e University ‘e hū ki ai he ta’u ni, ka ‘oku kei ha’u pē ‘a e ngaahi offers ia mei he ‘u Universities ‘o a’u ki he ‘aho ni. ‘Oku ou ‘ilo ko e fakaava matapā ‘ata’atā pē ia ‘a e ‘Otua he ‘oku tokolahi ‘a e fānau ako ‘oku te’eki ai ma’u ha’anau offer ke nau hū ki University koe’uhi ko e ‘ikai a’u ‘enau ATAR ki he requirement ‘a e ‘u Universities. Ka ko e me’a kou ako he case homa daughter, when God opens a door, no man or devil can shut!

Na’a ku kole ki he ‘Eiki ke tokoni mai he teu kumi ‘a e vala ako mo e naunau ako ‘ema fānau ako ‘e toko fā he Teemi 1 ‘o e ta’u ni (2021). Ko ‘ema ‘ofefine lahi, kamata ia ‘i he University, pea ko ‘ema toko tolu iiki, ‘oku nau hū ki he Private High School. ‘Osi maau kotoa ‘a ‘enau vala ako mo e naunau ako, to e eni ke kumi ‘a e kato ako homa foha si’isi’i taha he ne ‘osi mahae ‘ene kato ako he ta’u kuo ‘osi. Ko ‘enau kato ako hono kumi fo’ou ‘oku $80. Pea ko ‘eku ‘alu atu ki ‘apiako ke kumi ha’ane kato ako fo’ou, talamai he fefine faifakatau kuo ‘osi kātoa ‘a e kato fo’ou ia hono fakatau, ka ko e kato secondhand pē ‘e taha ‘oku toe. Kou sio ki he kato ‘oku kei faka’ofo’ofa ‘aupito ia! Kou talaange ki he fefine pe ‘e fiha kapau te u fakatau ‘a e kato he neongo ‘ene secondhand ka ‘oku kei faka’ofo’ofa ‘aupito. ‘Ohovale he talamai ‘e he fefine, “I will give it to you for free since it’s the only bag left!” Na’a ku foki mai ki ‘api mo ‘eku fakafeta’i lahi ki he ‘Eiki he ‘oku fakafou ‘Ene ‘ofa he fefine.

A’u ki he fanga ki’i me’a iiki ‘aupito ‘oku tali lotu ai ‘a e ‘Eiki ma’aku. Hangee kapau te u lele mo hoku hoa ki he shopping pe ko ha beach ‘oku fu’u busy. Lolotonga ‘ema lele he hala, ‘oku ou ‘osi kole ki he ‘Eiki hoku loto, ke ne faka’ataa ha ma parking he ko e feitu’u busy ‘aupito ‘a e parking. Ko ‘ema lele atu pe kuo ‘osi holomui mai ‘a e me’alele ia ‘e taha ke lele ka ne vacate mai ‘ene parking space kia maua in the most convenient place! Pea ko ‘ete me’a pe ‘oku fai ko e ‘ave pe fakafeta’i mo e fakamaloo ki he ‘Otua!

‘Oku ne tali lotu ma’aku he’eku lotu ki he’emau me’a fakapa’anga. I see the hand of God and the blessings and favour of God ‘i homau ki’i famili. Pea ‘oku ou fakafeta’i lahi ki he ‘Eiki. ‘Oku ou ma’u ‘a e loto hounga’ia mo’oni kiate IA he lelei kotoa pe ‘oku mau ‘inasi ai ko e hu’ufataha pe ia mei he ‘Otua. Ko e ‘Otua tali lotu. ‘Oku Ne fakaongo ki he tangi ‘oku fai ‘e hono kakai. ‘Oku ou ‘ave ‘a e kololia mo e langilangi kotoa pe ‘o fakateunga ‘aki hotau ‘Eiki ko Sisu Kalaisi ‘i taimi ‘o a’u ki ‘Itaniti.  

Image by Ri Butov from Pixabay 

Be the first to comment

Leave a Reply

This site uses Akismet to reduce spam. Learn how your comment data is processed.